「手天使的愛情」幫人洩慾，竟愛上盲女。: 31；溫暖的屋企撫平我受挫的心。

我其實好明白有人有殘疾，都會隱瞞，因為唔想俾人睇唔起，唔想要所謂既憐憫。平時我同人你眼望我眼，人地其實已經好易知道我有少少鬥雞，已經令我非常冇自信，而最令我傷心，就連我dup低頭完手機，有人都會覺得我望住佢

唔通我逐個同人解釋我有斜視咩，心口同背脊掛個派牌協寫住「我係弱視+斜視，溫馨提示，如果你被望唔好介意。」？

好在我呢個人，上一秒喊緊，下一秒諗通咗就會笑返，情緒調節能力比較出類拔萃，如果唔係我一定變成男版林黛玉，一日到黑喺度喊喺度怨

屋企係我最後既避難所，喺出面受過幾多屈悶，返到屋企，就會釋懷，見到爹地媽咪又煲湯斬料招呼我，所以我幾時都話，父母係孩子最強既靠山，一d都冇講錯。

我：「最近五金鋪批發埋花膠？又煲花膠湯呀？」

爹地：「你媽咪話你鐘意飲。

」

我：「我夠鐘意佘詩曼啦，幾時整佢黎做我老婆？

」

爹地：「點整？」

我：「按咗層樓，all in 西班牙拎世界杯冠軍，我保證過完暑假，我地全家移民中東，到時我要娶3個老婆，鐘舒漫，佘詩曼，黃婉曼。老豆，你都仲可以整多兩件妾侍，不如一個就叫蝦餃，一個就叫燒賣。

」

媽咪：「衰仔，你想死呀！

」

我：「係lor，你到時可以飛咗老豆，嫁俾中東油王。咁我就發達喇

」

又係一餐笑爆肚既晚餐

今日發生過乜野事，仲重要嗎？

食完飯，打緊FIFA，電話鈴聲就響起。

阿芹：「今日好忙？唔打俾我既？」

我：「係呀，籌備緊紅館棟篤笑

」

阿芹：「棟篤笑？」

我：「呵，今鋪經典lor，我大大話話記咗過百隻gag

等緊人贊助我出show。」

阿芹：「講幾個黎聽下？睇下係咪值得出show。」

我：

「

話說有一日，老鼠A同老鼠B一齊游水，游完大家喺岸上吹水，老鼠A突然拎出張相俾老鼠B睇。

老鼠A：【呢個係我女朋友。】

老鼠B：【車，蝙蝠黎既。】

老鼠A：【屌，你識乜野呀？佢係空姐黎咖。】

」

阿芹：「即係蝙蝠俠，其實係飛天鼠俠？空少俠？」

我：「咦，于永芹小姐反應都幾快下wor