Chapter 51-1 選秀(上)
 
我問謝金雄借了一億,並動用當中的九千萬和其他股東成立了順勢娛樂有限公司,我持股量高達六成,成為公司的大股東,其他股東有蔣學勤與謝家進。
 
順勢娛樂有限公司成立當天,吸引各大傳謀前來採訪,各間報社的記者向我們提問各種問題:
 
「成皇志,近排你都好忙下!上個月先創辦報社,今個月就開娛樂公司,下個月又諗住做啲咩啊?」
 
我笑道:「人生太短,想做就去做,下個月嘅事我未諗到啊!不如你俾啲提議我吖!」
 




「係喎!成皇志,聽講你係依間公司嘅大股東,乜原來你咁有錢嘅咩?」
 
我笑道:「無架!我成副身家攞晒出嚟!仲要進哥同學勤幫手,先勉強搞得掂。」
 
「咁有信心投資咁多錢,你係咪想取代星旺嘅易生做娛樂大亨先?當初有傳易生出天價簽你,你都拒絕,係咪嗰陣已經諗住自己做老細?」
 
我道:「易生係一位好成功嘅商人,星旺亦都係一間好成功嘅公司,取代易生?邊有可能啊!不過易生同星旺都係我地一個好好嘅榜樣。我喺公開場合見過易生幾次,佢好友善,我同星旺嘅藝人凌風、伊申清都幾熟吓!都合作咗好幾次。」
 
「係呢!謝生啊!上次你同成皇志合作搞報社,依家又同佢合作搞娛樂公司,你地關係都幾友好喎!」
 




謝家進拍了拍我的肩膊道:「阿志哥仔叻仔嚟架!我地依啲係社會上叫做有啲地位嘅人,應該幫下啲年青人。」
 
「學勤,掌天下依家俾證監會要求停牌,掌天下嘅音樂部門都解散咗,員工好多都過咗嚟,連宛琳珊、林昌奴依啲歌手都過咗嚟,係咪打算用新公司借屍還魂?」
 
蔣學勤道:「如果借屍還魂嘅話大股東就係我,唔係成皇志啦!不過之前喺beauty song、dream music同golden song嘅台前幕後都好優秀,佢地加入順勢對雙方嚟講都係win win。」
 
「之前成皇志係你地掌天下嘅藝人,最後不歡而散解約離開,依家反而成皇志做咗老細,你心入面會唔會有條刺喺到?」
 
這個記者不懷好意去問這些具挑釁性的問題,我不禁打量對方的記者證,原來是方向日報的記者,這間報社與星旺有千絲萬縷的關係,經常作為喉舌有組織去抺黑其他公司的藝人。
 




蔣學勤聞言有點慍怒道:「首先,之前掌天下係同成皇志和平解約;其次我都係順勢嘅股東之一,唔係你講到咩員工同老細嘅關係;另外你問我有無hard feelings?如果有我地就唔合作啦!」
 
那位記者企圖繼續追問,我斷言道:「其實今日我地順勢娛樂有限公司有野要同各位宣佈,我地會成立一隊好似日本女團早晨少女嘅樂隊,依家公開招幕成員,只要年滿16歲就可以參加,詳情我地會係自強日報公報,各位有興趣想成為順勢娛樂有限公司藝人嘅女生就要注意喇!」
 
***
 
姚智風與往常一樣到The hot girl玩樂,上次那件事惹怒了成皇志後,平常他們向成皇志報銷的帳單,變成交給蓮姨負責,蓮姨沒有成皇志那麼寬容,凡是超過一百元的開銷都不會批准,他們那些到夜店消遣動輒千多元的簽帳,統統都被發回頭。
 
姚智風心想:「死老虔婆,揸住雞毛當令箭,唔批我啲單,大把朋友請我飲酒。」
 
姚智風在The hot girl依舊很吃得開,一進場那群酒肉朋友看到他,便過來與他打招呼。
 
那名在大台工作的六綫奀星問道:「姚少,得你一個咋?阿登呢?」
 
「唔好講佢喇!船頭驚鬼船尾驚賊,佢話聽日返早,要早啲瞓。」




 
六綫奀星豎起拇指讚道:「都係姚少你夠把炮。」
 
「係呢?樂宜到咗未啊?」
 
六綫奀星揚了揚下巴,道:「嚟咗啦!喺嗰邊。」
 
姚智風看到樂宜與另一位青年態度親暱,樂宜雙手交纏著對方的脖子上,然後二人舌吻起來。
 
姚智風見狀怒火中燒,氣沖沖走上前推開那個青年,怒道:「喂,你做咩搞我條女啊?」
 
青年錯愕地瞧向樂宜,樂宜沒好氣道:「邊個係你條囡啊?初時以為你真係咩經理,我先同你上床咋!諗住你可以叫成皇志簽我做宛琳珊師妹,點知你都話唔到事,點選秀嘅內幕都唔知道。」
 
姚智風一廂情願以為成皇志創立順勢,以自己與對方多年交情一定得到重用,可是經歷過上次那件事後,成皇志對他的信任大減,不但要蓮姨看管他和霍去登,有很多事情也沒有對他說。
 




那名青年推了姚智風一把,道:「聽唔聽到啊?樂宜話你唔係佢條仔啊!好心你就屙篤尿照下自己個死人樣先啦!咁樣衰學咩人溝女吖!」
 
兩人互相推掇,未幾演變成了一場武鬥,姚智風身型不夠對方健碩,很快便被人打趴在地上,其他酒肉朋友見狀只是圍觀,沒有施以援手,待青年揍夠了便停手,擺出勝利者的姿態拖著樂宜離去。
 
此時,那群酒肉朋友才上前慰問道:「喂!姚少,你點啊?」
 
姚智風用手擦拭著破損的嘴角,怒道:「你地班友見我比人打都唔幫手。」
 
六線奀星辯道:「吓!姚少,你同人爭女,我地幫手嘅話,你會好無face架。」
 
姚智風看著樂宜漸遠的背影罵道:「依啲MK妹真係養唔熟,遲啲等我有錢,搵到嘅女人靚過你十倍都得啊!」
 
樂宜亦同樣有另一番打算,她心想:「姚智風依啲魚毛都係無本事,無謂再浪費時間喺佢身上,成皇志先係順勢嘅老細,要色誘都係色誘佢啦!」
 
兩人各懷鬼胎,都有自己的盤算。




 
***
 
布世伯與布正麗通過電話,得知她要回來香港,我知悉布正麗乘搭的航班後,便在當天要霍去登載我們去迎接布正麗,同行的除了我、霍去登與布世伯外,還有阿興與萬黛,兩人最近經常形影不離,熱戀中的情侶就是這樣。
 
布世伯與阿興的關係很友好,問道:「興仔,你女朋友仔叫咩名啊?都未介紹俾我聽。」
 
萬黛不像一般女孩那麼羞澀,她道:「布世伯,我叫萬黛啊!我好崇拜布甸姐架!」
 
布世伯哼了一聲道:「個傻女有乜咁值得崇拜啊?佢聽人一句說話就走咗去台灣,揼低我依個老豆係香港。」
 
布世伯一直對這件事很介懷,自從布正麗的母親失蹤後,他們兩父女便一直相依為命,所以布正麗聽從我的規勸與榮仔到了台灣,布世伯生我的氣,我也可以諒解。
 
阿興問道:「布世伯,其實你咁掛住布甸姐,點解你唔去台灣搵佢呢?」
 




「如果我又跟埋去台灣,香港間屋就俾政府收返,我留係香港,阿麗喺台灣遇上啲咩困難,佢都知道香港仲有個地方俾佢返嚟住。」
 
之前我要布正麗與榮仔到台灣暫避,原因是害怕湯仲謀復仇,可是現在我無論在地位、人脈、財富已經和當日不可同日而言,世界盃後我的資產會以十億計算,那時就算湯仲謀回復自由,擔心遭到復仇的會是他不是我,現在我憂心的反而是榮仔,王炳被殺一案警方仍在調查中,榮仔回港的話,不知警方會對他怎樣?
 
阿興道:「世伯,阿哥依家同大細界嘅謝家進一齊做生意,佢遲啲會大把錢,唔駛再驚嗰個湯仲謀,布甸姐同榮仔可以返番嚟香港喇!」
 
布世伯冷哼一聲,道:「依家嗰個汶萊王子追緊我地阿麗,話唔定遲啲佢做埋皇后,去汶萊住呢?」
 
阿興道:「吓!布甸姐,唔會去汶萊啩?」
 
布世伯道:「依層好難講,嗰個汶萊王子又靚仔、又有錢、又有地位,做皇后喎!邊個女仔唔想啊?阿麗同個汶萊王子一齊返嚟,唔知係咪見家長呢?我就無乜所謂,最緊要個女鍾意。」
 
「唔會架!布甸姐,唔係啲咁嘅人嚟架!」阿興道:「阿哥,布甸姐,唔會去汶萊架?」
 
「依啲係佢嘅自由,佢可以選擇去邊到。」
 
我想到之前轉世活佛的預言,他批布正麗的命格貴不可言,將來會成為皇后,那位黃尊義汶萊王子,將來會成為汶萊的國王,難道他就是布正麗的真命天子?那位活佛據說具有真正的神通之力,從他口中說出的預言,都會成為事實。布正麗與黃尊義結婚,便成為身份顯赫的皇后,不用再懼怕湯仲謀的報復,又能夠憑藉這重身份庇蔭榮仔,她亦會很幸福,我應該替她高興吧?但我就是不能夠這樣豁達。
 
來到機場,我們還未進入入境大堂,已經有超過一百名黃尊義的支持者聚集,保安員需要在場維持秩序。
 
作為公眾人物,一般情況下,我在街上都會帶上墨鏡和口罩,這次也沒有例外。
 
我這樣的裝扮吸引了別人的注意,有兩名少女低頭竊語,其中一人道:「咦!嗰個係咪成皇志啊!我好鍾意佢首愛的宣言架!不如我地過去搵佢簽名影相啦!」
 
另一名少女道:「吓!但係黃尊義隨時出嚟喎!不如下次先啦!錯過咗今次,下次就唔知要幾時喇!」
 
「嗯,咁又係黃尊義高佢咁多、又靚仔咁多,最重要黃尊義仲係王子。」
 
我聞言有些惱怒,雖然我的外在條件比不上黃尊義,但大家都是香港人,不是應該要支持香港人嗎?最瞧不起香港人就是香港人自己。
 
這時,一陣又一陣尖叫呼歡聲傳來:
 
「黃尊義!黃尊義!」
 
「王子!王子!」
 
原本隨著保安上車的黃尊義轉向走到鐵馬前,他雙手合攏做出一個心形手勢,以不標準的廣東話喊道:「各位,我愛你地!」
 
黃尊義這一番賣乖示好後,立時讓那些支持者陷入瘋狂狀態,他們衝近鐵馬,有些人送上鮮花和禮物;有些人向黃尊義伸手,希望與對方握手;有些人遞上紙和筆,索取簽名。
 
黃尊義耐著性子對支持者的要求一一答應,逗留了二十分鐘後,助手拿走支持者送贈的禮物,黃尊義才與一眾依依不捨的支持者道別,道:「各位我會喺香港做野一個月,大家要支持我啊!拜拜!」
 
我一直在旁觀察不禁暗讚對方確實有當紅巨星的風采,難怪可以在短時間內崛起成亞洲人氣偶像。
 
這時,阿興喊道:「係布甸姐啊!」
 
布世伯上前替布正麗拿行李,阿興道:「布甸姐,妳又學阿哥咁要帶太陽眼鏡啊?」
 
布正麗神情緊張把食指放在嘴唇上,道:「殊!唔好咁大聲啊!一陣啲記者會發現我架!」
 
布正麗現在貴為台灣當紅偶像黃尊義的緋聞女友,自然會吸引記者去追訪她。
 
黃尊義上了保母車揚長而去,大部份的記者都駕車尾隨黃尊義,有幾名記者發現布正麗,喊道:「黃尊義女友喺依邊啊!我地快啲過去。」
 
布正麗見狀立時上車,身為明星的我反而要充當保安員,阻攔記者們,我道:「佢唔係圈中人,你地唔好騷擾佢啦!」
 
一名記者問道:「成皇志,請問依位小姐係咪黃尊義嘅女朋友呢?」
 
記者問的這個提問,我亦希望布正麗可以告訴我。
 
我道:「唔好意思,我地要開車喇!依個問題你地問返黃尊義啦!」
 
幾經波折,我們才能夠擺脫記者的糾纏驅車離去,布世伯問道:「阿麗,妳究竟同嗰個黃尊義咩關係啊?」
 
「咩關係啫?我地係普通朋友之嘛!老豆,啲記者亂寫,你唔好當真先得架!」
 
布世伯道:「嗰個黃尊義係汶萊王子,屋企好有錢喎!筍盤嚟喎!阿麗,難得個王子真係鍾意妳,妳不如考慮下啦!」
 
布正麗道:「係啊!佢仲好靚仔添,不過佢依啲花花公子,年終都唔知同過幾多女仔講過相同嘅野啦!我先唔會咁蠢啊!」
 
布世伯道:「我地屋企阿麗又點係其他女仔比得上呢?係呢!黃尊義今次同妳嚟香港係咪見我依個家長啊?」
 
布正麗道:「緊係唔係啦!我地嚟係做野架!靜間佢出席個活動,我要幫佢化妝set頭。」
 
我訝異道:「吓!我今晚仲喺新月酒店訂咗檯,諗住同妳洗塵添。」
 
布正麗道:「個活動八點就完,夜晚食飯我應該趕到嚟!」
 
我還以為布正麗回來後,可以和她詳談一下近況,豈料她原來這麼忙碌,還是待會吃飯時才與她暢聚舊情。
 
 以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl
 
已有 0 人追稿