[惡搞無極限] 就係咁，我同幾個豬朋上左大陸獵金: ２８４　阿俊走左！？

大叔講完佢既說話後，就繼續睇返佢本鹹書，「估唔到大寶最後會搞成咁，怪唔之得佢無理搵過我，我仲以為佢死左。」

「咁點解你唔搵舅父？」阿妹問左一個我好想問既問題。

而大叔就嘆一嘆氣，「當年既決鬥，我輸左，果個人用一件事威脅我，唔比我踏出火焰山半步。」

「關碇司令事？」阿妹問。

「唔關事，同埋件事你地都理唔到，所以唔駛知咁多。」個大叔講完後，望一望大寶，「叫大寶而家既，都有少少ｓａｄ，佢呢份人為左兄分可以兩脅插刀，但果次為勢所迫，為左一件事而幫左碇司令做野，最後搞到而家咁。」





大叔拎左支酒同拎左幾個杯出黎，「果陣仲話下一次見面，要同佢飲返杯，但見到佢而家咁，都係唔好。」佢雖然口講唔好，但都將酒倒左入果幾隻杯度，「不如，你地幾個代佢同我飲杯啦。」

佢講完之後，就拎起左其中一杯酒，而我地幾個對視左一眼，都拎起左酒杯，「我都有份架？」阿欣問，然後大返點一點頭，佢都拎起左其中一杯酒。

碰杯，大叔話：「我聽過碇司令呢個人，佢唔簡單，你地要小心ｄ行事，有咩事既話，火焰山係你地既避風港。」

聽到佢咁講後，我講笑咁話：「咁呢個避風港都幾大風架ｗｏ。」佢地聽到我咁講後，笑左出黎，大叔摸一摸佢鐵扇公主既紋身好似有ｄ感既，而我同阿妹，就望住阿爸留比我地既遺書，心中對搵出阿爸留比我地既野，有更加大既決心。

離開火焰山，我第一個想解決既問題，就係阿俊，究竟，佢呢發生左咩野事，而阿倫同阿輝都話佢同一ｄ未見過既人傾計，唔通果ｄ人係碇司令既人？





白諗都唔係方法，所以我決定返去審問阿俊。

返到去，叫埋阿倫同阿輝黎左我間房，我將所有野話左比佢地兩個聽，佢地就好似名偵探柯南同偵探校園Ｑ上身咁。

「都話阿俊好有可疑架啦。」佢地兩個異口同聲咁講。

「係……我知道，但係佢而家係邊。」我問佢地兩個，但佢地兩個都搖晒頭話唔知。

阿欣就去左阿俊間房，返到黎既時候，佢話：「阿俊間房ｄ野無晒啊，唔知係未比人捉左？」聽到佢咁講後，我地幾個就轉移陣地，去左阿俊間房，一入到去……





「間房咁整齊……無打鬥既痕蹟……」阿倫你點扮都唔似偵探，就唔好再扮落去。

「唔通……呢個係一單密室殺人事件！？」阿輝啊……都無屍體，何來有死人？何來有人被殺？

我望一望間房，與其話阿俊比人捉左，不如話係佢自己走左。

呢個由著草果日陪我行到而家既人，我真係諗唔到佢係邊個時候成為左碇司令既線人，當中一定有不何告人既秘密發生左。