有... 有人黎救我哋! 我心中湧出一陣狂喜, 求生意志令我再度拎起刀, 再用盡全力向身後喪屍亂咁揮刀,

「扒低!」

喺我退到全身都貼住鐵閘, 已經無路可退嘅時候。 一聲柔和而有力嘅聲音響起! 身體只喺跟從指令, 並無思考我就馬上跌坐係地上。

「噠噠噠噠噠噠噠噠噠噠噠噠噠噠────」

喪屍仲保持住一或張開口撲過黎, 一或跑步沖過黎嘅姿勢, 但卻企喺原地郁都唔郁, 身體早已僵硬。 突然大團嘅血暈喺佢哋頭上噴發出黎, 呢個時候佢哋先陣陣抽搐, 慢慢翻身倒下。





喺呢條血線之後, 大大小小嘅血花朵朵綻放, 再被被屍群吞沒, 喺火線鋒芒所指嘅前方, 突然躍出一頭體長近一米嘅喪屍獵犬。 立喺地上嘅四條腿甚至超出佢身體嘅長度。 佢發出如同獅子般巨大吼叫, 叫聲甚至喺空氣中吹起一陣風。 兩隻後腳沉重踏向地上, 頓時將某啲喺附近嘅喪屍手腳居中踏斷。 佢再度提起腳時, 地上已經揚起陣陣塵土, 然後以每秒超過十米嘅速度跑向正喺肆意開槍嘅人!

「呯呯───!!」

頭上掠過一個酒樽, 個樽以漂亮嘅拋物線準確咁掉去我前方一米外!

前方混亂嘅屍群驟然燃起一團耀眼嘅火球, 喪屍狗雖然極為巨大同敏捷, 但全速奔跑之下卻無法躲避, 被呢下火球轟中, 大半個身軀已經化為升嘅火焰!

佢嘅生命力異常頑強,居然咁樣都仲未死! 四隻腳依然有住無窮力量, 繼續踏向地上向前方奔騰。 然而無數火線立即以佢為中心集中彙聚而去, 子彈密密麻麻射向喪屍犬身上!





一團巨大得令我喘唔過氣嘅血霧喺離我不到五米嘅距離炸開, 三十秒唔到, 呢隻巨型喪屍狗就被徹底擊殺, 頭部仍流出黑紅色嘅血漿。

鐵閘喺一瞬間嘭一聲打開, 海晴馬上拉我入去。

「快啲過黎啦!」 我回頭只見一片火海, 火焰中有喪屍衝出黎, 一隻手臂拉我入鐵閘後, 鐵閘再嘭一聲用力關上, 海晴白晢卻有擦傷嘅雙手馬上鎖起閘。

我跌坐喺地下到喘息, 後方高高在上嘅身影拎住枝槍, 喺背向太陽光之下威勢只有更加恐怖, 一把冷峻有力嘅聲音轟然響起,

「你哋點解要過黎, 仲帶埋咁多嘅喪屍?」





鐵閘內沉默起黎, 氣氛凝固得幾乎將人凍結令人無法呼吸, 見我哋二人被佢嚇得無人敢回答, 人影只喺冷笑著。

僵持咗片刻, 我皺了皺眉頭, 再講, 「我哋走投無路, 警署又鎖咗閘, 所以先打算入黎公屋避一避。」 我慢慢企起身, 而眼前嘅身影亦逐漸變得清楚。

眼前嘅人只有25左右出頭, 睇上去比我同海晴嘅年紀都大。 佢染咗一頭啡金髮, 髮型同張敬軒差唔多, 前面有堆陰左右後邊剷青咁樣。 佢雙耳穿左耳還, 手臂前面有個英文字嘅紋身。 佢生得幾高, 至少有米八, 衣著比較斯文, 淺藍色嘅恤衫同埋卡其色長褲, 突顯佢修長嘅身型。

「我叫程樂軒, 我都係要入去差館, 我都可以帶埋你哋入去。」

身後嘅鐵閘再次傳黎喪屍嘅吼叫聲, 仲有密集嘅拍打聲! 但並無喪屍狗般嘅力量同速度, 佢哋無可能撞到入黎。

人影並無未多講, 拎起佢嘅袋同槍, 就轉身消失喺我哋眼中, 佢好快咁穿越喺公屋嘅通道中, 帶領我哋時快時慢咁行動, 儘量避開路途中嘅喪屍, 兜兜轉轉, 十幾分鍾後, 一塊香港區旗緩緩喺旗桿上飄揚, 喺有一啲陰天下籠罩嘅建築物出現喺我哋眾人面前。 這座建築物, 就係連接住香港交通警察嘅核心, madam所提過嘅西九龍交通行動基地。

我哋再次出現喺警署嘅正門, 灰色嘅牆壁寫上黑色大字, 西九龍交通行動基地, 軒少直接行入去推開鐵閘, 我同海晴都入埋去後, 身後嘅鐵閘亦緩緩關上同鎖好。 一入到去, 我哋身處喺停車埸, 周圍都有好多警車喺到。
此時左邊突然傳黎一把熟悉而陌生嘅低沈有力沙啞聲音。





「係你哋?」

係權哥! 我呆咗一呆, 之後興奮地向佢打招呼!

「權哥!」  左邊大樓下行黎三個身影, 係權哥、 呀豪同Coco姐!

「吓... 光頭權?」 「你係... 軒少?」   權哥同呀軒嘅聲音同時響起。

「權哥, 叫我軒仔得啦。」 被稱為軒少嘅程樂軒微笑回答。

「你哋兩個都無事呀!」 Coco姐興奮咁跑過黎擁抱我同海晴, 我同呀豪揮揮手, 佢都同我打聲招呼, 「無事嗎你兩個?」

「係呀我哋無事! 」 海晴抱住Coco姐, 身體少少顫抖咁講。 我都好開心, 經歷咗咁多事, 我哋終於到一個安全嘅地方, 我哋呢幾個火車乘客終於再度重聚!

「呢位係...?」 Coco姐目光留喺軒少身上, 軒少卻望向權哥。 我見到咁就問,





「你哋兩個識架?」 我好奇咁問權哥同... 軒少。

「係, 我哋係同事黎嘅。」 軒少笑瞇瞇咁搭向權哥膊頭, 權哥睥咗佢一眼就唔理佢。

「哦... 咁依家我哋入去搵地方休息下先啦, 你哋好似受咗好多傷。」 Coco姐望向我同海晴, 見到我隻手之後輕輕尖叫, 「你隻手好傷喎! 我哋快啲入去睇下有無急救箱!」

「係囉... 呀帆呢?」 呀豪默默咁問我哋。 我望向海晴, 佢只係繼續同Coco姐講野, 好似聽唔到呀豪嘅問題一樣。

「件事一匹布咁長... 我哋入去再慢慢講啦。」 呀豪點點頭, 權哥同軒少就並肩而行, 帶頭行入警署。

「權哥, 你嘅!」 軒少喺袋入面拎咗把左輪手槍掉被權哥, 「我喺出面執返黎。」

「哼, 行啦。」 權哥好似好頂唔順軒少咁, 但都收下手槍, 雙手舉起手槍一步一步向方前進, 而軒少都舉起把長槍步槍嘅物體, 我實在對槍械唔熟, 只知道軒少把槍應該唔係正常人有嘅槍, 至少警察大多都係用手槍。
突然, 大樓入面傳黎一聲槍聲。





「呯!」

只有槍聲, 無子彈飛出黎。

「錚!」

大樓入面再有一聲金屬嘅撞擊聲。

「小心!」 權哥低聲提醒, 我哋馬上躲喺一架警車身後, 但軒少卻自己走開。

軒少無先兆哋踏出一大步, 驟然加速, 雖然係無規律嘅變向跑, 但是速度依然快得令人驚訝。 轉眼間, 佢就衝咗入去大樓, 權哥馬上跟去, 我同呀豪佢哋都馬上跟緊衝入去。 好快軒少停低, 好似搵到槍聲嘅來源, 然後一面沉重咁企喺一間房間出面。

我哋身處於一座猶如廢棄嘅六層警署入面, 即使喺依加黎講都係屬於比較舊式嘅建築風格, 最明顯的特徵便是樓層空曠又大, 天花板天高, 每隻窗都唔大而且數量少, 但理應並不影響光透射入黎。 呢一層就有一個接待處, 我哋經過之後行入去, 內裡猶如一個辦公室一樣, 有寫字樓啲台咁, 周圍兩邊有幾間房間。





後來呢到唔知道被改做成咩用途, 大部分嘅窗戶都用木板封閉起來, 留下一兩扇對停車埸嘅狹小窗戶令到成層變得非常陰暗, 即使依加陽光普照但我哋都要用電筒先可以喺呢到行走。

入面幾乎無任何桌椅, 顯得格外空曠, 對面嘅牆壁上痴住一大堆血肉, 並且係到滴緊向。 一隻喪屍半邊胸口同整個手臂都消失咗,  未死透嘅佢喺地上面默默哀叫。 地面上印住一個空嘅彈殼, 旁邊則係一地散亂嘅文件同金屬架。 地板上仲嵌住另一粒子彈, 上面有啲烈開嘅痕跡。

 彈頭上仲痴住不知係人定喪屍嘅血同碎肉塊。 睇落好似射穿咗喪屍, 令到子彈痴上喪屍嘅骨同血, 喪屍見到我哋幾個活人, 所以不停咁敲打金屬架, 結果發出咗錚錚聲。 喺地板上面掙扎緊想撲黎嘅就係槍聲來源?
此時上方樓層隱約再傳黎一下沉悶嘅槍聲, 猶如積鬱般嘅行雷聲, 打破寂靜。

幾乎喺槍聲入耳嘅同時, 權哥同軒少已經各自做出閃避動作, 而我哋則尚未反應過黎, 只有Coco姐勉強叫咗一聲扒低提到我哋扒低。 良久過後都喺無事發生, 軒少同我哋講, 「再搵! 小心啲!」

現時嘅軒少已經無左一開始從容優雅並且略帶輕挑傲俊嘅態度, 雙眼深陷, 金啡發凌亂不堪, 並且髮膠都一舊舊咁痴喺頭上面。 個件已經巢曬又有少少破爛嘅恤衫西褲更係非常骯髒, 完全睇唔出原本嘅顏色同款式。 而呀豪同Coco姐都係咁攰, 我同海晴更加狼狽不堪。

好多時我都係到懷疑, 上面究竟有無人開槍, 究竟係咪因為有喪屍而開槍, 為咗打喪屍自保開槍嘅話點解可以咁耐路上都無一隻喪屍, 我哋搵咗兩層, 幾乎係每一間房都搵曬。 只係每隔幾間房就可以見到有啲櫈被撞跌, 甚至是一個子彈孔, 重新比左我哋警署入面有人嘅信心。

權哥稍好一些,穩重嘅臉上儘管滿係倦色, 但眼神中仍係充滿咗狠勁。 除了佢自己之外, 無人知道這一路上佢為咗我哋安全想搵出槍手所承受嘅壓力。

我腦中又係一陣劇痛襲來, 我收返目光, 雙手捧住頭, 左腳係到微微顫抖抽筋著。 過咗大約半分鐘左右, 左腳嘅抽筋先慢慢停落黎。 熱騰騰嘅鮮血順住我嘅手、 我嘅腳流落去, 背上都有擦傷, 血流入衫裡面, 痴住好唔舒服。我靠係牆上, 緩慢咁呼吸住, 每一下都用力咁吸氣同呼氣, 希望可以減少感受到嘅痛楚。 我唔能夠再進行任何劇烈嘅運動, 因為全身上下都受傷, 就算最微小嘅運動都可能引來無盡嘅痛楚。

我眼前一黑, 暈坐喺地上。

「喂你點呀?」 身邊嘅海晴馬上扶起我, 呀豪Coco姐都跑過黎, 「你傷成點呀? 係喎我哋要搵急救箱!」

權哥埋黎望我一眼, 就講, 「你隻手... 你被咬傷?」

我面青口唇白, 面色越黎越差, 無錯... 喪屍咬完喺會被感染! 唔通我都會變喪屍...? 咪住... 切咗手指會唔會有得救...

「係... 我被喪屍咬斷咗手指。」 最後我只可以從實招來。

「你哋照顧住佢先, 我同軒少去搵急救箱, 救咗你再搵槍手。」

「唔該曬。」

權哥轉頭向軒少走入嘅房間走去, 轉頭個陣揮揮手示意唔緊要。

係權哥經過一間房嘅時候, 一個人影突然撲出黎!

一個人影雙手叉住權哥條頸, 而權哥隻左手都叉住來者條頸, 唔比佢去咬自己。 呢個時候權哥右手都叉向喪屍, 雙手拎住對方衫領, 左腳做重心,雙手將喪屍摔係地下!

「啪──唧」

係喪屍跌落地下之際, 權哥右腳跨埋上喪屍到, 直接坐係佢條腰到, 雙腳膝頭頂住喪屍雙手, 再一拳一拳咁揮向喪屍頭部, 一拳一拳打落去。 幾拳之後佢就停手, 喪屍竟然放棄咬權哥? 喪屍無理由會放棄眼前嘅獵物。

「你係咩人?」 權哥質問身下嘅人影。
已有 0 人追稿