《將軍澳迴旋處上的時空裂縫》: 第二章第五回：跳進黑洞中的「叛國者」

第二章第五回：
跳進黑洞中的「叛國者」


最初，我和曉波在「黑洞」上的橋上初次相遇。

後來，曉波又在「黑洞」上的橋上，
向我宣佈自己被大學升職成為了那裡的研究主管的消息，
又同時向我求婚了，我亦在那裡說了「我願意」。





但一切，彷彿自那一刻開始，一步步演變成為一場悲劇。

＊＊＊＊＊＊＊＊＊＊

自從曉波升了做研究主管之後的那一年，
整個人變得沉默寡言，整天愁眉深鎖。

我以為他只是升職後，壓力大了，應該沒什麼特別。

但有一天晚上睡覺時，曉波突然跟我說這樣的一番話：





「阿霞，如果我同你講，我想炸咗成幢『黑洞』，你會唔覺得我痴咗線？」


「點解要炸咗佢？」
我很震驚一向理性冷靜的曉波，竟會說出這樣的話。

「我開始擔心我嘅研究成果會落入壞人手中，做一啲唔好嘅事……
一啲會影響好多人嘅壞事，
仲要係好多無辜嘅人。」





「係啲咩壞事？」

「我……簽了保密守則，洩漏國家機密會判死刑架。」

「傻佬，你係依個研究中心嘅話事人黎架嘛，
有你係度，無人可以用『黑洞』做一啲你唔想做嘅嘢架。」

「我就係驚我頂唔住佢哋……
尤其係而家香港依個政治形勢。
你知我哋嘅資金來源全部來自邊度架啦，
佢哋係我老細黎架，佢哋真係好大勢力架。」

睡房裡剩下了沉默。





「阿霞呀，如果呢…… 即係我話如果咋吓。
如果有一日，我因為自己嘅道德價值觀，
決定為咗唔俾『黑洞』成為壞人害人嘅工具，
炸咗『黑洞』佢，因此而坐監，你會唔會支持我？」


我不知道究竟發生了什麼事，
但我感受到曉波肩膀上所承受的責任有多重，而他又有多麼的擔心。

我不知道怎樣才能幫到他。

「一定要炸咗佢咩？
真係無其他方法可以解決？
例如向大學高層，甚至政府舉報，唔得咩？」





「唔得架。全部都係佢哋自己人，無用架。」

「你係講緊共和黨？咁…… 又真係無用嘅。」


我想了一會，再說：
「但如果你坐監，咁我點算呀？」

房間內又是一片寂靜，氣氛非常沉重。


「你講得無錯，應該仲有其他辦法嘅。
唉！唔諗啦！瞓啦！

我愛你，老婆。」





曉波緊緊抱著我，
在我額頭上親了一下，
然後很快就反轉身，背向我地睡了。


在他背向我前的一瞬間，
我好像隱約見到，曉波眼中有淚光。

「我都愛你呀，老公。」

＊＊＊＊＊＊＊＊＊＊

第二朝我起床，曉波就失蹤了。
在我床頭，留下了不知從哪本書撕出來的一頁紙，上面印著這樣一篇文章：






《與妻訣別書》林覺民
「吾至愛汝，即此愛汝一念，使吾勇於就死也。
吾自遇汝以來，常願天下有情人都成眷屬；
然遍地腥羶，滿街狼犬，稱心快意，幾家能夠？

語云：「仁者老吾老以及人之老，幼吾幼以及人之幼。」
吾充吾愛汝之心，助天下人愛其所愛，
所以敢先汝而死，不顧汝也。

汝體吾此心，於啼泣之餘，亦以天下人為念，
當亦樂犧牲吾身與汝身之福利，為天下人謀永福也。汝其勿悲！」



《與妻訣別書》？



為什麼曉波會撕一張這樣的古文文章給我？
為什麼要跟我訣別？


那時我心已十分迷茫，尤其他昨晚才說過要炸掉「黑洞」。
他不會真的去了吧？


但他這篇古文又想說什麼呢？
這個年代，世上還有幾多人看得懂文言文？
我連忙上資料庫搜尋翻譯，得出以下結果。


「我非常愛妳，就這『愛妳』的一念，已足夠讓我勇於赴死。
自從遇見妳之後，就常常希望天下有情人都成眷屬。
然而，如今到處都可聞到血腥臭惡的氣味，
滿街都可見到像狼犬般的壞人；
能夠滿足快樂地過活的，又有幾多個家庭？

《孟子》說：「仁者老吾老以及人之老，幼吾幼以及人之幼」。
我將我愛妳的心，幫助天下人愛他們的所愛。
所以我敢先妳而死，不眷顧妳了。

請妳體諒我這份心意，在哀號哭泣之餘，
也想想這世上的人們，
應該也能歡喜地，犧牲妳我二人的自身幸福，
去為天下的人謀取永恆的幸福。
請妳不要悲傷！」



然後我發現紙的右下角，有曉波親手寫的字：

「我去了最高法院舉報。」

曉波！
他聽了我的勸告，沒有選擇去炸掉「黑洞」。


但去最高法院舉報，
為什麼要跟我訣別這麼嚴重？

會不會...... 事情根本就是這般嚴重？

究竟發生什麼事？


我本想向上司請一天假，
到「黑洞」看看。
但我又想到，如果曉波去了最高法院舉報某些「壞人」，
而我作為他未婚妻，就這樣到「黑洞」，
豈不自投羅網，給他們機會要脅曉波？


然後我又想報警，
但曉波昨晚的話，言猶在耳：
「唔得架。全部都係佢哋自己人，無用架。」


忽然，家裡的門鐘響起。
是兩個警察。


「請問你係咪劉霞小姐？」

「呃...... 係，我係。」

「今朝清晨係垃圾灣嘅『第二代等離子氣化廢物技術研究中心』
發生了一宗懷疑命案，
有保安報稱有人跳咗落佢所講嘅『黑洞』，
之後經翻查研究中心出入口嘅閉路電視，
發現該名男子為研究中心嘅主管，名為黎曉波。
請問你係咪黎曉波嘅妻子？」

「我...... 我係佢未婚妻。」

「咁請你跟我哋去一趟研究中心協助調查。」

去到「黑洞」，見到一大群警察。

人群之中，唯一我認識的，是侯教授。



「教授！發生咩事啊？曉波佢……」

「阿霞，你過黎坐低先，唔好急，你唔好緊張，深呼吸，我慢慢話俾你知咩事。」

我已經不由自主地啜泣哽咽。



「根據保安口供，曉波佢……
今朝一早返黎，拎走咗好多機密文件。

保安以為有日本間諜，
追佢去到『黑洞』上面條橋度。

曉波將所有文件都掉晒落『黑洞』，
保安要求佢去警局，點知……
曉波佢…… 突然之間一跳就跳咗落『黑洞』，
保安想阻止都阻止唔到。」教授面有難色地跟我說。


「……」我不敢相信自己真的聽到教授這樣說。


「而家『黑洞』會暫時關閉，
但你知『黑洞』咁大能量，唔係話閂就即刻閂到，
起碼要一個星期先完全關閉到。
到時睇下可唔可以喺『黑洞』底搵到曉波嘅...... 呃...... 遺物。」

聽到這句，我簡直哭崩了。


記起十年前，侯教授就是在這裡對我們自豪地說：

「支原子筆就咁被「黑洞」氣化了。
『jarr』一聲，化為一縷輕煙，消失了。
第時所有廢物都可以咁樣處理。」



侯教授意識到自己說錯話了。

「阿霞，你唔好難過，我知一時間你好難接受，
你休息一下，平伏一下心情啦。
曉波嘅身後事方面，由於佢係我哋員工，
又係喺工作時殉職，大學方面會全權負責喪禮嘅安排，你就休息一下吧。」


有一個警察走過來跟我說：

「警方而家懷疑黎曉波先生係叛國者，
意圖販賣國家機密俾邦聯嘅敵人，
計劃被保安發現了之後，畏罪自殺。

警方希望你跟我返警局錄一份口供。」


叛國者？

販賣國家機密？

畏罪自殺？



曉波絕對不是這樣的人！

他一定沒有做過！


(待續)