[惡搞無極限] 就係咁，我同幾個豬朋上左大陸獵金: ３３８　我的陰影（３）

身體好似繼續下沉，沉到好辛苦，沉到好似呼吸唔到，直到眼前見到一團白光，呢種白省好詭異，好似將我個人吸入去咁。

眼前既影像重組，見到既係阿爸坐係我同阿媽既面前，佢身後面有好多人，應該係果Ｄ所謂既「兄弟」。

「你地兩個係呢度等我，佢地會睇住你地。」阿爸講左呢一句後，就起身準備走。

但阿媽呢個時候企左起身，走到佢面前，打左佢一巴，「發生左呢Ｄ事，你都唔交待下點解會咁，算，無所謂，你地男人出去做野我地做女人既無權過問，但係你連一句關心既說話都唔講，你唔問我，都問下你個仔，頭先你個仔比人打啊。」

阿媽講到好激動，激動到喊。





而阿爸聽到阿媽既說話後，望左我一眼，然後話：「男人一出世，就要擔起所有責任，做我個仔更加要咁做。」

佢只係講左呢一句就走左。

如果……如果係因為我係男仔，就唔可以得到你既疼愛既話……唔通係我既錯？我唔應該係男仔？

定係……我唔應該選擇做你個仔……但係我有得揀咩？我一出世就只知道，你係我阿爸，無得揀。

咁樣，我係未注定呢一世都唔可以得到你既疼愛？





壓力更加變大，一陣暈眩，一陣嘔吐既感覺，忍唔到，胃既抽搐，嘔吐物直奔我既口中，我嘔左出黎，亦都因為我嘔，我醒返。

係我面前果位男人，又係微笑咁望住我話：「你睇到你忘記左好耐既陰影未？」佢既笑容，好心寒。

我望住佢，又望住現時係佢身邊既阿欣，阿欣佢瑟縮訓係地上面，不停咁苦叫，不停咁喊。

「你對阿欣做左Ｄ咩野？」我問個男人，而個男人就話：「每個人，都有權利知道自己最陰暗既一面，佢而家只係回憶返姐。」

點解？點解呢個男人可以講得咁理所當然。