之後佢同迪迪仔係度有講有笑,而我默默咁坐係度,聽住佢地閒談。
 
我連自己早餐都未買,好鬼肚餓呀我。但我唔想錯失呢個機會同女神相處既機會。
 
但我又邊敢撩女神傾偈先得架,依家連呼吸都覺得急促。平時會用口加埋鼻黎呼吸,依家個口完全唔敢大大口吸氣,所以依家呼吸都好困難,加上心跳得快,成個人好唔自在。
 
我望住女神纖幼既手,雪肤花貌般的皮膚,我忍唔住偷睇佢幾眼,我無法同婷婷直視,我視線會唔知放係邊好,我自己都未試過正正經經望住一個女仔講野超過5分鐘。
 
唔知點解,我好享受呢種偷偷摸摸既感受,自在得黎,又滿足自己想要既野。
 


突如其來,「唔好意思,我走先啦,我地遲下再傾啦。」婷婷佢忽然間似陣風咁話走就走。
 
「bye,迪迪仔,雄仔。」佢未及我地反應過黎,就走左去。
 
其實佢只係去隔離枱搵其他男仔……
 
真係多男仔,佢身邊咁多仔,同我傾到偈已經好好。
 
一波又一波既失落感係我入面四處蔓延,侵蝕緊我大腦。身旁專屬佢既香氣,伴隨婷婷既離去,呢一陣香味亦都消失不見。
 


「喂!」迪迪仔嗌一嗌我,我無精打彩咁答佢一句,「嗯?」
 
「嗌左你幾次都唔應人。」佢係我眼前揮一揮手,「你鐘意人都鐘意得太明顯啦掛?」迪迪仔取笑我。
 
「下?乜有咩?」乜真係咁明顯咩?
 
「你紅都面曬咁,手震震,講野唔清唔楚咁,同平時都唔一樣,一睇就知你想點啦。」佢一語中的。
 
「我去買野食先,好肚餓。」我求其搵個藉口就走左去。
 


我心不在焉咁求其買左啲野返黎食。「係呢,你平時唔係同你隔離果個西西行得好埋既咩?」我投機取巧咁轉一轉話題。
 
「佢屋企有事,唔係度兩個禮拜。」佢有點心灰意冷。
 
「係呢迪迪仔,可唔可以幫我做一樣野呀?」我好認真咁講,呢樣真係好重要。
 
「咩事呀?!」佢求其hea我。
 
「幫我拎婷婷既MSN!」

「哇!你估拎佢MSN咁易呀?」迪迪仔一陣驚訝。
 
「唔該你呀,你同佢咁好傾,實有方法既。」我苦苦哀求佢。
 
「嗯……」佢托一托頭,思索中。


 
我頂唔順佢要諗,我想佢快啲應承,一急起上黎就咩都唔理。
 
「最多咁啦,你拎到既話,一個月早餐!」我衝口而出。
 
「洗唔洗呀你?為左個MSN?」
 
佢唔明,為左自己心愛既人,付出同犧牲既感覺。如果可以抱得美人歸,付出少少又何妨?
 
「你唔明架啦,一句講曬,要定唔要!」我落下最後通碟。
 
「殺你啦,我盡量幫你拎啦。」
 
「那,咁等你好消息架啦。」呢一單交易順利完成,但跟住落黎要點呢?加左佢要同佢講咩好呢?
 


過左幾日,我夜晚收到迪迪仔傳來震動,「登,登,登。」條友仔好鐘意震鳩我,成日搵我都係震左我先。
 
 
我拎到啦
 
快!
 
[email protected]
 
唔該曬
 
唔好走數呀
 
得啦  之後提下我

已有 0 人追稿