<第叄期實體書,經已有售>今年我三十三歲,回到了1998年 (校園、穿越、奇幻): 第二部曲 Chapter ６２-3　暗流（上）

 
來到日本後，Galaxy girl要去歌舞伎町拍攝外景，蔣家在這裡有些人脈，於是把Galaxy girl的外景拍攝工作交給蔣學勤負責，游大輝當然跟著前往，相信有蔣學勤在場監督，游大輝也不敢太放肆，我抽得時間參加了布正麗等人的飯聚。
 
聚會在一所裝潢較為陳舊的日式店鋪進行，席間有陳依官等一眾自強會的成員、布正麗、楊鳳瑤，還有布正麗口中那位斯文俊朗的日本男生，這名男生叫做宇佐汰勇。
 
宇佐汰勇並不像楊鳳瑤喜歡的瀧澤秀明，反而與另一位日本明星藤原龍也有幾分相似，宇佐汰勇與我第一次見面，他向我點了點，然後以半咸淡的廣東話與我打招呼，道：「你好，我叫宇佐汰勇。」
 
我有些錯愕，布正麗見狀，笑道：「我同你一樣初時都嚇咗一跳，佢居然識講廣東話，後尾先知道佢好鍾意睇大哥、哥哥同浩南哥嘅電影，佢問我地香港係咪好似古惑仔電影入面咁成日周街劈友？你話好唔好笑？」
 
宇佐汰勇聞言靦腆地笑了笑，一旁的楊鳳瑤幫腔道：「唏！你哋唔好笑佢啦！佢又未去過香港，唔了解都唔奇，當初我嚟到有好多野唔識，做咗好多瘀野，啲人當我怪物咁睇，佢幫咗我唔少。」




 
管佳莉插言道：「依啲文化差異，成日會鬧出好多笑話。」
 
一段時間沒有見面，楊鳳瑤越來越有櫻花妹的氣質，之前的短髮留長了，成了及肩長度的微曲髮型，衣著是當時日本最興的Sport-mix中性打扮，與她那種喜愛運動的個性很合適，不知是否她年齡漸長，還是因為異國的水土把她改做，我覺得她比以前更漂亮。
 
楊鳳瑤見我打量著她，她奇道：「咦！仲咩咁望住我啊？我有啲咩問題？」
 
我迴避楊鳳瑤的眼神，輕咳了一聲道：「無，我見妳個Look都好in，成個日本時尚達人咁款。」
 
楊鳳瑤驚喜道：「係咩？係布甸做我形象顧問㗎！佢同我一齊去涉谷買衫、set頭，講真我嚟日本咁耐都無乜行涉谷。」




 
布正麗以肩膀碰了楊鳳瑤一下，得戚道：「係咪啊！都話咗我嘅眼光同手藝係得㗎啦！」
 
楊鳳瑤吐了吐舌頭，道：「係喇！最叻係妳喇！」
 
我見宇佐汰勇靜靜的瞧著楊鳳瑤的神態，十足是一名思春少年，明顯是襄王有夢，而楊鳳瑤這個神女亦看來有夢。
 
楊鳳瑤道：「我哋無見一排，你哋嘅變化好大，布甸妳就成為咗黃尊義嘅形象顧問，成皇志仲厲害，有自己嘅娛樂公司同報社，我惡補緊日文，出年去考專門學校，唔知得唔得？」
 
布正麗安慰道：「妹釘，各人頭頂一片天，俾啲信心自己，妳得嘅，我初頭去台灣都唔適應㗎！慢慢就會慣，更何況有人會幫妳㗎嘛！」




 
布正麗的說話意有所指，楊鳳瑤臉上頰升起兩片紅暈，道：「都話唔係咯！妳成日亂講，佢識聽廣東話㗎！」
 
宇佐汰勇臉上聞現有些窘困，雖然我曾經和日本人談過生意，可是我對日本人的了解通常都是來自那些沒有穿衣的日劇，想不到日本男生的性格會這麼含蓄。
 
片晌，宇佐汰勇主動與我聊天，他讚賞道：「我聽楊鳳瑤講，你年紀輕輕，已經又係藝能人，又係企業家，好叻！」
 
聽說日本人是一個崇優的民族，他們只會尊敬強者，不過老實說我這種情況絕對是萬中無一，想到這裡我不禁有種虛榮感。
 
宇佐汰勇打量四周一眼，又道：「依度雖然舊啲，但係啲野好食又平、老闆又好人，你地覺得好唔好？」
 
「你唔好睇我係咩企業家，食飯就一定去啲高級嘅地方，反而我鍾意去依啲平民嘅地方，一班人飲飲食食無咁拘謹。」
 
此時，我的電話響起，走到一邊，按下了通話掣，原來是自強日報總編范孝直的來電，他道：「成生，上場全世界睇好法國，你獨家貼中塞內加爾爆冷，依家好多人留意我地自強日報嘅預測，之後嘅賽事，你有咩睇法？」
 




我笑道：「乜最近無咩新聞咩？連你依個老總都問我依個問題？」
 
范孝直笑道：「世界盃係四年一度嘅體壇大事，好多人都將個注意力放晒喺到，你有無咩貼士？」
 
我道：「今日報紙你都出咗啦！講嚟都無用。」
 
「成生，尋日我有位同事跟你買塞內加爾，贏咗大錢，我走咗寶，今日三場波，有無貼士？」
 
我笑道：「范老總，我仲以為你不食人間煙火添，估唔到你打長途電話問我攞貼士？」
 
「成生，我哋啲傳媒人跑新聞係職責，但係都要食飯嘅！」
 
今晚三場賽事：烏拉圭對丹麥，我只知道丹麥會出線，但這場賽事的比數是什麼，我已經記不起了；愛爾蘭對喀麥隆，完全沒有印象；最尾場的德國對沙特阿拉伯，這場我印象很深刻，是德國大炒沙特。
 
「今晚尾場買德國。」




 
「吓！德國？德國好熱吓喎！」
 
我道：「依場德國會大炒，外國啲賭波公司，德國淨勝六球以上有十五、六倍，馬交都係咁上下倍率。」
 
范孝直大喜道：「多謝成生。」
 
我想了想又道：「范老總，依個消息你圍內知好喇！唔好傳出去。」
 
「嗯，我知道㗎喇！成生。」
 
我想到把我的預知球賽的能力放在報章上，雖然可以讓自強日報更加得到別人的關注，可是這不過是一份免費報紙，我把這麼珍貴的消息放在這裡，只會弊多於利，如果別人跟隨我買同一樣注項，會讓賠率轉熱，又會讓博彩公司提高警覺，還是保持低調較妙，看來還是偶而在自強日報刊登一兩場心水較好。
 
面對一桌子美食飯桶武、矮仔文難抵引誘狼吞虎嚥起來，在旁的王采堤見狀急道：「喂，你哋做咩啊？會長去咗聽電話，等埋佢先啦！咁樣好無禮貌。」
 




滿嘴食物的飯桶武，含糊不清道：「啲嘢蓆痛咗……秋唔酷直。」
 
矮仔文夾了一塊甜蝦放進口，道：「怕咩啫！會長先唔會介意，唔夠再叫，會長尋日贏咗好多錢。」
 
陳依官笑了笑道：「王采堤，有佢哋啦！成皇志唔會介意嘅！」
 
宇佐汰勇看到飯桶武等人的食相，不禁一臉震驚，楊鳳瑤見狀不禁又尷尬又覺得好笑，道：「你哋兩個真係失禮死人，點帶你哋出大場面啊！」
 
布正麗道：「楊鳳瑤，見返我哋咁多人係咪好開心呢？」
 
楊鳳瑤道：「依層當然啦！不過可惜靜宜唔喺到，如果唔係仲開心啊！」
 
管佳莉插言道：「係呢！Humphrey，暑假喇喎！難得世界盃，點解靜宜唔嚟日本同我哋聚下啊？」
 
Humphrey吞吞吐吐道：「依排佢都有啲奇怪，唔知係咪拍緊拖呢？」




 
布正麗訝疑道：「乜靜宜拍拖咩？」
 
楊鳳瑤奇道：「有乜出奇啫！靜宜咁靚女，拍拖都好正常。布甸，你同嗰個汶萊王子成日出相入對，明眼人都睇得出佢鍾意妳，妳會唔會考慮下做佢皇后？」
 
王采堤聞言心中有一絲絲喜悅，布正麗、楊鳳瑤、呂靜宜都各有追求者，自己的機會豈非增加？
 
布正麗搖了搖頭道：「佢依啲大明星借我過橋啫！邊會真係鍾意我吖？唔好講依啲衰野喇！講其他啦！」
 
既然布正麗這樣說，楊鳳瑤也不再在這話題上糾纏，她的目光落在王采堤身上，道：「我以為我哋走咗之後，加入自強會嘅都好似矮仔文同飯桶武依一類人，估唔到有咁靚嘅女仔加入自強會。」
 
布正麗走到王采堤身後，雙手握著對方的肩膀，把她扳向楊鳳瑤，自誇道：「依位師妹就係我之前提起嘅王采堤，啲人叫佢做小布甸，當然同我依個正牌布甸有段距離，但都係一名靚女。」
 
楊鳳瑤拍了額頭一下，道：「知道妳係吳林紫娣嘅前校花，人見人愛、車見車載嘅布甸姐喇！唔駛兜咁大個圈去讚自己。」
 
王采堤終於見到吳林六美的楊鳳瑤，感到十分高興，布楊二人雖然相隔兩地，但從二人的相處，亦感到她們間濃厚的情義，暗恨自己如果早兩三年出生，自己便會成為她們的其中一員，吳林六美將會變成吳林七美。
 
王采堤道：「楊鳳瑤學姐，妳好啊！見到妳真係好開心啊！我聽到妳哋嘅事跡，一早已經想見妳。」
 
楊鳳瑤笑了笑，道：「估唔到我畀人叫學姐，真係老喇！點啊？小師妹，妳見到我真人，有無失望呢？妳令我諗起嗰個叫萬黛嘅女仔，佢又係受到啲傳聞影響，對我哋好好奇。」
 
王采堤搖了搖頭道：「點會失望？能夠見到妳真人，我真係好開心，我一直想畫一張會長同吳林六美嘅圖畫，依家見到妳，我只係差柳豔學姐，之後我就可以完成嗰一幅畫，唔知我有無機會見到佢呢？」
 
王采堤一提起柳豔，楊鳳瑤臉上的神色不禁有些黯然，道：「我都好耐無見過學姐，唔知佢依家點呢？」
 
布正麗安慰道：「妹釘，妳唔駛同柳豔擔心，我喺台灣撞過佢幾次，佢生活得好好，榮仔仲成日去搵佢，唔開心嘅野始終都會過去。」
 
楊鳳瑤嗯了一聲，道：「學姐命苦，之前發生咁多唔開心嘅野，佢唔記得都好嘅，希望佢以後都開開心心啦。」
 
王采堤看到因為自己的一句說話讓氣氛變得沉重，不禁有些愧疚，道：「對唔住，我唔係想搞到大家唔開心。」
 
「傻啦！邊關妳事，做咗咁耐人，實有唔開心嘅事，最緊要及時行樂，係咪啊！各位！飲杯！」布正麗舉杯笑道。
 
飯桶武舉杯應道：「係啊！布甸姐！」
 
其他人見狀亦紛紛舉杯和應。
 
王采堤心想布正麗豁達、友善、具親和力的表現，難怪宛琳珊容貌雖然不比布正麗差，又是大明星，但自強會的眾人總覺得布正麗才是吳林六美的首席校花，如果自己是男生也會為對方著迷。
 
布正麗道：「係喇！楊鳳瑤，之前妳話想趁依個暑假嚟東京做兼職，黃尊義想搵當地人做助手，佢出手都唔低㗎！妳同宇佐汰勇有無興趣？」
 
楊鳳瑤點頭道：「好啊！不過我對啲藝人工作咩都唔識，唔好嫌我阻住晒就得喇！」
 
「好簡單咋！佢主要想搵過信得過嘅當地做下翻譯，同其他人溝通，宇佐汰勇啲廣東話都溝通到吖！」
 
楊鳳瑤搶著道：「咁就啱喇！佢之前都係東京住過一排，對住度都好熟悉。」
 
這時我與范孝直通話後回來，看到他們交談甚歡，洋溢著宴會的良好氣氛，好奇道：「有咩咁好傾啊？咦！你哋班友唔等埋我就食，好無義氣喎！」
 
布正麗笑道：「唔係啊！咪留咗啲玉子燒同枝豆畀你囉！」
 
「妳……」
 
Humphrey笑道：「成皇志，唔夠咪再叫囉！聽講你贏咗柯恩隆幾百萬。」
 
我苦笑道：「Humphrey，連你都笑我，你唔好亂講啊！我未收到錢㗎！淨間啲人以為我好有錢，就大鑊喇！」
 
楊鳳瑤笑道：「我哋用廣東話講野，你估咁多日本人識日文咩？」
 
宇佐汰勇臉有難色道：「雖然好開心，但係我哋太過嘈，唔係咁好。」
 
我伸手指向布楊二人，道：「話緊妳哋啊！真係失禮死人啊！」
 
布正麗反罵道：「你就真係柒出國際喇！」
 
這時在店舖角落的一張桌子，坐著兩名男人，他們低聲以廣東話交談，一人道：「自鴻哥，嗰個靚仔開娛樂公司，不如綁埋佢，條友有份害死阿飛兩兄弟。」
 
那名被叫做自鴻哥的人，赫然就是現時香港的頭號通緝犯李自鴻，他口咬牙籤道：「沙灘仔，我哋嚟日本係求財，唔係求氣，班二世祖今日就到，我哋按照原定計劃行動，嗰個死花𡃁值幾錢？我哋今次食嘅係大茶飯。」
 
李自鴻都如此說，沙灘仔只好住口。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl