〈是咁的，我是一個童貞魔法師〉: <純愛>

我無出聲回應，只係偷偷咁望咗個壽司師傅一下。

金翅仆街鳥…佢臉色仲黑過塊海苔，我都係拿拿聲埋單走人。

今餐兩位加埋要成三千，簽卡果時我個心赤咗一下，不過再望下Sally係facebook係咁上載啲野食相同埋自拍，我即時覺得抵返晒。

出到餐廳後我第一時間係佢facebook比晒心心啲相度之後留言話：

「好多謝你能夠陪我分享咁美味既壽司呀！哈哈！」





點知係度睇緊like數既佢一睇到段留言，佢馬上擰轉臉問我：

「你做乜係我facebook講啲咁既野？」

「我…咁…咁我地真係食得好開心嘛！」

「唔準講！同我刪咗佢！宜家！即刻！」

「係…」





我默默咁刪除咗我段留言，Sally佢都係想保留佢係眾人眼中既清純形象，佢無錯既。而且佢facebook一直都係得自己或同埋女性朋友既合照，佢咁激動都好正常啫？

反正我留底既心心仲係度，哈哈！

我同Sally點識？我其實識咗佢六年架喇。當年某日我請咗假係自修室度參考緊啲專業試既資料，遇到準備考dse既佢。咁岩佢又讀會計，而又坐我旁邊。咁岩又比我聽到佢同同學細細聲講電話，又咁岩佢同學放佢飛機無黎，更岩既係佢提到有好多野唔識，於是我膽粗粗咁主動同佢講可以教佢，我仲清楚記得當年既情境。

「你好呀！你好似有啲關於會計既問題喎，我可以幫到你架！」

「呃…唔使喇，我自己睇下參透下得架喇。」





「唔使怕喎！我唔係幫人補習果啲。當年會考我會計都拎A架！A-Level時都係！」

「呃…咁…咁好啦…」

經過果日之後，Sally發現咗我既過人之處，就係好識教人，係我教導之下最後成功入到大學入讀商科，間中都有向我請教。我諗我有讀phd之後做教授呢個諗法，唔多唔少都受到佢畀我既啟發。

咩話？識咗六年黎有咩進展？

其實我都想同佢有進一步發展架。係佢入咗大學後，基本上已經少咗同我聯絡，有時都係出黎幫下佢做assignment，考試前幫手指點下佢比下意見咁。想約佢時佢又話學習壓力大，想專心讀好書。我明架，所以一直等佢，直到佢畢業為止。

到佢畢業喇，佢又開始煩就業既問題，開頭果時佢都有搵我問下意見。到佢後尾搵到份工之後就開始忙，全身投入工作，放親假都係休息同瞓覺多。有時攰到連我whatsapp都睇，我甚至慣咗見到藍剔就已經安心，證明佢無事。

年年大時大節果幾日我永遠搵佢唔到，睇怕佢都係爭取緊時間休息唔得閒理我，我明架。佢份工真係好忙﹐一早返工要到夜晚九﹑十點收工都係平常事，星期六日仲成日要佢返工加班。佢做咩工咁辛苦？係咪好高人工？

佢其實只係係間細公司做個船務文員，咁岩有個唔好既老闆，同埋一班唔好既同事，咩都比晒佢做。而佢由於想儲夠經驗先搵工，所以先忍落去。你知啦，香港啲HR一見到你成日轉工就會話你地唔識珍惜工作機會﹐唔會係一個可靠既員工。身受其害既我好明白佢既處境架！





見佢工作咁辛苦，我一直都想接下佢放工或買飯比佢食，但係一直以黎佢都好貼心咁話唔好﹑唔使，話我地住同工作既距離都遠，怕我又夜又辛苦，我真係好感動。

直至我上年同佢講我再去讀個Master，到之後話教授推薦我讀埋phd有望做下助教，佢就開始擔心我同時兼顧事業同學業會太辛苦會頂唔順，雖然一樣無見過面，但佢間中會同我打下氣。平均一兩個月左右收到佢一句半句「加油」已經令我充滿動力。

上個月我出晒成績，拎住接近4.0既GPA確定順利入讀phd之際，我無忘記同佢報喜訊，而佢亦終於答應抽時間出黎同我食餐飯慶祝。

「好喇，我要返屋企喇。」Sally一邊回覆佢facebook上面啲留言一邊同我講。

「咁我送你返去啦！」我最期待的…

「唔使喇，我自己返去得喇。大家聽日都要返工，我唔想你辛苦。」佢秒回。

「但係…」





「你唔係唔明白我一片苦心呀？」佢頭也不回咁打斷我。

「咁好啦，你小心返屋企喇！返到屋企whatsapp我呀！」

我將「我地咁耐無見」呢幾隻字吞咗落肚，而佢亦好似以前一樣咁，目送我遠遠離去，先再消失於人群中。

佢係關心我既。

係呢個時候，我突然諗起我死黨阿賤既一番說話，佢話Sally根本就唔鍾意我，一切都只係我一廂情願。

挑！純愛既野，佢識條鐵咩！



更何況，佢都係一個黑魔法師…