那夜,我在老蘭狩獵了天使: 第十二章

「爸爸媽媽,依個就係我男朋友喇...」
「世伯,伯母你好!叫我阿權得喇!小小意思,唔成敬意。」
「多謝喎!咁破費呀!」伯母一副家庭主婦樣子,加上白色粗框眼鏡,圓渾身形,一睇就知係幸福師奶,「你地坐低傾下計,我去準備今晚餐飯。」
「我幫你手丫...」阿珊行左去廚房。
我坐左落梳化度,一對眼睛已對我全身打量。
「我爸爸以前係酒店中廚部做大廚架...」我諗返起之前阿珊同我講啲野,「佢就唔太鐘意講笑,平時都唔太講野,比較木獨囉...」
依一刻,我覺得我好似石斑咁,被佢上下打量,準備落刀劏咁...
「飲茶啦!」世伯木無表情咁同我講。
「咦...好香喎,咩茶呀?」我嘗試打開話題...
「香片來啫...」又係木無表情咁同我講。


靜到我好似聽到烏鴉叫...
「阿珊,你阿哥話幾時返呀?」
「佢話而家塞緊車,遲三四個字返喎...」伯母搶先答。
「唔...韋生呵?」
「叫我阿權得嫁喇...」
「我以前都幫過你爸爸打工,係尖東個間酒店度...」
「係咩...」其實我都唔太清楚屋企既業務,大概知搞飲食起家...
過左一陣,開門聲傳來,「爸!媽!返來喇!」
烏鴉終於返喇,應該可以緩和下啲氣氛...
「好!人齊喇!你地搞掂未呀?到我用喇!」世伯起身行入廚房。


「搞掂喇!差你啲野咋!」伯母回應。
「你有口福喇!我爸爸好少出手嫁!」阿珊係我耳邊講...
過左半個鐘左右,八餸一湯正式上枱,而中間正正放左碟咕嚕肉。
「試下,我最拿手既小菜--咕嚕肉。」世伯將一舊咕嚕肉夾俾我...
我一試,細個既記憶即刻湧現...
「唔!我記得嘞!係依隻味,細個爹地媽咪帶我地全家出去食飯,點左碟咕嚕肉,全家都話好食,我媽咪仲請教過個廚點整,但後來佢自己係屋企整就整唔返隻味出來...」
「哈哈...咕嚕肉其實好難整嫁!又要炸肉,又要整汁,撈埋一齊時又唔可以太耐...」世伯雞啄唔斷咁講煮餸啲野,如果唔係伯母打斷佢講野,我諗佢講到聽朝都未講完。而我則默默地享受緊碟咕嚕肉,結果我添左三碗飯,而碟咕嚕肉都被我食左大半...
飯局完左,我同阿珊係附近散步...
「你又話你爸爸唔太講野既?頭先唔係你話要散步,我諗我要通宵陪你爸爸傾計!」
「我無話佢唔講野呀,佢係無興趣既就會唔講,同埋遇到啱傾既人就會雞啄唔斷嫁喇!」


「咁你爸爸係唔係鐘意我呀?」
「係呀!你快啲娶佢啦!」
「我驚伯母傷心喎!哈哈...聽日到你喎!」
「放心!我唔會失禮你既!」
其實我就唔太擔心既佢,係我有三四年無同家人過節,反而我比佢緊張...