Welcome To Knot ~ Season1: #52. 靖

今日早咗少少返咗Silence。
因為我約咗個人上嚟傾下嘢。
經過琴晚嘅了解，我覺得我同佢可以再進多一步。
 
傍晚6點，Peizi上到嚟。
本來諗住入office傾，但係入面實在太亂，所以唯有請佢去VIP房到坐。
 
我請小寶幫我調咗幾杯cocktail拎入去。
Peizi係識酒之人，同佢傾酒經，會係一件開心事。
都唔知傾咗幾耐，飲咗幾多杯。


 
我正想起身出去叫小寶拎多幾杯入嚟，點知一時失平衡，結果就成個人跌係落梳化，而Peizi亦都有禮貌咁扶一扶我。
唔知點解，第一個念頭飄入腦，就係「好TBB」。
哈哈哈~
 
就係Peizi扶住我個一刻，我就feel到有d光飄咗入嚟房到。
望向門口，見到度門唔知點解慢慢咁閂埋緊。
閂埋緊？ 即係頭先開過嚟？
 
我行咗出去，見到小寶好滋味咁食緊份翠華。


「小寶，點解你會有翠華食？」我好奇咁問。
小寶望一望我，又繼續低頭密密食：「頭先Taz上過嚟，本來話係買俾你食，點知轉頭又俾咗我，重嬲爆爆咁走咗去。」
「吓？！ Taz嚟過？」心入面除咗爆咗句粗之外，重開始相信TBB嘅劇情其實可能係真架。
 
我都冇心思去理房入面嘅Peizi，同小寶交代咗聲，就衝咗出去搵Taz了。
 
好彩呢到附近嘅店鋪(最緊要係便利店)都識我同Taz，所以我只要簡簡單單咁打啲人情牌，好快就知道個傻妹走咗去九龍公園個邊。
 
買咗兩支啤酒，就過咗去九龍公園游泳池上面個條天橋到。
個傻妹，最鍾意就喺呢到𥄫女。


 
果然，離遠我就見到呢個無理神氣，無晒光彩嘅Taz，鼓住啖氣咁望落泳池。