今晚,我走唔出呢間醫院: 第一章:撞見

「我都話唔關Anna事咯,你要我講幾多次你先信我啫?」
「咁你點解釋頭先既事呀?停車啊!我要落車!」
「喂!你唔好亂來啊!前面啊!啊...」
就係咁,我同我老婆就撞左車入左醫院,奇蹟既係我乜事都無,而我老婆係度急救緊。可能我撞親個頭,我完全醒唔起點入來醫院,或者等我老婆急救完先叫醫生檢查喇。過左陣,外父外母到左醫院,但又醒唔起有聯絡佢地,睇來我撞車撞到斷晒片。禁啱老婆急救完推緊出來...
「阿晴!醫生!我個女無事呀?」外母好擔心咁問醫生。
「病人傷得好嚴重,須要做手術,你地係病人家屬呀?麻煩依邊登記。」
外父外母登記完,就係手術室外面同我一齊等手術完...
「點解咁架?老公呀,阿晴會無事喎?」
「無事既!阿晴吉人自有天相,無事既...」
外父不斷安慰外母,而我就係手術室門外行來行去。我同外父外母關係一向都唔好,所以我地都無講過野,而且搞到咁我都有責任,我都唔知講咩好。突然手術燈熄左,門亦打開,護士推阿晴出來,而醫生跟住出來。


「醫生,我個女點呀?」外母搶住問醫生。
「雖然病人手術成功,但都未渡過危險期,將會送病人去深切治療室留院觀察。」
「咁我個女幾時醒呀?」
「病人短期內都唔會醒住...」
「概然係咁你地返去先,我留係度,有消息立即通知你地!」佢地好似聽唔到我講野咁,直到外父出聲佢地先離開。
當佢地離開後,我正想睇錶時,咦?唔通撞車果時整唔見?電話又唔見,搞到我而家都唔知幾點。正當我諗緊返唔返屋企先既時候,有把聲突係後面傳來...
「係你喇!你呀!」把聲來自一個大約二十零歲既女人,仲用手指指住我...
「係同你講呀,唔好左望右望!你個Hi Hi,點揸車嫁你?差啲俾你毀容,嫁唔出你要賠返俾我呀!」
「賠咩賠?你個尊容有人要都偷笑喇!」我心諗...
「你認錯人呀!」


「咩認錯呀?我同你一齊入來既!成嫁車兜口兜面撞埋來...」
佢一輪咀咁講,我都無心機聽落去,不過佢講「毀容」「嫁唔出」,卻令我諗返起中學果時同阿晴第一次講野果時...
「喂!好痛呀!行路小心啲喇,成個人撞埋來,差啲毀容,嫁唔出搵你要啊!」
果時我追緊另一個同學,點知煞唔切掣成個撞埋去...
「Sorry!無事嘛?」
果時中三,雖然同班三年,但都無機會單獨傾計,而且阿晴個外表係四眼,洗衫板,短頭髮,個樣有啲似男仔,基本上你係男仔都未必望得上個隻...
「痴線!嘩!好痛,損左,毀容!你死喇你!」
「使唔使咁誇張呀?」我心諗,要你果都短幾年命啦...
之後果年中三,我地就好似電視劇啲冤家咁大家互串,我笑佢飛機場,佢笑我咸濕仔(事源當年我係商場買咸碟時被佢撞到),果時所有同學都認定我地係冤家多過係同學。但估唔到,最後要佢既竟然係我...
「做咩呀你?定晒既?諗野呀?」我返到現實,見到頭先個女仔食緊餅乾...


「算喇!你咁慘,唔使你賠喇!我叫Lily呀!你食唔食呀?」
「我唔肚餓。你叫我阿祖得喇...」細望Lily,其實樣子唔差,打扮下都應該幾靓,而我又不禁諗起阿晴...