成日我都專心唔到工作。目光同心神,都不自覺咁飄咗去Scarlett到。
 
Taz話Scarlett係綑綁愛好者,唔怪得Kwan仔話佢對我啲繩結咁有興趣。
我唔係歧視任何個人嘅癖好,所以如果單單講Scarlett一個人,只要佢唔係綁起我啲客,我真係唔覺得有咩問題。
 
但係宜家個問題係,靖同Taz話Scarlett對啫喱有興趣。
咁…如果啫喱都有呢個喜好,當然冇問題啦。但以我所知,佢好似冇喎。
 
唔知點解,我腦海中出現咗啫喱被五花大綁嘅畫面,重要啫喱係一面痛苦加興奮嘅結集!
「嘎!呀~」想得太入神,結果被水蒸氣噴到手。


自然反應下,手立刻縮。好彩冇拎住嘢,唔係一定跌爛晒。
但左手手背就已經紅咗一大片。
 
「Sky?!Are you OK?」Scarlett聽到我嘅叫聲,立刻走過嚟,捉住咗我隻手檢查細看。
「冇…冇事!」我縮返隻手,放咗係水喉下沖洗「沖下水就冇事。」
「你要小心啲。」Scarlett見我冇乜大礙,就轉身繼續做嘢。
 
2:45pm
啫喱將會係3:00pm再次送貨到Knot,唔知點解,我覺得我有需要保護佢。
 


「Scarlett?!」我叫喚剛剛休息完嘅佢。
「咩事呀?」
「冇…聽晚有Night Party,我估可能到時會有人想過夜。我想麻煩你幫手上去打掃下2號房,慢慢做得架,今日舖面都夠人手,唔趕架。」幾經辛苦,我先搵到一個藉口去令Scarlett唔會留係舖面「嗯…同埋如果你有需要,你都可以去打掃下自己間房,因為…嘻嘻,我真係冇咩時間執過1號房。」
「啊…嗯!I got it~咁我宜家上去執下房啦。」眼見Scarlett行咗上去,本來我好興奮架,點知…
佢無啦啦又行返落嚟:「BTW,Sky!其實我會唔會阻住咗你做生意?咁我住咗你其中一間房,會唔會令你租少咗一間房,賺少咗錢架?」
 
「呀!」突然我靈機一觸「Scarlett,不如咁,你幫我打掃下1號同2號房,你啲行李,晏啲就搬入我間房到。你就住我間房先啦。」
「咁你呢?你同我share房?」Scarlett仍然大惑不解。
「唔係。」我笑一笑「咁你都係住一個月到啫,我會搬過去啫喱到,同佢住。」
「What?!」


「咩話?」Kwan仔同楊言唔知由邊到跳咗出嚟「Sky你終於同啫喱一齊喇?!」