《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 後樓梯
「出發啦。」
終於， 出征嘅時刻到了。
轉眼間， 我哋已經到達猶如死亡般嘅入口。
防火門後嘅樓梯口。
「之前已經確認過下面呢幾層都無喪屍， 所以我哋先落到最底層， 然後通過通道穿去A樓， 再落去地庫。」
「有無問題？」
大家無人出聲之後， 陳晉再講， 「好， 依加先由我同呀權行先， 大家保持隊型， 用手勢溝通， 最好唔好出聲， 我哋目的係唔引起感染者注意， 明唔明白？」
「明白。」
「得啦行啦妖。」 軒少邊串佢邊走向隊尾， 我見狀都跟佢行， 隊伍好快就成型。
「呢邊。」 陳晉說罷就帶頭走向防火門， ( 一，二，三) 佢比起手勢， 然後慢慢推開門。
權哥見狀馬上舉起棍， 側身探頭進去。
陳晉揮揮手， 我哋就踏入樓梯。
樓梯間因為電力早已停止， 現在只遺下黑暗一片。 權哥手持電筒， 明亮嘅光線照向下層， 但只仍然只可以見到不出十步嘅距離。
隊伍入面只有權哥同陳晉有電筒， 待我哋全部入去後陳晉就關水門， 走向前頭， 舉起手揮一揮臂， 然後與權哥並肩向下走。
入咗黎之後就連剛才昏暗既太陽光都無法透入無玻璃窗既後樓梯， 而且非常安靜， 甚至可以聽到彼此呼吸聲。
我哋慢慢走落去， 直至去到第二層， 陳晉舉起手並停下。
電筒光源突然消失， 前方海晴則推向後， 我哋不明因由就咁退後上幾級樓梯。
正當我想開口時， 陳晉再打開電筒， 滲出少量光線照住佢面孔， 造出極緩慢嘅口型同舉起兩隻手指， 意思大概喺，
「下面有2個感染者。」
軒少聞言， 舉起手指公喺頸到打橫一劃， 陳晉卻搖搖頭兼舉起雙手打出疑問嘅手勢， 應該係指唔肯定有幾多喪屍， 視線內雖然見到有兩隻喪屍， 但若下層不只兩隻的話， 貿然行動必定會引黎更多喪屍。
！！
軒少突然拍一拍我肩膀， 嚇得我全身震一震， 我回過頭黎望向佢。
軒少舉起兩隻手指指向下， 比劃出一個走佬嘅手勢， 然後用手掩住嘴巴， 再從頸上打橫比劃。
吓？ 佢想講掩住喪屍個嘴殺死佢？
軒少見我無反應， 用口型告訴我一個字。
「刀。」
喔！ 刀！ 我馬上拎出我把刀交比軒少， 軒少接過後就指指自己， 再指指向下。 陳晉還未回應， 佢已悄步向下走去。
權哥見狀卻無阻止軒少， 喺佢經過身旁時同佢一同走落去。
陳晉反應都算快， 佢並無責備軒少， 反而喺補返佢嘅位置， 然後佢揮一揮手， 我同海晴馬上緊追上軒少同權哥。
電筒嘅光源射向下層， 依加我哋正正喺二樓同一樓之間嘅交接平台處， 而兩隻身穿警服嘅喪屍則企喺一樓樓梯嘅出口道門個邊。
光線一射過去就馬上熄滅， 估計應該喺軒少視察環境用。
「呃哼哼哼哼哼──」
「呃哼哼哼哼哼哼哼─」
既然係咁， 即係軒少已經打算下殺手， 無視陳晉擊退喪屍嘅命令。 不過都想像得到， 軒少早已經按照自己嘅意思行動， 完全漠視陳晉嘅指令， 呢刻只係希望佢能夠解決喪屍， 唔會引起大麻煩。
我哋一級一級悄悄向下走， 行到一半就停低咗。
電筒光源再次打開， 權哥已經走上前雙手握棍， 而軒少都手持利刀， 睇黎佢哋諗住直接大開殺戒！
軒少權哥此刻岩岩落完樓梯， 正好企喺一樓嘅樓梯平台處， 我哋面向寫住大大隻1字嘅牆壁， 而左邊則係一樓嘅出口防火門， 旁邊又喺另一條向地下嘅樓梯。
灰白色嘅樓梯間加上喪屍令環境異常恐怖， 但眼前只有兩隻喪屍， 只要能極速解決， 之後我哋只要再落多一層就會到達大樓連接通道。
既然軒少決定直接開殺， 樓下應該再無喪屍。
「呼──」 我輕呼一口氣， 心想有咁可靠嘅同伴， 真係好。
「呃啊啊啊啊啊啊──！！」
「呃啊啊啊啊啊啊啊啊──！！」
兩隻喪屍異口同聲大叫出黎！ 陳晉緊握手電筒喺背後作支援， 只見兩個血紅雙眸嘅喪屍舉起雙手， 不亮嘅電筒光下反映照出佢哋露出黎蒼白同流出黑血嘅皮膚， 加上詭異叫聲， 頓時令我嚇得呆一呆， 恐怖情況就有如哈佬喂嘅鬼屋一樣！
「妖！ 咁都聽到！？」 軒少低聲罵一句，
喪屍帶住滿臉鮮血一前一後吼叫！ 兩三步就直衝過黎！權哥踏出一步， 運用腰力一下棍棒車落去帶頭嘅警員頭上！
「軒！」 權哥低沉叫道， 軒少馬上把握機會弓起右腳， 沉身將刀仔由下向上插上去喪屍頭腦。
但係… 喪屍並無如同想像中哼叫一聲就跌低…
「呃啊啊啊啊啊──！！」
中刀嘅喪屍吼叫著， 雙手抓向軒少， 軒少馬上後退一步， 但卻退避不及只可以出手同喪屍角力， 喪屍不停張合嘅口不停流住血與唾液， 而軒少明顯力量唔夠喪屍大！
痴線嘅喪屍！
「哼！」 權哥馬上再一棍揮向喪屍手臂， 連揮兩棍加上軒少一腳踢開， 喪屍先被踢離開。
「哼呃啊啊啊啊啊啊！！」
喺權哥幫手嘅時候， 另一隻喪屍已經張開雙手抓向權哥， 幸好陳晉一直跑緊過黎， 及時一棍打橫頂住喪屍牙齒！ 同時與喪屍角力！
「你把垃圾刀！」 軒少對我叫罵，
「好明顯你要切斷佢條頸佢先唔識郁啦！ 你插佢下巴有J用咩！」
「權哥！ 你用滅火筒耡爆喪屍個頭啦！」 我遞出去交比權哥， 佢馬上接過， 並將警棍交比我，
「喂去幫陳sir呀！」 手無武器嘅海晴只能夠手持電筒， 同時緊張向陳晉方向叫道。
「妖！」 軒少聽罷馬上跨出兩步， 一下警棍揮落去喪屍頭部， 喪屍正好企喺向下層嘅樓梯處， 「踢佢落去！」
陳晉馬上出腳， 呯嘅一聲加上軒少個棍， 喪屍一時失足跌咗落樓梯。
同時權哥舉起滅火筒， 用底部推向剛才喺我哋旁邊嘅喪屍到牆邊， 「細路用警棍行住佢條頸！」
我聽到之後即刻跑上去！ 打橫警棍卡住喪屍條頸， 即使我就喺佢面前， 佢亦暫時咬我唔到。 不過喪屍嘅力氣真係好大！ 我估計好快就會推得開我！ 而依加喪屍嘅雙手亦用力捉向我！
「dup低頭！」 聽到聲音後我馬上低下頭， 剛好感覺到頭上傳黎一陣風， 權哥岩岩好用滅火筒撞向喪屍個頭！
撞多兩下之後， 喪屍就垂低雙手， 郁都唔再郁， 慢慢倒下並喺牆上畫下一條血紅軌跡。 喪屍成個頭部被撞至凹陷， 權哥力氣之大直程將整個喪屍頭顱都撞爆， 但仲未仔細研究， 喪屍嘅叫聲再度喺左邊傳黎。
見到喪屍終於死透之後， 我馬上喺佢頭部拎返把刀出黎， 同時望向左邊。
「吼啊啊啊啊啊啊！！！！！」
海晴將電筒光照向左邊， 軒少同陳晉仍然同喪屍搏鬥緊， 喪屍被落樓梯後， 陳晉連跳幾級樓梯一下踩上去喪屍身上， 令佢動彈不得。
我只見到陳晉嘅背影吃力地壓向喪屍， 混亂間唔知道發生咗咩事！
出於本能， 我拎住手中痴住濕潤血液嘅刀， 大步跑落樓梯！
落到去陳晉所在嘅個一級， 見到佢正用雙腳踏住喪屍雙手， 雙手用警棍頂實喪屍口腔， 正用力插入去， 暫時喪屍都唔會咬到佢。
「吼啊啊啊啊！！！」
我將手上嘅刀插入喪屍條頸到， 用力打橫切入去！
「吼嗚啊哼啊啊──」
不停拉不停插不停拉不停插不停拉！
「唰啦──」 「唰啦──」 「唰啦──」 「唰啦──」 「唰啦──」 「唰啦──」
血液不停流出黎， 與我持刀嘅雙手混為一體。 雙手接觸到血， 令我有一瞬間想縮開雙手。
「吼啊啊啊！！」 但喪屍不停吼叫， 使我雙手無停落黎。
剎那間， 我腦海好似一片空白， 只想繼續喺佢身上拉動刀面。
「嗄─嗄──……」 雙手開始攰， 警察喪屍都唔再郁。
我將刀抹喺喪屍嘅警察服， 再抹乾埋我雙手。
陳晉喺我旁邊用力壓住男警喪屍， 滿佈青筋嘅面孔終於停止反應。
剎那間我望向喪屍個樣， 突然覺得喪屍根本就同人類無分別… 呢位年輕男警員直到變成喪屍之前都係到盡忠職守， 可能佢未必係一個好警察， 但係如果佢有得簡， 我相信佢都唔會想變成喪屍。
我都唔知道自己up緊乜， 總之呢一刻我就呆咗喺到， 為喪屍嘅過去而感到少許悲傷。
思緒越飛越遠， 腳步聲卻將我拉回現實。
「落黎！」 陳晉壓低聲音命令仲企喺上面嘅大家， 然後望向樓梯下方， 頭也不回同我講， 「 起身！ 行！」
我站起身， 整理一下衣衫， 就起身回望海晴佢哋。
電筒光不停到處照， 海晴正正拎住佢照向下層。
「劉海晴企返中間！ 軒少同細路帶頭行， 我同呀權後面！ 快！」 陳晉落下命令， 雖然被命令嘅感覺唔太良好， 但我同軒少都走上前排。
整個隊伍入面得兩枝電筒， 一枝喺海晴手中渣住嘅普通電筒仔， 光線唔太強但都算可以照到幾米之內。 另一枝則喺陳晉手上， 佢個枝就比較大枝同強光， 一枝長型電筒， 但此時佢多數無打開。
「海晴照住前面， 見到人影立刻掩燈， 慢慢落去！」 陳晉壓低聲線極小聲道。
我跟住軒少嘅腳步， 循住海晴嘅光一步一步走向下， 幸好前方好快出現平地， 我哋已經落完樓梯！