半醉嘅Sky,提出咗一個令我感到為難嘅要求。
我明白,所有秘密都有被揭開嘅一日。
 
當Sky嗰次同我講,話打算話俾啫喱知個秘密時,明唔明白我個心有幾難受?
作為佢嘅守密人,我好希望我係唯一同特別嘅。
當時Sky第一個就諗起我,我係暗暗開心架。因為最少,我係佢心目中有一定分量同位置。
 
但宜家,呢個秘密愈來愈多人知,我已經唔再係特別嘅一個。
雖然我知道,Sky愈肯同人講,佢嘅心結愈有機會去解開,佢受嘅苦就愈少…
 


靖將佢所知嘅娓娓道來之後,又再一次望實我:「我知係咁多,到你!」
「…」我嘅內心,仍然掙扎緊。
重重嘆咗口氣,暗暗下咗決定。
「當日Sky過咗去台灣,去到嗰間OC,先知個老闆只係一個大佢兩年嘅TB。佢就係Ocean!」
 
「…」靖望咗一眼已經沈醉係回憶嘅Sky「所以後尾佢同Ocean就係埋咗一齊。」
我點一點頭:「Ocean係一個player,攬女無數,所以個傻妹同佢糾纏咗一排先一齊,但安全感就爆低。」
靖憐憫地望咗Sky一眼:「咁佢不嬲都安全感低架!」
「所以最後佢忍唔住,係Ocean生日嗰日飛咗返嚟避佢。好彩Ocean真心鍾意個傻妹,追咗嚟香港,搵到我。氹咗佢成大半個月,8月中和好,又飛返去台灣。」
「你個時飛過去係探佢哋?」靖問。


 
我搖搖頭,再望一望已經伏係枱上出咗神嘅Sky。
「返到台灣本來都冇事,但係暑假最後嗰幾日,Ocean 就話要玩盡個暑假,日日唔係去wakeboard就係去深潛浮潛。點知…」
「Ocean…出咗事?」靖小心翼翼咁問。
Sky嘅面前,已經出現咗個小湖泊。
佢係我哋傾談期間,已經不自控咁默默流淚。
 
「嗯。」我決定唔再望Sky,因為我會唔忍心,會講唔到落去「嗰日佢租咗船出海去深潛,船家已經話天氣唔好,有暗湧,但Ocean係都要落水。結果…」
「佢…死咗?」靖問。
 


「冇死!?」Sky突然幽幽咁出聲「Ocean有死!佢只係失咗蹤,可能係失咗憶,唔記得點返嚟啫…佢會返嚟架!佢話過唔會丟底我唔理架!」
 
對住Sky嘅執著,我同靖都只可以默默咁望住佢。