[惡搞無極限] 就係咁，我同幾個豬朋上左大陸獵金: １５４　我有個阿哥

事情發展到咁，我都唔知做Ｄ咩好，阿時興隆就有佢自己係度喊，而我就一直係佢面前望住佢，拎住兩條一樣既鏈。

「妳今年幾多歲？」我問。

「十……十九。」佢答，咁姐係我大佢六年，爸爸走果陣我十二歲，姐係佢果陣六歲。

「妳媽咪呢？」我又問，咦，點解呢Ｄ問題咁似問緊小朋友盪失路咁既。

「佢……佢死左……」佢又喊得好大聲。





頂，問錯問題。

我坐左係佢身邊，然後話：「唔好咁傷心。」

嗱！你地唔好話我用個肺黎講野啊，我諗如果比著你，你可能一句野都講唔到啊，而家咁既情況，我應到兩句已經覺得自己好勁。

佢喊喊下又攬住我，喊住咁話：「我無諗過係呢一個世界上，我仲可以見到一個親人啊。」咁我知點解佢可以喊得咁激動，一個爸爸媽媽已經死左既人，而家無啦啦多左個阿哥，又點會唔激動先得架。

「妳……」等我組織下個問題先，「妳係一早知道有我呢個阿哥存存？」





佢聽到我咁講後，點左點頭話：「係我見到你戴住鏈咀果一刻，我就諗你會唔會係阿哥，到你暈左之後，我拎左你條鏈睇，見到爺爺既字跡，就好肯定你就係阿哥。」

「但點解妳唔一開始就問我？」我問。

「因為碇司令佢係度，唔方便。」原來果個人真係叫碇司令。

「唔方便？」我又問。

「……佢……」佢遲疑左一陣，「……我而家唔講得住。」





「無問題，每個人都有自己既秘密。」我答。

「阿哥你都幾好架ＷＯ。」頭先仲喊緊，而家就係度傻笑，佢一路傻笑，一路又攬過黎話：「原來我真係有個阿哥架。」

我見到落差咁大既時興隆，真係唔知有咩反應，但我都好理性咁同佢講：「其實我明確認你係未我阿妹……」「唔緊要啊，我覺得係未得囉，好野，我有個阿哥。」