Welcome To Knot ~ Season1: #90

Knot似乎今日會幾好生意喎。
都未夠鐘開門，就已經有兩個拖住手嘅人影係門口到掩掩揚揚。
 
我行近啲一睇，不禁笑咗出嚟。
正當我想指手畫腳咁叫佢兩個由後門入嚟嘅時候，啫喱已經捧住兩個大麵包盤經過正門，叫咗嗰兩個稀客跟佢行囉。
 
一行三人，以啫喱同嗰兩盤麵包行先，隨後嘅係靖，同被佢拖住、面紅紅嘅Taz。
「Welcome to Knot！早晨呀兩位！乜咁早呀？」我邊開始沖咖啡，邊笑住咁瞄一瞄佢哋。
「早晨！」靖坐底咗後，重專登將拖住Taz嘅手放上枱面，好有霸氣嘅舉動呀！「咁一早俾啫喱哥嘈醒，咪過嚟食個早餐，先再返去補眠多陣。」
 


「哦~明白！」我將一杯espresso放係靖面前，再將一杯cappuccino放係成朝都冇出聲嘅Taz到「咁你呢？你都好少何咁早喎！」
「我…」Taz呷咗一啖咖啡，再望向靖，似乎係到求救。
 
我正等待Taz或者靖嘅回應，而啱啱幫我搬好貨嘅啫喱就行咗出嚟，一手就拎起我放咗係枱面嘅凍咖啡，大啖大啖咁啜。
而靖，似乎都搵到個話題去幫Taz解圍：「咁琴晚Taz同我一齊，我起身，佢都起架啦！反而我想問下…啫喱！琴晚你去咗邊到瞓呀？」
 
對於靖突然嘅提問，唔單止令啫喱將口入面嘅咖啡噴咗少少出嚟，重令到本來想煎蛋嘅我，差啲將隻蛋打咗落地下。
「我…咩邊到瞓啫？！」啫喱開始思緒混亂「唏！講緊你同Taz㗎嘛，問我做咩啫？」
「講完啦！宜家問緊你呀！」Taz打蛇隨棍上「你唔講，我問Sky！」
話口未完，Taz就已經跳起身，撲向吧枱：「Sky！琴晚啫喱去咗邊到瞓呀？」


 
「吓？！」我低頭繼續煎蛋「你問佢囉，關我咩事啫！」
「Oppa唔肯講，我唯有審你囉！」Taz繼續咬住我唔放。
「你咪搞住Sky啦！」啫喱一手拉開Taz，將佢「捉」返去靖嘅身邊。
 
靖半抱半攬咁扶住Taz，再轉頭問啫喱：「咁你琴晚喞係瞓邊呀？瞓得好唔好？」
靖最後嘅「好唔好」似乎講得突別大聲，好似係講俾我聽咁：「Sky一係你講啦！」
「我…」啫喱嘗試為我解圍「琴晚我哋係一齊…過夜！」