[惡搞無極限] 就係咁，我同幾個豬朋上左大陸獵金: １８０　搵到！？

去到另一個市，呢個市都幾熱鬧，好多人下。

「好耐無返過黎呢度。」阿妹落左車，深呼吸左一啖。

呢度同其他市好唔同，無咩霧霾，空氣都好Ｄ，我地幾個都跟住深呼吸一啖，而阿倫同阿輝就話：「呢度真係一個好地方。」

「阿妹，快Ｄ帶我地去你住果度休息下啦。」阿倫，你搵借口都搵個好Ｄ架啦。

阿妹帶我地行過大街小巷，去到一幢兩層既屋前面，「我就係住係呢度。」阿妹話。





前面間屋同我地香港果Ｄ村屋差唔多，幾靚下，阿妹佢係個褲袋搵左條匙開左門後，就叫我地入去。

可能阿妹太耐無返，Ｄ傢俱都佈滿晒塵，「睇黎要清理一下先可以住。」

「咁不如清理左先啦。」我話。

「好啊。」阿輝同阿倫而家講咩佢地都話好架啦，而阿俊就企係一邊，打量呢間屋。

算係咁易清理下後，阿妹就煮左Ｄ野我地食，係食既時侯，阿輝就問：「唔知叔叔留左Ｄ咩比你呢？」佢係問我。





「我點會知。」我答。

「如果係樓都唔錯啊，而家大陸Ｄ樓價都係咁升。」阿輝話。

「想知，問你阿妹未知囉。」阿俊終於講野。

剛剛入左廚房既阿妹出返黎，望住我地幾個問：「咁好傾，傾咩啊？」

「無，我地傾緊叔叔留低左Ｄ咩比你阿哥姐。」阿俊話，但駛唔駛咁直接。





「留低野比阿哥？」阿妹就話。

「例如樓，又或者係金呢？」阿俊又問。

阿妹諗左諗，「哦……有啊，你地等等。」

唔係掛，竟然係咁既情況下就可以見到我地搵得咁辛苦既金！？