[惡搞無極限] 就係咁，我同幾個豬朋上左大陸獵金: １７４　走馬燈（１）

有人講過，係一個人就快死果陣，會見到人生好似走馬燈咁閃過……

咁我而家，係未就係睇緊我自己既人生走馬燈？

「我叫左你黎睇我既運動會！點解你唔黎！」呢個係扭緊計，喊緊既我，我對住阿爸佢發脾他。

「你明明應承左我架！點解你可以咁無口齒！」我不停咁用腳踢我阿爸，而我阿爸最後忍無可忍，一既昇左過黎，「你夠拿下！係未想比我打！」

我成個人呆左，然後就大喊，阿媽見到後就即刻衝左過黎攬住我，喝我阿爸話：「你仲咩咁大力打個仔啊！你癲撚左啊！」





「我係出面已經要睇好多面色！返黎仲要受氣！」阿爸話。

「咁你就可以打人架拿！我地唔係你既出氣袋啊！」阿媽話。

而我見到佢地吵，我喊得仲勁。

「賢仔，你返入房先。」阿媽好溫柔咁講。

我返左入房，然後聽到阿爸同阿媽係出面嘈。





「你係出面點我無所謂！但就唔好係屋企發癲！而家你仲打個仔！有無搞錯！」

「邊個叫佢咁唔識尊重人！」

「咩你好識尊重人咩！又唔見你尊重下我！你係出面搞三搞四我已經唔出聲！你成日唔係香港！你估我唔知你係上面有頭住家！」

「你講咩撚野啊！」

「仲扮野！」我聽到一段搵野既聲，然後阿媽又話：「呢張相我搵到架！個女人仲同你生左個女啊！姐係你送左個妹比賢仔啊！」





「啪！」一聲打巴既聲音後，全屋靜晒，然後我聽到腳步聲慢慢接近間房，開門既係阿媽。

「媽媽……」我望住喊住既阿媽，佢右邊面紅晒，好似係比人打左一巴咁，佢好大力咁攬住左我，然後我聽到一聲好大力既關門既聲音，係阿爸，佢又走左……