救爸行動1986(穿越)(愛情)(親情): 4
~「…痴線...緊係唔係啦。」我好緊張咁講。
「…嘻嘻...但係我琴日見到你攬住佢喎。」姑姐繼續奸笑。
「...er.....。」我er...左十幾秒都唔知點答姑姐好。
「...認左佢啦...你做到咁出面，係人都知啦...，吖...係咪未來啲女仔都咁主動0架呢...，
不過阿哥已經有女朋友架啦喎...而且仲好穩定添。」堂姐好認真咁講。
「…係呢...你有冇見過佢女朋友呀咁?」我問。
「...嘻嘻...認啦咩...，見係見過...佢間中都會離食飯架...，佢係陸上人住喺香港仔果邊...
屋企好似係開辦館架。」姑姐笑笑口咁講。
「…咩係辦館?」我問。
「…辦館好多野買架...零食呀...荷蘭水呀...雪條呀...果啲囉。」姑姐講。
「…咁...咪即係士多?」我講。
「…唔同...辦館高級啲...有酒賣架，係呢...未來冇辦館架啦咩?」姑姐問我。
「…嚇...我未見過囉...。」我答。
「…咁...要買依啲野要去邊度買呀?」姑姐好疑惑咁問。
「…er...超市...或者便利店。」我諗一諗之後講。
「…哦...係咪早幾年新開果間七十一便利店果啲呀?」姑姐問。
「...嚇...原來依家已經有seven架啦?」我好驚訝咁問。
「…seven?」姑姐問。
「…冇野...，係...呀...就係七十一便利店。」我講。
「…哦...。」姑姐講。
「…..嗯。」唔知依家嘅阿媽係點嘅呢。
「...嘻嘻...不過我覺得你省鏡過佢囉。」姑姐笑笑口咁搭住我膊頭講，其實我應該開心定唔開心呢。
「...不過佢人品幾好架，對阿爸阿媽都好有禮貌...所以呢...你都唔係咁易爭贏。」姑姐講。
「...你唔鍾意佢咩?」我問。
「...冇咩感覺...同佢都唔係咁熟。」無理由架...第時你地明明好friend架喎，
同埋其實你同我都唔係好熟姐...。
傾到咁上下，阿嫲都已經煮好中午飯啦，
所有人亦都返哂離大廳度準備開飯。
我同姑姐兩個閒人緊係拿拿聲衝出去睇嚇有啲咩幫手啦...，
排嚇碗呀...洗嚇筷子...裝嚇飯咁...。
「…拿...daddy...依碗你嘅。」嘻嘻...我裝左碗勁大嘅比阿爸...。
「…譁...咁大碗...唔該阿宜!」阿爸望到碗飯都o左咀...。
「...嘻嘻...你做野咁辛苦，緊係要食多啲啦。」
我笑笑口咁講，之後大家都開始食飯啦。
食飯途中我都不斷夾餸比阿爸，因為水上人嘅關係，其實主要都係得魚...。
食完之後執好哂野，阿爺就準備開船出返香港仔送魚啦，
其他人亦都跟埋出去，我緊係唔執輸啦...留喺度容乜易悶死架...，
我一枝箭咁標左上船，坐左埋阿爸側邊...。
「…嚇...阿宜...點解你唔留喺度呀?」阿爸好疑惑咁問。
「...留喺度會悶死架。」我瞇起眼睥住阿爸講。
「…嚇...悶死...，但係你都唔上得街，出去都冇用啦...。」阿爸講。
「…出左去先算啦。」出到去...幾大都偷偷地上岸...。
艘船好快就出到去香港仔，同琴日一樣泊左埋阿嫲屋企隻住家艇度，
之後啲人又好快咁各有各忙啦，阿爺同阿爸同姑丈就處理緊啲魚，
姑媽就照顧bb，輝叔個衰人一埋岸就已經冇左影...而姑姐就準備上岸...。
「…喂...帶埋我上去啦。」我叫住姑姐。
「...嚇...但係你冇身份證架喎。」姑姐講。
「...唔怕啦...你都話我唔似大陸人啦，唔會無啦啦有警察查我嘅。」
講完我就即刻翹住左姑姐...，姑姐亦都好無奈咁帶左我上岸啦。
我跟住姑姐行到去香港仔中心，譁...原來果陣已經有m記架啦，
姑姐帶住我行左入對面果間咩(吉利市百貨)，望落去有啲似而家嘅sogo咁...
一啲都唔覺得out喎...而且日本feel好重...好似真係去左日本咁...。
「…譁...依度一啲都唔噏dup嘅....。」我邊行邊講，
因為本來以為以前啲野一定會好舊，但係竟然...唔係囉。
「…嚇...緊係啦...依度好高級架...，平時我一個人都唔係好敢行入離。」姑姐好驚訝咁講。
「…er...哈哈。」唔知點答佢好。
「…死啦...遲到。」行左一陣...姑姐忽然望到個鐘之後就好緊張咁帶住我跑左過去m記。
譁...其實m記又好似同現代冇咩分別...只係啲員工制服...好old school咁...。
「…唔好意思，遲左小小。」姑姐行左埋其中一張枱度，同果幾個人講，
係幾個同我地差唔多大嘅人，三男一女...唔知係咪以前啲人營養不良呢，
全部都好鬼死瘦囉...我都算瘦架啦...兩個男仔都同我差唔多咁...係有個比較大隻小小。
「...鄭寶如...肯蒲頭啦咩，成日遲到...叫人等唔等你好吖...遲多五分鐘我地就唔等你架啦。」
女仔一見到姑姐就鬧，其他幾個男仔就冇出聲...繼續坐左喺度。
「...嘻嘻...今日大浪呀...老豆隻船都開慢左好多...唔好意思...。」姑姐繼續死狗...。
「...快啲啦...部72巴士就開啦。」女仔邊講邊拎起背囊...冇理到姑姐已經跑住出門口啦，
而其他男仔亦都一樣跟喺後面...，我同姑姐緊係緊隨其後啦。
好快就跑到去巴士總站，都冇時間望吓到底係咩巴士就已經跟住其他人衝左上部巴士度啦。
「…喂...阿妹...你未比錢喎。」我比司機叫住，而其他人已經衝哂上上層。
「...吓...er...冇散紙喎...。」頂...係喎...我邊有錢姐...
唔通比啲洋紫荊佢咩...又冇得用八達通....。
「...冇散紙係你嘅事啦...你自己搵人唱散佢囉...咁都仲要教。」真係聞名不如見面，
80年代嘅司機叔叔真係串到爆，著住件都唔知係咪制服嘅籃色背心...仲要著住對人字拖咁鬧我。
我扮哂搵散紙咁摷左陣...好彩姑姐識得行返落離打救我，
幫我入返錢之後就帶住我行返上去啦。
一上到去姑姐果幾個friend已經望到我實一實，女仔同其中一個男仔坐，
之後兩個男仔坐佢地後面，因為啲巴士一排係有三個位嘅，
姑姐行頭坐左埋去女仔隔離，搞到我即時企左喺度唔知點好囉。
「...阿宜...坐依度吖。」姑姐拍一拍佢背脊位，示意叫我坐埋去兩個男仔隔離，
大佬三唔識七好尷尬架嘛，啲位又勁窄喎，明明得兩個位嘅闊度，
咁都可以格硬整到三個位出離嘅...設計果個真係天才囉...頂佢。
「......。」就係咁...我好唔願意咁坐左埋去，
身貼身咁搞到我鬼死咁唔自在囉。
「…er...佢係我...er...堂妹阿宜呀，喺九龍果邊過離暫住喺我屋企度架...，
所以今日帶埋佢出離威。」姑姐好快咁介紹我比佢啲朋友認識。
「…你好...我叫阿晶，佢係阿強。」女仔首先介紹，
之後再介紹坐佢隔離嘅男仔，應該係佢男朋友。
「…你好...我叫家良呀。」到坐我隔離果個男仔介紹。
「...家良...?」家良個名....咁熟嘅，睇真啲...咦...喂...佢咪細姑丈...。