Chapter 21 犯我家人者,雖惡必誅(下)
 
三分鐘後,矮仔文帶同牛辸明回來,他指著我道:「大佬,就係佢喇!」
 
牛辸明瞧見我,神情有點訝異,道:「咦!老成?」
 
我與牛辸明在中三的時候是就讀同一班的,初相識時,他已經不斷遊說我加入8座的數字幫,成為他的手下,我當然是拒絕的,他的那副德性,就算真的要加入黑社會,亦絕不會找他當自己的老大。另外,他很喜歡在別人的姓氏前加一個老字,故作彼此關係密切。
 
此時,我裝作親熱喚道:「喂!大哥明,好耐無見,唔好意思,我唔知道依兩位喺你啲兄弟,一場誤會。」
 




矮仔文與飯桶武眼見牛辸明一來,我的態度便變得尊敬起來,他們瞧向牛辸明的眼神變得更加敬仰。
 
牛辸明搭著我的肩膀,親熱道:「老成喔!最近點啊!有無跟人啊?不如就跟我啦,你依家跟我嘅話,我畀你插隊,你做佢地大佬,點睇?」
 
兩人聞得我會成為他們的新老大,而原本的老大牛辸明,變成他們的阿公,臉色立時一沉。
 
我笑了笑,拒絕道:「大哥明,唔好講笑啦!睇依兩位兄弟一表人材、骨格精奇,將來喺依行一定前途無可限量,我邊有本事做到佢地大佬啊?佢地唔跟你大哥明,仲可以跟邊個喔?」
 
二人聞得我無意成為他們的新老大,而且還在牛辸明面前讚賞他們,不但鬆了一口氣,還喜形於色。
 




牛辸明笑道:「老成,無見一排,喔!你講野叻咗喎!」
 
「邊係喔!不過我份人老實嘖!邊個唔知你係斌仔哥頭馬喔!」
 
牛辸明一臉自豪道:「唔係我吹水啊!斌仔哥真係好器重我,想當年傻豹…」
 
精神病人再度緬懷虛構的歷史,我當然阻止,斷言道:「大哥明,得架喇!你嘅威水史全校都識背。係呢!係咪全石梨最巴閉嘅社團就係你地8座嘅數字幫?」
 
「依層緊係啦!唔係仲有邊個啊?」
 




「之但係有人話佢地真技安先係石梨最威喎?」
 
「哦!你係咪講成日喺猩猩猿隔離籃球場聚腳嘅拳佬牙佬兩兄弟啊?嗰兩兄弟KIND子嚟架,唔駛理佢地。」
 
飯桶武插言道:「唔係喎!大佬,上次我同矮仔文去嗰個球場玩,有個叫貓仔嘅人持住有拳佬同牙佬撐腰,唔畀我地入去玩,話我地夠膽踏入球場半步,就打我地喎。」
 
牛辸明拍了拍飯桶武的臉,道:「醒啲啦!嗰陣你地未跟我嘛!依家你地撻我朵,佢地實要畀面你地。」
 
矮仔文道:「係嘅!大佬,咁今日放學,我同飯桶武就去猩猩猿個籃球場玩,佢地逗我地,就撻你朵。」
 
牛辸明點頭道:「無問題,佢地一定畀面我。」
 
我不禁暗笑,打算放學到猩猩猿旁的籃球場「食住花生等睇好戲」。
 
此時,一名模樣姣好、打扮入時的女同學來找牛辸明,牛辸明把手放在那女同學的腰肢上,向矮仔文與飯桶武道:「你地兩個,快啲叫聲阿嫂啦!」




 
當年浩南哥掀起的古惑仔熱潮,風頭真的一時無兩,讓古惑仔的身份比來自三大的大學生更受女士歡迎,儘管像牛辸明這種沒錢、沒樣、沒地位、成績差的跑龍套角色,亦可以因為古惑仔的halo effect,而有一個牛辸明配不上的女同學作女朋友。
 
瞧見矮仔文與飯桶武雙目發光的樣子,相信他們非常憧憬往後行古惑的生涯,而我只是搖頭苦笑。
 
放學前的兩堂是化學堂,今天的化學堂在實驗室進行,我趁沒有人為意的時候,偷偷取走了一個布口罩。
 
放學時,我碰到了楊鳳瑤,她問道:「成皇志,你去邊啊?今日學姐,幫我地補中國文學架!」
 
「我今日唔得閒啊!妳幫我同學姐講聲啦!」
 
說畢我便離去,沒有理會在身後呼喊我的楊鳳瑤。
 
在到達籃球埸前,我已經置裝完成,穿上了從家中帶來的風樓、戴上阿爸的鴨嘴帽及實驗室偷來的布口罩,走進籃球場的觀眾席上,混在那些在看報紙的阿伯當中,那些伯伯只是瞟了我一看,便把焦點回到了手中的報紙上,他們討論曾綁架利天成的大兒子,外號大富豪的葉炳強被中共判處死刑一事。
 




他們說葉炳強活該,去招惹利天成,利天成便引他回大陸,然後令公安捉了他,將他判處死刑。
 
我沒有興趣介入他們的話題,我的願望很渺小,就是希望把書唸好,將來找一份好的工作,在樓價飆升到不合理的水平前置業,而現在最短期的目標就是向拳佬牙佬討債。
 
這時,拳佬的三弟貓仔四弟番獌與其他同黨在籃球場裡追逐,我從書包裡取出了那本描述杜月笙一生的傳奇小說來看。
 
杜月笙有一句名言值得我借鏡的,就是小心得天下,大意失荊洲。
 
凡事均要三思而行,小心謹慎。
 
我看了一會兒小說,便瞥見到矮仔文與飯桶武拿著籃球向這邊走來。
 
我打量了場中的貓仔等人一看,看來好戲將要上演。
 
矮仔文與飯桶武步進入籃球場,飯桶武作出了投籃的動作,貓仔見狀喝道:「喂,你兩個當我死架?上次已經同你地講咗啦!依個球場我地真技安睇嘅,你地喺度玩,就要交保護費,帶夠錢嚟未啊?」




 
矮仔文滿懷自信道:「你知唔知我大佬係邊個啊?」
 
貓仔指著兩人笑道:「咩啊!你兩條旦散學人跟大佬啊?邊個咁唔好彩收著你地依啲契弟啊?」
 
矮仔文扠著腰道:「飯桶武,話畀佢地聽我地大佬喺邊個?」
 
飯桶武拍了拍胸口道:「聽住喇!我地大佬就係當年揸住把老牛由荃灣斬到傻豹去咖啡灣,人稱大哥明嘅牛辸明。」
 
貓仔皺著眉,向左右的同黨問道:「你地知唔知邊個大哥明,好似好猛料咁喎?」
 
「未聽過喎!係咪賣牛奶架?吃吃吃!」
 
貓仔笑道:「大哥明?我識佢老鼠啊!兩條友唔知係邊度搵個濕鳩KIND子認做大佬。」
 




矮仔文眼見道出自己寶號,並沒有收到預期的效果,而且對方還現出一副不懷好意的樣子,便道:「好,依家我地就叫大佬嚟,你地夠膽就唔好走。」
 
貓仔捏著拳頭,獰笑道:「喺我地頭話嚟就嚟,話走就走,我講過你兩條傻仔再嚟,就執番你地一劑。」
 
話畢貓仔等人對矮仔文與飯桶武拳打腳踢了一番,兩人被打得抱頭倒地。
 
我在場瞧到二人被打的慘況只是冷眼旁觀,首先我前來是要觀察拳佬和牙佬,好摸清二人的習性;另外,我認為這兩人被教訓一番也是好事,好讓他們知道加入黑社會並不是一件好玩的事。
 
貓仔等人發洩了一番,番獌指著倒地呻吟的矮仔文與飯桶武笑道:「你地畀人打得咁慘,我請你地飲野補數啦!」
 
番獌說畢脫下了褲子向著二人撒了一泡又大又黃的童子尿。
 
二人全身上下也沾了番獌的尿。
 
貓仔腳踏矮仔文的臉,警告道:「今次請你地飲熱啤,下次再嚟質你地食屎啊!」
 
番獌亦有樣學樣,腳踏飯桶武的臉頰,再向飯桶武吐了一口唾液,才道:「仲瞓喺到,賴死唔走,係咪想我地再執你一劑啊?」
 
在旁的我瞧見如此狀況亦不禁皺眉,那個叫番獌的小孩,應該與阿興一樣是小六學生,小小年紀行為舉止居然如此暴戾惡毒,相信他在三名兄長的耳濡目染下,將來亦會成為一名欺凌弱小的惡棍。
 
兩人害怕再遭暴打一頓,勉強站起,互相攙扶,一拐一瘸帶著一身尿臭與傷痕離去,連籃球亦沒有帶走。
 
貓仔撿起了籃球,嚷道:「喂!我地玩數字球。」
 
這天,觀察了數小時,拳佬等人不知是否知道仇家多,離開球場時,亦是一同離去,但我發現他有時會獨個兒走到猩猩猿的後巷小便,如果要偷襲他,那時候就是最好的機會,但他這樣的體格,我是很難偷襲成功,他捱過了我的襲擊,喚來了他的同黨,那時我就真的糟糕。
 
第二天,小息的時候,我在昨天遇到牛辸明的位置,再度遇上他們三人,矮仔文與飯桶武齊齊向牛辸明哭訴,二人把昨天的經過轉述了一次。
 
矮仔文道:「大佬,你要幫我地出頭啊!貓仔條仆街尋日幾個打我地兩個,佢細佬番獌仲喺我地身上屙尿,話下次再見到我地,要質我地食屎添啊!」
 
飯桶武道:「係啊!大佬,我地撻你個朵出嚟,佢地話你係悉尼老鼠、濕鳩KIND子啊!」
 
矮仔文道:「係啊!大佬,你又叫我地撻你個朵出嚟人地會畀面你,我地撻咗你個朵出嚟,畀人執劑勁不特止,仲畀人請飲熱啤。」
 
牛辸明瞪著矮仔文,道:「咩啊!你咁講咩意思啊!即係話大佬水你地畀人打啊?」
 
矮仔文道:「大佬,我唔係咁嘅意思,我只係話班友見我同飯桶武係你啲人,都夠膽郁,擺明唔畀面你啦!」
 
牛辸明問道:「你當時點撻朵架?你地依家撻一次朵畀我睇?」
 
二人按著昨天的情況,演繹了一次,牛辸明見狀大搖其頭,道:「咁咪錯晒囉!你地仲唔知衰咩啊?人撻朵,你地撻朵,撻我個朵出嚟無啲霸氣,人地點知你係咪冒認架!你地要知道依個世界有幾多騙子,你地依家同我去厠所對住塊鏡練習撻朵,撻朵嗰陣,要畀啲火出嚟。」
 
眼看牛辸明將要和稀泥成功,我立時走出來,道:「你地頭先嘅說話,我都聽到晒。」
 
牛辸明詫異道:「老成?你喺度做咩啊?」
 
「大哥明,你諗住點處理依件事啊?」
 
「咩點處理嘖?今次擺明依兩隻野撻朵唔夠霸氣,貓仔條粉腸唔知佢地係我啲人,依家我就叫佢地入去厠所對住塊鏡練撻朵囉。」
 
「咁即係你唔會搵貓仔算帳?件事就咁算?」
 
我的質詢讓牛辸明感到不滿,他慍怒道:「依啲係我地8座數字幫嘅內部事務,關你啲外人咩事啊?」
 
我和顏悅色地道:「大哥明,如果係第二個我當然唔會咁多野講啦!之但係大哥明你係喺依間學校裡面少數我佩服嘅人之一,我見到你有危險,先忍唔住出聲咋!」
 
「我有危險?我有咩危險啊?你唔好亂咁噏當秘笈喎!」
 
我好整以暇道:「頭先你話佢地撻朵唔夠霸氣人地唔知佢地係你啲人,但事實上佢兩個真係你啲手下,佢地嘅字頭都係8座數字幫,佢地畀人打、仲要當眾畀人請飲熱啤依件事,我聽霍去登講已經揚開緊,如果你真係打算當無件事發生,到時唔單止你畀人笑,斌仔哥同8座數字幫都會畀人笑,你估到時公司同斌仔哥點睇你,自己啲靚畀對家字頭請飲熱啤都無動於衷,佢地仲點信你?點畀位你上?出面啲人會點講?數字幫畀真技安踩到上心口,都好似成隻烏龜咁縮埋一舊唔敢出聲。」
 
牛辸明額角冒汗,勉強笑道:「老成,有無你講得咁嚴重啊?」
 
「有人嘅地方就有鬥爭,8座數字幫裡面係咪只係得斌仔哥一個?其他同門會唔會利用依件事嚟攞著數?到時斌仔哥係咪會攬你都好難講囉!好似中國以前啲牛李黨爭都係咁,佢地都係搵一件好似微不足道嘅事,去攻擊政敵,最後攪到亡黨添。」
 
瞧見牛辸明雙目遊移不定的樣子,相信他已經被我嚇唬了。
 
飯桶武和矮仔文見牛辸明沉默不語,立時勸道:「係啊!大佬,佢地咁樣打我地,即係唔畀面你,睇唔起斌仔哥同公司,你一定要幫我地報仇啊!」
 
「你地收嗲,一日最衰你兩個,走去踩屎,依家要我幫你地執屎,快啲死去厠所練習撻朵,撻得好先好出嚟。」驚怒的牛辸明猛然推了二人一下。
 
二人走後,牛辸明問道:「老成,依單野你點睇啊?」
 
「你先係黑道中人,點做你一定清楚過我,不過睇嚟一定要搵貓仔算帳,唔攞番個尾彩,好難落台。」
 
牛辸明一拳打在牆上,立定決心道:「好,我就叫齊兄弟,踩去籃球場同貓仔佢地計數。」
 
我不禁在心中發笑,想不到兩三句說話便讓牛辸明中了我的二虎相爭之計,今天放學後,又要喬裝到籃球場「食住花生等睇好戲」了。
 
放學後,我又置裝到籃球場混在那些閱報的伯伯堆中,他們看他們的報紙,我則在看著小說等花生吃。
 
這天拳佬牙佬四兄弟與同黨很早已經在球場聚腳,一人拿著一支樽裝可樂在喝著。
 
半小時後,我望到牛辸明聚結了四名同黨前往籃球場,牛辸明瞧見對方總人數是自己兩倍有多,現出了愕然之色。
 
牛辸明與同伴對望了一眼,商量了一會,最後還是硬著頭皮步入球場。
 
牛辸明以有點震顫的聲線叫板:「喂!邊…邊個係…係貓仔?」
 
拳佬等人聞言,原本坐在欄杆上,均紛紛躍下,拳佬喝道:「我係貓仔大佬,搵貓仔咩事?」
 
原本我還以為是兩虎相爭,但雙方無論在人數上、出場的氣勢上已經有非常明顯的差距。
 
牛辸明的同黨被拳佬的氣勢所懾,不禁後退一步,這樣顯得牛辸明鶴立雞群,牛辸明不敢直視拳佬,垂著頭,他的聲線震顫得比剛才更甚,道:「我…我我啲細…細細…佬話,貓貓…貓仔打…打打…佢佢地,又…又屙屙…尿落佢…佢地度。」
 
拳佬皺著眉道:「你喺度我我我我乜春啊!你漏…漏口架?」
 
拳佬的陣營立時爆出了一陣笑聲。
 
牛辸明的臉色陣青陣紅,捏緊拳頭,以有點哭腔的聲音道:「尋日你細佬打我啲靚,仲當住咁多人面前,請佢地飲熱啤啊!」
 
拳佬喝道:「貓仔,尋日件事係點?條友講嘅野係咪真嘅?」
 
貓仔笑道:「阿大,之前我一早警告過兩條傻仔,依個場係真技安睇嘅,入嚟打波就要畀保護費,點知尋日嗰兩條傻仔嚟踩場,話佢大佬叫大哥明,我春知邊個叫大哥明咩?咪執咗佢地一劑囉!至於篤尿就唔關我事,係番獌屙嘅。」
 
牙佬聞言,捏了番獌的臉一下,道:「你個衰仔越嚟越古惑喇!居然請人飲熱啤!」
 
番獌吃吃地笑。
 
拳佬道:「聽唔聽到啊!係你啲靚唔識規矩,你做大嘅教唔掂,咪我細佬幫你教囉。」
 
牛辸明道:「咁你即係打橫嚟講嘖!」
 
拳佬踏前一步,瞪大雙眼,喝道:「咁你依家想點撚樣喔?」
 
拳佬的同黨也踢前了一步,牛辸明見狀,心為之一怯,氣勢再度轉弱,道:「咁…咁你即係持…持住人多蝦…蝦人少嘖!」
 
拳佬脫去了上衣,把衣服扔在地上,喝道:「我同你隻揪都得架!」
 
牛辸明瞧見對方現出肌肉結實的上半身,士氣值立時掉至零,他不斷退後道:「隻揪?都痴線,有咩唔啱咪講到啱囉?」
 
「隻揪唔啱啊?咁圍揼囉?」拳佬把手上的汽水樽扔在地上,砰一聲玻璃碎片立時四濺。
 
其他同黨亦擺出一副躍躍欲試的樣子。
 
牙佬道:「阿大,我認得條傻仔,佢叫蛇仔明,跟8座數字幫嘅朱斌仔,你大人有大量,唔好同啲KIND子計。」
 
「哦!原來係跟朱斌仔,8座數字幫依家無人到咁啊!朱斌仔淪落到要收你啲垃圾,你大佬同我同期出道,嗰陣你條打壞都唔知係邊啦?學人踩場?我數十聲,你班契弟好行出依個球場,如果唔係一人一支可樂樽。」
 
牛辸明全身發顫,驚怒交集,人不夠別人多,打亦打不過人,但如果現在走,真的非常丟臉。
 
拳佬數道:「一、三、五…」
 
牛辸明與他的同黨認為走是丟臉;但被揍不但丟臉,還要承受皮肉之苦,還是逃走較好,於是立時掉頭走人,牛辸明快要步出球場之際,別過頭來,擱下了狠話:「仆街,我唔會就咁算架,你地睇撚住啊!」
 
拳佬等人作勢衝前,嚇得牛辸明拔腿就跑。
 
拳佬笑道:「哈哈哈,垃撚圾,走住嚟屌。」
 
牛辸明的表現讓我感到很失望,我的借力打力、兩虎相爭之計看來已經失敗,要再想別的辦法了。
 
想到剛才牛辸明擱下狠話,我立時想到另一計謀,如果拳佬那方現在被人襲擊,他們一定會懷疑是牛辸明幹的,那麼他們便會找牛辸明報仇,到時朱斌仔亦不得不出手了,就讓真技安與數字幫兩班敗類打過你死我活吧!
 
至於進行栽贓嫁禍的角色,靠人還是不靠譜,看來我要親自出馬了。
 
第二天,我在學校又遇到牛辸明等人,牛辸明攬著女友的腰,吹噓道:「飯桶武、矮仔文,我依個做大佬,都算唔話得喇!你地畀人恰,我即刻拖行馬踩去拳佬地頭,向佢地問罪,我地加埋得五丁友,人地就十幾個,不過你大佬我無驚過,一入到球場就問:『邊個叫貓仔?快啲同我死出嚟。』嗰個貓仔嚇到當場瀨屎,推佢大佬拳佬出嚟,我當場皺晒眉,篤住佢額頭問:『拳仔,你幾時改名叫做貓仔架?』…」
 
飯桶武佩服道:「嘩!大佬,你好威啊!嗰個拳佬我見過一次,佢個樣好惡,同埋好大隻架!我連畀佢望住都淆晒底喇!你居然夠膽篤住佢個頭叫佢做拳仔,你真係好勁啊!」
 
矮仔文道:「飯桶武,唔好劖亂歌柄,聽埋大佬講先。」
 
牛辸明續道:「我問『拳仔,我啲細佬嚟打下籃球,你細佬又打佢地,仲請佢地飲熱啤,條數點計啊?你唔好以為你地人多,我就唔敢郁你地,今日你唔畀個交代我,我就一人一個可樂樽。』講完之後,我隨手執起個可樂樽,一野車落地下到,佢地即刻淆晒底,拳佬驚到係咁打佢啲細佬,最後我睇唔過眼,捉住佢隻手,問:『你做大佬都做得幾核突,做大就應該攬啲細嘅,有事就推啲細出嚟,咁算啲咩大佬啊!』跟住佢跪喺我面前自摑,我份人最唔好就係衰心軟,最尾都原諒咗佢。」
 
飯桶武聞言熱淚盈眶,道:「我同矮仔文真係無跟錯大佬啊!大佬你鬧拳佬嗰番話真係令我好感動,我可唔可以抄低啊?我諗住中文作文嗰陣寫落去。」
 
矮仔文道:「大佬,做咩尋日唔畀我同飯桶武跟你去學野啊?畀我地親眼睇到大佬你有幾威,拳佬貓仔嚇到瀨晒屎個衰樣都好喔!」
 
「如果你地兩隻野嚟到,我又要分心照顧你地,尋日我真係諗住一個打佢地十幾個架,但係佢地淆晒底,打唔成,唉!」牛辸明搖頭嘆道。
 
矮仔文道:「大佬,你尋日為我地出咗口氣,今日放學我同飯桶武就踩落去球場,尾彩都要攞埋佢。」
 
飯桶武笑著點頭道:「好啊!好啊!」
 
牛辸明聞言嚇了一驚,道:「好你個頭,你地以後都唔可以去嗰個球場玩。」
 
飯桶武問道:「吓!點解啊?大佬!」
 
「尋日佢地無晒面,今日你地落到去,隨時搵你地出氣,佢地敬畏我嘖!但係完全唔需要畀面你地。」
 
矮仔文道:「如果佢地夠膽再對我地唔客氣,有大佬你喺到,到時就對佢地一人一支可樂樽。」
 
飯桶武亦附和道:「係啊!大佬,我地仲要去攞番個籃球架!」
 
牛辸明道:「打咩籃球?去咩籃球場喔?無前途架!我係大佬,總之我話唔准去,就唔准去,你地再去就以後唔好叫我做大佬。」
 
飯桶武與矮仔文雖然一臉狐疑,但最後亦答應了牛辸明再也不去那個籃球場。
 
在旁窺聽的我不禁暗笑,牛辸明居然把昨天的遭遇倒轉來說,最好笑的是這種讓人難以置信的謊言,矮仔文與飯桶武居然照單全收,真的應了一句老話百貨應百客。
 
瞧見牛辸明這種德行,對於選擇了他作為嫁禍的對象,我連最後一絲的罪疚感亦一掃而空。





=15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl
已有 0 人追稿