【真人真事改編】《去年暑假，我在街上賣寬頻。》: 《去年暑假，我在街上賣寬頻。》（三十三）

　　文叔大吐苦水，在座組員聽後無不感嘆，就連嘉寶都變得沉默。振波問：「阿文叔，咁你打算點？仲會唔會繼續做呢行？我可以問一問其他公司啲老友。」文叔搖了搖頭，答道：「再做唔做呢行，真係唔知道，而家最重要係要照顧好我阿媽先。」
 
　　「有咩需要即管開聲啊，當初邀請你幫我手，你明明同堅爺有過節，都冇托我手踭，唔係真係開唔成Ｔｅａｍ，真係要多謝你！」浩哥跟文叔道謝，文叔卻言：「客咩氣吖？唔係好似你咁有義氣嘅『掃把』，我都唔會跟啦！放心喎，好彩之前樓價低嗰陣喺觀塘買咗間居屋，同埋都有做下投資，爛船都有三斤釘，衣食住行都暫時維持到嘅……係有個仔下年升中六姐，要考公開試，令我最唔放心，望就望佢考入大學啦！」
 
　　「咦，乜文叔你有個仔升中六咩？第日需要補中文可以搵我噃，或者介紹啲同學幫佢補其他科都得！」我說。「偉仔，有需要會搵你㗎啦！如果我個仔好似你讀書咁叻就好，你都要讀好啲書，第日貢獻社會，知道嗎？仲有一個月暑假，就好好體驗下呢份工啦，後生仔，捱吓好！」文叔語重心長，一個中史科老師的形象，如在目前。
 
　　突然，志龍大嚷：「咪講咁多廢話啦，文叔又唔係移民，暫時放下假姐，難得咁齊人，不如叫返兩支『青島』啤一啤佢啦！」此夜，在「食神」餐廳內，我們敬文叔一杯，為他餞別。
 
　　天下無不散之筵席，這次文叔離隊，心情已沒有那麼忐忑，可能因為早前Ｌｅｏｎ已開先例，讓我對工作伙伴的離離合合有了一個心理準備。文叔說得不錯，後生仔，應該要捱一捱，不然讀完大學好像很離地似的，沒有工作經驗也對事業發展沒有幫助。
 




　　自從六月初成團隊至今，時有人事變更，我們Ｔｅａｍ　１８的班子，已與剛成立時有頗大分別，懶惰成性的Ｌｅｏｎ與溫文爾雅的文叔不在了，我們小組現只餘五人──重情重義的組長浩哥、古靈精怪的矮子志龍、瘋狂刁悍的女將嘉寶、沉實穩重的漢子振波，以及我──探索世態的書生偉仔。
 
　　入行一個月，工作上手了，好戲還在後頭呢！
 
【　其實　命運就像大廈
　　如都市幻化　凌亂如燈火中的密碼
　　露台　看看世界吧
　　這個天下　閃爍風光不再嗎
　　經過幾多變化　
 

　　〈森林〉　Ｍｒ　】
 
請支持Facebook專頁: 大雞小事 ( https://www.facebook.com/bigchickenlittlethings )