………
除咗無言,我諗唔到我用咗成粒幾鐘邊去陪Scarlett飲,邊聽返嚟嘅消息,可以用咩說話去回應。
俾啲時間我,我需要整理一下我嘅思緒先。
 
之前啫喱講過,Taz當年過美國,其實係佢老豆半威迫咁要佢去,話可以叫做浸過下咸水喎。
結果Taz過到去,無人無物,朋友都唔識多個,其實都幾慘。
 
Scarlett 話後尾Taz係一間洗衣店到,識咗個女仔,後尾重拍埋拖。
佢partner介紹Taz識佢啲朋友,咁先叫擴大咗佢嘅社交圈子。
亦都因為咁,Taz同佢partner,就有好多common friend。


Scarlett就係其中一個。
 
而Taz當時嘅partner,佢呢生人第一個戀愛對象,第一個女人,重要傷到佢最深嘅,就係我家姐 - 邱柔!
 
What the Fuck!!
點解會係咁架?
對於柔同Taz過去嘅事,我一無所知!
 
Scarlett花咗唔少時間,去同我講佢哋之間嘅事。當然,只限於佢所知嘅事。
而當中,就包括埋柔點樣hurt Taz。


知唔知呢一刻我有幾嬲柔?
比起當年佢無啦啦由孿變直…今次真係好嬲!
嬲柔竟然可以咁不負責任,傷害咗一個女仔!
重要係我所愛嘅女仔!
 
對一個Les嚟講,冇嘢痛得過自己最心愛嘅partner變返直。
宜家重要係一個TB,係毫無先兆下,無啦啦話去嫁人喎!
 
我同Scarlett 飲咗大半支Black Label後(佢加Coke時,我就只加冰),佢就已經頂唔順走先喇。
揚一揚手,叫小寶幫我stock起支酒先,再搖搖晃晃咁返去office。


我需要好好靜下,整理一下思緒。
 
枱上放咗杯小寶剛剛拎入嚟嘅熱茶。
呷咗啖,望住啲白煙,心思開始澄明!
 
我,開始諗到啲嘢…
既然Scarlett係唔知嘅情況下,都以為我係柔,咁…我同Taz識咗咁耐,佢又知我姓咩,佢無理由認唔到…應該話,佢無理由估唔到我同柔嘅關係架!
 
如果Taz一早就知我同柔嘅關係,咁Taz當初究竟係以咩心態嚟接觸我?
到宜家大家關係曖曖昧昧咁,係咪因為我係柔個妹?
佢究竟諗緊咩?
佢…唔會想嚟搵我姐債妹償,報仇啩?!