【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十四）
「喂喂喂！浩哥啊？我頭先終於開咗張單啦！」「掂啦！醒目仔！快啲講個客嘅料我知，幫你『過Ｑ』！」「過Ｑ」的「Ｑ」字代表什麼未曾考究，估計是「Ｑｕａｌｉｆｉｃａｔｉｏｎ」吧！總之，Ｓａｌｅｓ開單後，必先向組長稟報，交代合約內容與客人資料。然後，組長便會上報公司的電話支援組，留下記錄，十五分鐘內支援人員便會致電該顧客確認登記，整個「過Ｑ」過程方為完成。若然程序有遲延，對自己並無益處，因為如果客人後來由其他同事說服另開新單，並早於你「過Ｑ」，便會讓其捷足先登，那麼安裝上網後的合約佣金就歸入人家口袋了。
「同事你好，我係Ｓａｌｅｓ『Ｄ０４６』，請問我啱啱張單Ｑ咗未？」「幾分鐘前幫你過咗Ｑ啦！」「唔該哂你靚女！多謝你幫我Ｑ咗喺呢間公司第一張單！」「哈哈！再努力啦『Ｄ０４６』！遲啲有機會再幫你Ｑ單啦！拜拜！」十五分鐘後，我親自打上支援組詢問，聞得過程成功，一時心花怒放，尤其於夜晚十時收工前開單，有如足球比賽於九十分鐘前臨門一腳破網，奠定勝局，特別狂喜！我真的要多謝那位單身的斯文「西裝友」，因為舊合約快到期，沒有說什麼廢話就即場登記了，真夠爽快，是真漢子！
「浩哥，頭先打咗上公司，Ｃｈｅｃｋ張單成功過Ｑ啦！都就放工，如果冇咩嘢我執嘢走先啦！」「偉仔，咪返屋企住，頭先堅爺話想集隊，同大家傾吓計喎，十點半左右喺大圍『食神』等啦？」「吓？唔係掛？都成夜晚十點啦喎，仲要去集隊，經理係咪傻㗎？」「唔知啦！我都唔想，佢落Ｏｒｄｅｒ我都唯有照做，你執埋嘢就嚟啦，你搭馬鐵好快姐！」這個命令真令我不快，企了一整天街，身心俱疲，放工去「談天」又沒有ＯＴ補水，即使剛才「一單定江山」，完場後難免精神萎靡。
走出大圍站Ａ出口，又是一片熟悉的景象，畢竟我經常到附近唐樓下的食肆尋覓美食，皆因「沙田友」都知道大圍是本區的「美食天堂」，並未如新城市廣場般林立連鎖式餐廳，亦無太多自由行旅客入侵，可以吃上一餐特色美食。左方綠色小巴站於此時份已不人頭湧湧，反而對面馬路的小食店依然門庭若市，街坊都爭相買下魚蛋、牛雜、煎釀三寶作夜宵，隊友未到，我也邊等邊吃了一串炸大腸。
大圍「食神」即是Ａ出口馬路右方的廿四小時營業茶餐廳，是一個銷售點，但嚴格來說我們並不會在餐廳門口開壇，因為門外有露天座檯讓大叔們飲酒、吸煙與吹水，根本沒有空位。故此，我們會在餐廳對面馬路的「紅福堂」涼茶店外，靠著欄杆安置攤位，「食神」是一個區域「重鎮」，平日車水馬龍，是附近居民出入之必經點，非大區的Ｔｏｐ Ｓａｌｅｓ不能鎮守，免得客源流失。
不一會，Ｌｅｏｎ於碩門邨搭馬鐵率先趕到，浩哥、嘉寶與文叔亦陸續到來，他們站在垃圾筒旁點煙「打邊爐」，但是都不多說話，就連平日瘋人瘋語的嘉寶也收斂不少，分明是對這次集隊感到相當沒趣。期間，聽他們說到堅爺住在美林邨，所以平時有什麼事都會叫手下們到此參拜，而他從不會請手下一起到對面「食神茶餐廳」把酒當歌，暢談工作大計。唉！我一開始還以為他起碼會闊綽地請我們吃個常餐吧，怎料我們到此只是讓他乘地利之便而已……
又過了幾分鐘，堅爺才慢條斯理地從美林邨方向步行過來，明明說十時半等，他卻十一時才現身，當自己是大人物嗎？「你哋Ｔｅａｍ １８都做咗一個禮拜，覺得點？」他神情詭異地問。
「都冇咩吖，幾好玩喎！仲開咗兩張單添！」嘉寶自滿地道。「你做得好！咁其他人呢？好似一張都冇喎！」他用眼光不停掃瞄我們三位男丁，我忍不住給他一個驚喜：「其實我啱啱開咗一張……」「係？有夜數喎，唔錯，估唔到你白紙一張都有成績，但係阿文同Ｌｅｏｎ哋兩個點解咁失威，連偉仔都有單開，你哋竟然一個星期都冇進帳？」堅爺將矛頭指向其餘二人。
Ｌｅｏｎ帶點抱怨道：「唉，我都想開單啊，但係碩門邨呢個地方，真係荒島嚟！一來住客唔係話太多，二來附近又係工廠區，成日拍烏蠅，想拉客都拉唔到啦……」文叔則保持緘默。「我就唔信你做咗幾日連一個Ｐｒｅ都冇囉，你哋都知我請你哋條Ｔｅａｍ返嚟有咩目的㗎啦？我哋而家五個大區比緊賽鬥開單㗎，而我哋區總成績暫時排第四，但係我哋有最多人手啊，搞到我今日仲喺公司比其他經理笑手下太多冗員……」堅爺連珠發炮，像中學的訓導主任罵個不停，但我心想：難道你用言語「插」我們，我們就能夠開單嗎？如果是這樣，我不介意日日來「食神」集隊呢！
「嗱，呢度就有幾張電話卡，今日喺公司攞嘅，你哋每人一張，雖然冇數據，但係就有每個月３５００分鐘通話時間，畀你哋同啲客溝通同埋打返公司用嘅！」我們接過電話卡後，他又補多一句：「你哋返工嗰陣一定要開住呢張卡，我有時會用『ＧＰＳ』睇吓你哋有冇偷雞行開，所以你哋要醒醒定定，同我準時開工，之後打上公司報到，千祈唔好遲到同射波啊！」說罷他便獨自進入「食神茶餐廳」吃宵夜。
馬鐵歸程途中，我不停打盹，突然電話一震，原來浩哥給我發了一個短訊──「偉仔，你今晚開咗單，所以聽日６月１５號休息一日先啦，星期六再換位搏殺過！」閱畢，我覺得放假比成功開單更為愉快……
【 現在盡量放任吧
現在盡量快樂吧
現在盡量紀念吧
始終都須要回家
〈假期〉 王菲 】