[惡搞無極限] 就係咁，我同幾個豬朋上左大陸獵金: １９５　福如東海壽比南山

阿妹做司機，唔駛我講大家都知道會變成點啦，佢依然係好瘋狂既駕駛，而我地幾個仍然係好怕死咁拉野扶，除左阿欣。

佢完住係當左坐過山車一樣既心態，不停係都好興奮咁叫。

到目的地，除左阿欣我地幾個都暈到想嘔咁。

「你地幾個做咩咁既樣啊？」阿欣問。

而阿妹佢一落車，就話：「Ｄ男仔真係好無用，個個男仔坐我車最後都會變成咁，但阿嫂妳無事，妳真係勁。」





「我覺得好好玩啊。」阿欣好開心咁話。

妳地兩個都非同凡響……

當我暈完果陣，望一望四圍，呢個城市同先去過既地方唔用，好發達，好多人，而且好似係度慶祝緊一Ｄ野咁。

「呢度好似開緊ＰＡＲＴＹ咁ＷＯ。」阿欣望住一片紅既旗海話。

「好似係，好熱鬧。」阿妹咐和，而想開口既我最後都無講野，因為我怕一講野就會嘔出黎，我望一望其他兄弟，佢地同我既情況都差唔多。





「Ｄ旗上面好似有Ｄ字。」阿欣望一望旗上面Ｄ字，讀左出黎：「祝方大爺福如東海壽比南山……阿妹，唔知呢個方大爺會唔會就係我要搵果個人。」

「可能係。」阿妹答。

有無咁易啊……唔得……好想嘔……