[惡搞無極限] 就係咁，我同幾個豬朋上左大陸獵金: ３９８　功成身退既ＥＥＹＯＲＥ

我行左出衣櫃外面，然後伸出手遞去阿妹既面前，「我扶妳出黎，有我係度，妳唔駛驚。」

起初阿妹佢都係有Ｄ驚，佢伸隻手出黎都抗拒緊，但係當我捉住佢隻手果一刻，佢用一個信任既眼神望住我問：「出面真係無事？」

我點一點頭，我無可能令到阿妹呢一種對我信任既眼神都無左，慢慢咁拉佢出黎。

佢抱緊ＥＥＹＯＲＥ既手鬆開左，然後跳左出黎，我接住左佢，佢另一隻手仍然緊緊地捉實果兩條鏈。

佢一出到黎就望一望四圍，望左好幾個圈後先將緊握我既手慢慢放鬆，然後佢再望一望佢身後面，仍然係衣櫃入面既ＥＥＹＯＲＥ講左句：「多謝你咁多年陪住我啊。」





呢一句，就好似放下心頭大石一樣。

然而，一陣壓力湧至，我個頭好痛，「你點解要分開我地！！！」我腦入面不停係呢一句說話，而阿妹見到我好痛苦咁，就問：「阿哥，你咩事啊？」

可能佢聽唔到我所聽到既野，個把聲慢慢接近，而我就同阿妹講：「妳走先，阿哥一陣就追上黎。」

然後，我面前所有野都扭曲晒，唔見左仲係好細個既阿妹，唔見左個衣櫃，個空間再唔係白色，而係全黑。

我望到有個人影慢慢行過黎，直到去到我面前，我先見到果個人，原來係著住ＥＥＹＯＲＥ衫既阿妹。





「你真係可以保護到佢？」阿妹問，我諗呢個就係佢另一個人格。

「係。」我點一點頭，然後黑色既空間慢慢充滿血紅色以及血既味道，著住ＥＥＹＯＲＥ衫既阿妹話：「我一直都為左保護佢，殺左好多人，其實，我有無做錯？」

佢呢個咁突然既問題，我當下真係諗唔到點答佢，望左佢好一陣先開口：「其實每個人做過既錯事都有好多，有何必咁執著。」

「咁你會唔會原諒一個殺過好多人既阿妹？」佢又問。

而呢一個問題，我諗都無諗就回答：「會，因為我地係一家人。」





著住ＥＥＹＯＲＥ衫既阿妹慢慢將佢笠住自己個頭既ＥＥＹＯＲＥ帽退左落黎，雙眼流晒淚咁話：「我等左呢一句好耐，多謝你，阿哥，我終於功成身退。」

佢行左上前抱住我，而我感受到既，係阿妹既悲傷慢慢流走，以及，佢所帶比我既溫暖，呢一種暖，係幸福既感覺。

然後，我就好似眼前一黑，感受到一種力向我扯高，跟住，我就發覺我兩邊面好痛，好似比人大巴大巴咁大緊一樣。

「快Ｄ醒啊，阿哥。」我聽到阿妹既聲音。

「快Ｄ醒啊，阿賢。」我聽到阿欣既聲音。

然後，我張開眼睛，望住呢兩個女人一左一右坐係我身邊大巴大巴咁打緊我，「……小姐，下次可唔可以搵個好Ｄ既方法叫醒我。」

阿妹聽到後笑住話：「呢個方法幾好啊。」

而阿欣就話：「係啊，呢個方法好好玩啊。」





我聽到佢地咁講，無奈咁笑左出黎。