【真人真事改編】《去年暑假，我在街上賣寬頻。》: 《去年暑假，我在街上賣寬頻。》（三）
亞飛工業中心座落於葵涌健康街的一隅，附近都是一些工業大廈，還有汽車維修站。從溫莎堡餐廳走來不過一分鐘，沿途看見許多身穿制服的人，在大門外停車場空地，有幾個配掛著員工証的男女圍在一圈，邊抽煙邊談笑，不亦樂乎。
浩哥帶領我們三人經過詢問處，往右乘坐升降機上２３樓，閘門一開，「香江寬頻有限公司」的藍色大字與商標便映入眼簾。此時，我又緊張，又安心，緊張的是將第一次踏足大企業辦公室，安心的是可以確定我沒有墮入網上暑期工騙局。也許是我太多心了，浩哥說話正氣，看來也不像騙子，因為不知公司密碼，他便按下門鈴。
「係咪浩哥啊？歡迎歡迎！等你好耐啦！經理叫我等你上嚟簽約，搞到我連食個Ｔｅａ都唔敢去啊！」一名貌似藝員古明華的三十來歲鬍鬚男子開門迎接。「唔好意思，我哋遲咗少少，你一定係Ｐｅｔｅｒ嘞！一陣簽約單嘢就麻煩哂你！」似乎浩哥一早與上司約好時間帶我們上來，在Ｐｅｔｅｒ引領之下，我們來到了一間能容納八至十人的小型會議室。
「唔該你哋攞哂啲身份証、住址証明、學歷証明、銀行卡畀我影印啦，仲有兩張相，幫你哋整埋員工証，期間你哋就填咗枱上面啲入職文件先，今日就１２年６月８日星期五，記得啲字要寫靚佢噃！」Ｐｅｔｅｒ友善地說，然其聲線竟帶點女性的嬌柔，與其高大健碩的身材不成正比。他走出房門後，嘉寶便忍不住大笑了：「嘩哈哈，呢條友乜水嚟？生得牛高馬大，但把聲竟然係乸型，頭先忍笑忍得好辛苦！」我固然覺得Ｐｅｔｅｒ太神奇，而認真的文叔也不禁微笑起來，浩哥便答道：「佢係人事部嗰邊嘅同事，我都係第一次見佢，大家咪笑得咁大聲住，等簽完約慢慢笑！哈哈！」
填寫個人資料時，浩哥猛然一句：「啊！偉仔，你學歷嗰欄寫中七畢業好啦，千祈唔好寫你讀緊大學，唔係畀上頭發現你嚟做兩三個月就唔係咁好！」想不到浩哥也算心思縝密，我便按他指示去做，後來又填好七八份有關員工守則及聲明的文件，大公司果然是大公司，連簽名都簽得人手軟。最後，胡亂填了「強積金」投資百分比，全選了個風險較高的什麼「股票基金」，我不太懂得這方面的知識，但聽朋友說連保守的「平穩基金」都會蝕錢，倒不如刺激一點，況且這份工我又做不長。
二十分鐘過後，Ｐｅｔｅｒ回到房間，交還了我們的物品，收回了我們的文件，逐頁檢查，突然他質疑地問我：「咦！阿哥哥仔，啱啱影印嗰陣見到你會考同高考成績表，好似都有幾多Ａ同Ｂ喎，但係你冇升上大學咩？」我不敢回答，亦不能說出真話，只好瞪著浩哥默不作聲。
「嘿嘿！估到你啦，怕咩姐認衰鬼！嚟做暑期工吖嘛！我大大話話每個月影印人哋資料都過百次，咩人種都見過，你哋呢啲大學生點會瞞得過我雪亮嘅眼睛？嘿嘿！」Ｐｅｔｅｒ得意地道，然後又補充一句：「不過你放心啦，我唔會咁衰爆你出嚟嘅，但之前有大學生嚟做一個星期唔夠就辭職，我驚你捱唔住辛苦咋！」我抹了一額汗，幸好他也是個善良之人，真是人不可以貌相，我連忙向他道謝。「傻仔嚟嘅，洗乜客氣，嚟緊兩三個月要比心機搵錢錢啦！不過，你記住遵守員工守則，喺三日內染返黑啲頭髮啦，知冇？」雖然上大學之後變得年少輕狂，髮色不是啡便是金，但是為了工作，亦只好唯命是從。
接過員工証後，我便正式成為香江寬頻的一員了，隸屬於直銷部，職位美其名是「營業代表」（Ｓａｌｅｓ Ｅｘｅｃｕｔｉｖｅ），而文叔與嘉寶的職銜還因有經驗而被冠上「高級」二字（Ｓｅｎｉｏｒ Ｓａｌｅｓ Ｅｘｅｃｕｔｉｖｅ），當然底薪也比我高＄１５００，但在大眾眼中，我們還不是一個普通的「Ｓａｌｅｓ」，或只是個「Ｓｅｌｌ屎」。
「劉少浩，浩哥，恭喜你成為Ｔｅａｍ １８嘅『掃把』！」Ｐｅｔｅｒ語帶祝福，而我卻不太明白他在說什麼術語，唯一了解到的是，浩哥全名原來叫劉少浩。「我哋係第１８小隊？同埋咩叫『掃把』？仲有，我個員工編號『Ｄ０４６』有咩意思？」我就像新兵一樣連珠炮發地問問題。
「雖然我讀得書少，但都知道自己個職位英文名叫『Ｓｕｐｅｒｖｉｓｏｒ』嘅，精簡啲嚟讀咪取頭兩個音譯做『掃把』囉！」浩哥滿有自信地回答。「冇錯嘞！『掃把』其實姐係組長，負責監督你哋平時嘅銷售。直銷按地域分Ａ至Ｅ五大區，每區有三四隊人，都係各由一個『ＤＳＭ』，即係『Ｄｉｓｔｒｉｃｔ Ｓａｌｅｓ Ｍａｎａｇｅｒ』去統領，而你哋Ｔｅａｍ １８就屬於Ｄ區，呢區範圍最主要包括新界東。你係Ｄ區經理手下第４６個Ｓａｌｅｓ，所以編號咪『Ｄ０４６』囉傻豬！」
經過Ｐｅｔｅｒ詳盡的講解，我大致明白自己的崗位，亦頓覺公司分工相當有條理。忽然，房門被打開了，一名身材不高，戴著黑色粗框眼鏡的短髮男子走了進來，輕浮地問道：「啱啱喺門口聽到『Ｄ區經理』四個字，你哋講我壞話嚟啊？哈哈！」「邊敢吖經理，同啲新同事介紹下公司架構姐！啊！簽約已經搞掂哂，如果冇咩特別我返出去做自己嘢先。」Ｐｅｔｅｒ反應驚慌，說罷便急急離去。
「你哋仲唔快啲叫一聲堅爺？」浩哥站起來跟他點頭敬禮後說。原來，他便是我們的經理──曹人堅。
【 大學過後新丁一個
在大企業覓到優差已不錯
談談愛情玩塔羅
直到開花結果
似太美好道路也穩妥
卻有否想過哪裡出錯
可否試驗禁果
相信我直覺
不想走進軌跡裡渡過
〈悟入歧途〉 謝安琪 】