【愛情】《彼此最遠的距離》: ——後記——

100012字嘅一篇愛情小說，從來不相信一個當初覺得寫四百字好難嘅我可以寫出一篇十萬字嘅文章，但我卻確確實實地做到了。
唔知由幾時開始，發覺自己好中意睇小說，同時好中意代入小說嘅畫面。好羨慕作家可以「創造」一個世界出嚟。因爲男主角係佢，女主角係佢...呢個世界亦都好吸引我。
 
慢慢咁開始咗寫作，由一開始打到大把錯字、打到爛尾...到宜家可以打到一篇十萬字既愛情故事，過程的確令我好享受其中，追夢亦如是，過程...總比結果重要。
 
「彼此最遠的距離」，當初只係以身邊既一切作寫作藍圖，去睇戲、去識女仔......好鐘意一種亦真亦假嘅感覺：好似寫緊自己嘅故事，又好似係寫緊齊樂爲既經歷。
 
故事名雖然係負面，但其實一開始係諗住作Happy Ending的（因爲本人比較喜歡一家團聚BBQ式結局），而故事既大綱就係寫一個宅男去追女神，雖然距離好遠，但最後終於追到。
 
不過後來覺得，世界上唔係每件事都有完美結局，現實往往充滿住後悔，所以決定取消一開始既念頭，寫成你宜家睇到嘅結局。


 
我嘅創意有限，劇情可能你都已經諗得到，我嘅文筆亦都未係優美，只能寫出心中所想。但我對寫故嘅熱愛，的確係無窮無盡。
 
每一個正評（高登），每一個追稿（紙言），每一個留言對我嚟講都好重要，因爲佢哋比咗我更多動力寫落去。
 
尤其當有人催我要快啲出文嘅時候，其實心入面都會有種滿足感。
 
前幾日連續通宵趕稿之時熬出傷風，日日對住部電腦咳到肺都冇，但今日聽住《耿耿於懷》，寫到「全文完」嘅時候，心中嘅成就感真係無比巨大，前幾日辛苦都值得了。
 
不過亦同時表示，我要對一個故事、一個世界say goodbye了（不捨


 
最後，希望大家會中意呢個故事吧！亦希望中意呢個故事嘅各位會繼續支持我以後嘅作品！
 
再次多謝一路上支持過我嘅人~
 
在此祝願各位聖誕&新年快樂！
 
倖存 筆