那夜,我在老蘭狩獵了天使: 第十四章

「做咩唔出聲既?」阿珊好奇地問我。
「無...我諗緊野啫...」我搾住柸茶走,腦裡面不停諗返起大哥既說話...
「我夠鐘返工嘞,你唔走咁我走先。」
「嗯...收工接你...」阿珊慢慢走出冰室...
我望住半柸漸漸變凍既茶走,我既心就好似柸茶走咁,突然間有人遞上柸新既來,係達叔...
「你柸凍左,飲過柸新喇,我請。」
「多謝!」
「睇你似有心事喎,唔怕講出來聽下。」達叔已經拉開張櫈坐左落去。
「無,之前有份計劃好俾心機咁做,點知得出既結果未如人意,雖然預左會有唔好既結果,但個打擊大左啲,個人好似提唔起勁咁...」
「好重要架?」


「唔...可以話係我人生第一次咁認真去做既事囉,同埋證明自己既能力,唔多唔少可以話因為阿珊而的起心肝去做...」
「唔...飲啖茶先啦,凍嘞...」
我飲左啖茶走,係有少少凍,但茶味仲係度,因為用煉奶沖,始終唔夠用淡奶滑...
「點呀?」
「凍左啲...」
「其實老套啲講,有時沖茶煮野食同做人一樣,永遠未到出爐上枱一刻都未知道結果!所以人要經常嘗試,就好似茶走咁,無人話一定要淡奶,用煉奶就有唔同既質感,亦都有人喜愛。所以唔使太在一時既失敗,只要自己改善不足同埋堅持自己既意志,總有人欣賞!」
「嗯!我明白既!」
離開冰室,我漫無目的咁散步,腦裡不斷回憶依幾年發生既事,最深刻就係同阿珊偶遇,假如無遇到佢我依家都應該仲係老蘭胡渾。曾經聽人講過,你想要做好一件事,最好既方法就係不停諗住最開心既事來做,咁件事就一定成功。而家我終於明白我既project會失敗,係因為我無將最快樂既野注入去...
「你想帶我去邊呀?我睇唔到唔會有驚喜喎...」
我無出聲,只係開緊度閘...


「鐵閘聲?你唔係想禁室培育呀?」
「你係邊度學嫁?入來先啦!」
「神神秘秘...嗱...唔好整痛我呀!」究竟佢諗緊咩?
「嗱,依度我睇左好耐嫁喇,租金都傾掂,咁係唔近你住既地方同埋人流差啲,但地方都唔錯,做私房菜同拍煮野食都可以既...」
「等陣...你唔係叫我係度做私房菜同教人煮野食呀?我唔得嫁!」
「咩唔得啫?邊個一出世就乜都得嫁?而且仲有我幫你,我地兩公婆...」
「咩話?」
「我地兩個雙劍合壁,一定天下無敵!」
「古裝咩?天下無敵?咁我係唔係做老闆娘先?」
「係呀!唔係你仲有邊個?」


殺死人微笑又出現,而我忍唔住錫佢,攬實佢,同佢講:「依度就係我地迎接將來既起點...」