(純愛、洋蔥、懸疑)她從A片走出來(舊名:我女友竟是田中美佐)(更新至結局): Chapter 93

Chapter 93
 
大舊總算把濕透的衛衣釣回來，他不敢揮桿，坐在我一旁道：「依度係西貢噯？我突然間諗起一個關於水鬼嘅故事！」
 
大舊壓下聲線，繪聲繪影地描述：「話說有一班人好似我地咁租船出海，嚟到依個水域附近游水嚟游水，浮潛嘅浮潛，係回程嘅時候，有人數人頭數：『一、二、三、四…八、九、十。』佢地發現本來一行九人，突然之間多咗一個，再數一次都係有十個人。」
 
結子嘩一聲哭了出來，捂住耳朵道：「嘩，好驚啊！我唔聽啊！」
 
大舊連忙安撫道：「結子唔駛驚，你聽我講埋落去，原來數人頭數嗰個數埋個船長啊，所以先數多咗一個咋！」
 




結子聞言破涕為笑。
 
Kelvin一臉肅穆道：「唔好搵依啲嘢講笑啊！依一帶水域嘅暗湧好厲害，有幾宗遇溺意外係度發生，之後就有水鬼搵替身嘅傳聞，半年前，有一名潛水老手在這裡差啲命都無，佢同我講好似有幾隻手一齊拖佢落水底，佢不斷掙扎先游番上水面；仲有係一年前，有三條友係夜晚揸小艇出海釣墨魚，佢地不斷聽到有把女聲不斷叫救命，但係用電筒周圍照都無發現，佢地以為聽錯，於是繼續釣魚，突然其中一人發現好似有收穫，諗住收桿，但係佢發現水底下面有一股力量同佢角力，佢心諗依條魚應該好大條，最後三人合力，終於成功收桿，佢地發現釣起嘅唔係魚，而係一個旅行喼，喼邊凸出一撮頭髮，喼裡面收埋咗一條女屍。」
 
結子再度大哭，大舊哄道：「結子乖，唔好喊！」
 
大舊轉向Kelvin，兇巴巴道：「死麻甩佬，你唔好作故仔嚇小妹妹先得架。」
 
Kelvin一臉無辜，辯道：「我唔係吹水架，依單嘢報紙都有賣架！」
 




大舊道：「就算係真嘅都唔講得。」
 
Kelvin沒有理會大舊，道：「咦！有魚上釣，嘩，好重磅啊！一定係條大魚嚟架。」
 
我見Kelvin滿臉通紅雙手握著彎成近半月狀的魚桿，均認同Kelvin的話，這一定是條大魚。
 
大舊惱Kelvin弄哭結子，擱下狠話道：「死麻甩佬，你釣嚟可能係藏住女屍嚟喼，你恨到啦！」
 
一個黑影衝出水面，那赫然是一條長近一米的鯊魚，驚鴻一瞥間，鯊魚已經咬斷魚絲，重投海中。
 




倏然出現的鯊魚令我們怔仲了片晌，我想起了正與圭司浮潛的阿俊，我不禁向著海中大喊：「阿俊，有鯊魚啊！快啲返嚟啊！」
 
Kelvin道：「喂！阿帥嗰條係青鯊嚟咋，而且咁細條，唔會傷到人架？」
 
我緊張道：「我地只係見到一條細嘖，可能有幾條大嘅我地見唔到呢？」
 
此時，阿俊與圭司回到船上，兩人以日語和廣東話交談，圭司豎起拇指讚道：「你真係ＥＡＴ滋班架！好熟水性架！」
 
我瞧見阿俊，立時道：「阿俊，頭先我地見到鯊魚，你無事嘛！」
 
阿俊猛然摟著我，在我耳邊輕聲道：「我依家係達輝啊！」
 
剛才因為我擔心阿俊遇險，所以我不禁呼喚他真正的名字。
 
我心想：「應該沒有人留意到我剛才把達輝喚成阿俊吧！」




 
豈料Jude問道：「阿帥，邊個係阿俊？頭先你不斷叫阿俊阿俊。」
 
「嘿嘿！阿姐，妳係咪聽錯咗？」
 
Mandy道：「唔係喎！我都聽到啊！」
 
大舊和阿雄也附和道：「我地都聽到啊！」
 
一時之間，我不知如何解釋，阿俊連忙打圓場道：「其實係咁嘅，我細過嘅時候，我嗰乳名叫阿俊，阿帥細過嘅時候嚟我屋企玩，之後一直咁叫，叫慣咗咪一時改唔到口囉！」
 
儘管這解釋很牽強，其他人也沒有再追問。
 
阿俊瞧到Kelvin魚穫甚豐，提議道：「不如就地取材，我為大家整番幾味撚手小菜。
 




阿俊拿起魚生刀，手起刀落，把新鮮的海產剥皮、起骨、放血、去內臟。
 
圭司讚道：「好刀功架！」
 
阿俊拿著亮晃晃的刀遙指圭司，笑道：「圭司，你信唔信我唔駛二十分鐘都可以將你肢解成咁樣。」
 
圭司笑道：「我唔信架！你試畀我睇架！」
 
阿俊笑道：「哈哈，我都唔信可以囉！」
 
不知怎地，當我看到阿俊神色淡然說要生劏圭司之際，我感到一點心寒，彷彿阿俊並不是說笑，而是要把說話化成真實。









以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl