翌日,我和Irene來到學校,便跟雷少和冰冰說明現時的情況。
之後,冰冰和Irene馬上去和林副校商量!
幸好,學校剛好需要向全體同學派發通告,所以林副校很快便答應幫助我們,只是有一個條件……
 
放學後,我、雷少、冰冰和Irene來到副校的房間,先把通告搬到課室。
 
「哇,呢度就係D通告啦?加埋成千張,林副校仲要我地畫完符之後,再接返張顏色紙遮返住佢!呢鋪真係俾佢玩死!三個人畫符,三個人貼紙,今晚仲駛訓嘅?」我看著眼前的通告,無奈的說。
 
「算啦,林副校都有佢嘅考慮架嘛!雖然係隱形墨水,但如果有學生或者家長唔小心睇到個符咒,肯定有好多人投訴,到時就麻煩架啦!林副校肯幫手都算係咁架啦!」冰冰說。
 




「咪係囉,講咁多野!你不如擔心下黃大一幾時復活好過啦!」Irene說。
 
「係喎,講起黃大一,你地今日有無發現D咩唔妥咁呀?」我說。
 
「我朝早返黎果陣,已經見到入口果度D相又開始係度郁黎郁去!我用符咒驅散左佢地,聽日會返黎再睇下有無古怪!」Irene說。
 
「我都有遇到,今日晏晝上樓梯果陣,忽然D人唔見晒,仲見到樓梯上下變到好似黑洞咁!好彩你地俾定D符我,我照你地講,點著左張符,掟去前面,條樓梯就變返正常!但變返正常果陣,有D老師問我掟左D咩出去,點解掟完消失左,我就求其話佢眼花睇錯!」雷少說。
 
「邊個教你掟道符出去?」Irene說。
 




「子鋒囉,佢話咁樣先有效!」雷少說,然後Irene怒視著我。
 
「咩者,咁樣型D呀嘛!唉,得啦得啦,雷少你下次唔駛掟道符出去,你點著左之後,其實拎係手等佢燒晒就得架啦!道符有靈力係度,好快會完全咁燒晒,唔會燒傷你!」我說。
 
「你真係打得少!陣間搞大件事,林副校唔俾我地搞D通告就大鑊!」Irene怒道。
 
「得啦得啦!我都有遇到怪事,今日去小食部買野飲果陣,又係部野飲機度發現D手手腳腳!又搞到我唔敢飲罐汽水,前後係呢間學校蝕左兩罐汽水俾佢啦!喂,唔好浪費,你地想唔想飲,請你地飲。」我從背包裏拿出一罐可樂,示意送給他們,卻沒有人接受我的好意!
 
「冰冰呢,雖然今日大部份時間我都係你身邊,但有無遇到D咩呀?」Irene無視了我,詢問冰冰。
 




「我就無啦,不過隔離班有個女仔,聽講去去下廁所嚇暈左!我去到嘅時候,就無見到廁所有野啦!」冰冰說。
 
「咁個女仔點呀?」我問。
 
「個女仔醒返之後好似話自己有幻覺,話自己係廁所聽到D怪聲!不過佢就話自己可能係唔夠訓,當無事咁就走左啦!」冰冰說。
 
「估唔到,真係連一般學生都搞!」我咬牙切齒的道。
 
「咁我地仲等咩呀?快D去Irene屋企畫埋D符啦!如果唔係愈黎愈多學生中招架啦!」雷少說。
 
「唔走得住,因為依家唔可以展開結界,我同Irene要留守係學校,等到學校閂門先走得!好彩Irene同D校工熟,俾晒D符佢地袋係身,先唔驚佢地夜晚係學校會撞鬼!」我說。
 
「雷少同冰冰,你地可以幫手搬D通告去我屋企先,跟住今晚七點再係我屋企集合,幫手處理D通告!你地要小心D,因為校內校外都未必安全,我地每三十分鐘互相SMS大家,話俾大家知身處嘅地方!同埋即將會去嘅地方!咁就算真係有事,我地都有線索去搵返大家!」Irene說。
 
「好,咁我地去你屋企等你地啦!」冰冰說。




 
他們兩人離開後,我和Irene像保安般,在學校巡邏著。
「喂,我地要係度行到幾時?」我說。
 
「行到D人走晒為止囉,做咩呀?唔想行呀?」Irene說。
 
「唔係,不過每層樓咁行,好似好白痴者!其實你會唔會好似天命叔咁,係房都可以感應到佢地?」我實在不想繼續在校內像保安般巡邏著。
 
「唔得呀!唔好煩啦你!你唔想行你自己走先,我自己搞掂得啦!」Irene說完後,便不耐煩地走開了。
 
「喂,唔駛咁惡喎,一齊行囉!喂,等埋呀?」我在後面跑著追了上去,殊不知在高處傳來了叫喊聲!
 
「子鋒!上面!」Irene說完後,馬上向上奔跑。
 
「你去四樓,我去五樓!」我說。




 
然後,我跑到五樓時,看見那有一個女同學向我飛奔過來。
「有……有鬼呀!」大慨是看到我後,感到安心,她一下子昏了過去。
 
我把她扶到其中一間課室,讓她坐好,然後循著那微弱的靈力,走到女廁那裏!
只見Irene從女廁中走了出來!
 
「搞掂啦!又係上次果隻女鬼,不過明顯地,今次隻女鬼力量強左好多!我都要用埋符咒先可以趕走佢!」Irene對我說。
 
「無事就好,我地去課室先,頭先個女仔暈左,要你幫手送佢落去醫療室!」我跟Irene走向那課室。
 
我們距離課室大慨還有十步距離,卻不期然感到一陣寒氣,我倆相對而望,馬上加也速度來到課室!
 
「哇,搞咩呀?開Party呀?」我看著課室內,驚訝地說著。
 




只見課室內,我看見每一寸地方,也有一具又一具的屍體在天花板垂吊著!
這次的情況比上次還恐怖,那些屍體除了全身腐爛,滲出血水外!
 
它們還強行把頭部和身體分離,結果,整個課室大慨有三十具屍體,它們的頭部仍然懸掛在繩子上。
身體因脫離了頭部,全都倒在地上!
 
那些身體,慢慢的掙扎著站了起來!
然後全部衝向我和Irene!
 
三十具無頭屍體,帶著血水和腐臭,向我們襲來!
「找死!」我和Irene分別拿出符咒,而強勁的雷電把這些無頭屍體全部消滅掉!
 
然後,我們發現,雖然所有身體都消失了。
但那些懸掛在繩子上的頭部,發出一些古怪的叫聲。
然後全部掉在地上,向我們滾了過來。




 
在那些頭部滾過來的途中,只見他們的腦漿,在地板上留有鮮明的痕跡,既黃且濁的液體,在腐蝕著地板。
 
Irene像看不見那些腦漿似的,雙腳踏進了課室裏,口中念念有詞,使整個課室發出白色的光芒,課室總算回復了平靜。
 
「你做咩黎?」我問。
 
「淨化用嘅咒語,呢D靈體已經俾我地弱化左好多!所以我嘗試淨化佢地,應該成功左!」Irene疲倦地回答,看來這咒語應該頗為消耗體力!
 
「好在個女仔仲暈緊,如果唔係嚇死都似!好啦,等我扶你同個女仔落醫療室抖下啦!」我說。
 
「吓,我唔駛休息!送完個女仔落去我再同你巡邏!」Irene說。
 
「唔駛啦,你留係醫療室照顧呢個女仔啦,我一個人巡邏得啦!」我這樣說,只希望Irene能好好休息一下。
 
然後,我便在學校來回巡邏了好幾次!
直到學校關門,我才和Irene一起回家!
 
我們一行六人又聚集在Irene家裏,各自趕工!
 
「哇屌,總算搞掂晒!攰到呢!」我說。
 
「我都係,攰到呢,總算走得啦!」雷少說。
 
「大家等等先,我有個好消息話俾大家知!」天賜說。
 
「好消息?你同阿詩結婚啦?恭喜晒喎!」我說,然後馬上給眾人暴打一頓,阿詩則在一旁臉紅紅的看著。
 
「好,大家唔駛理佢!我個好消息係,我老豆星期五會返到黎香港!佢已經準備好晒所有道具,到時會係學校做場法事,捉走黃大一!」天賜高興的說。
 
「係咪堅架?如果係嘅話掂晒啦,捱多四日就搞掂!」我說。
 
「天命叔真係咁堅?」雷少問。
 
「個維園阿叔緊係堅啦,話晒我呢個天才都要佢教我野!總之大家放心得啦,一齊落去食牛雜慶祝!」我說。
 
我們隨後各自回家,在離開的途中,我問了天賜關於小詠的問題。
他說天命叔並沒有提及小詠的事情,我也只好專注於眼前的事,解決這件事後才再問清楚天命叔吧!
 
翌日,我們把通告交給林副校,全學校的學生都收到了,星期五才把通告交回學校,相信,這樣可以保他們平安吧!
 
說也奇怪,接下來的數天,表面上也沒有太奇怪的事情發生!
只是偶然有些不思議事件出現,我們也很順利的解決了!
 
這情況,一直維持到星期四的晚上,才出現了一些變化!