一次無心嘅表白，竟然令到佢同咗我一齊: 第二十六章

我講完之前，電話另一端嘅佢哋先係靜咗一陣，之後chloe先開口話：

「距離四月一日仲有成半年喎。」

「我呃你哋做乜啫！」

之後到hailey出聲：「Wow，點識架？乜你都會有人鍾意架咩？」

「挑，愛情呢家嘢，你哋識條春咩！勁舞入面識架咋麻！」



Chloe：「下，你網戀當拍拖呀？真係好毒囉……」

「頂你，唔係呀，開頭本身係網戀，但之後見過面，今日佢仲上咗嚟我到，咪啱啱你哋打嚟我話唔得閒嗰陣囉。」

Chloe：「咩話？仲上埋你屋企？唉，冇啦，香港又少咗個良家婦女啦……」

「你咩意思先？我哋乜都冇發生過喎！」

Chloe即刻轉調，用把懷疑嘅聲線話：「唔係掛，有女上你屋企你都唔食？唔似你喎！」



之後chloe一言我一語咁，但hailey就好少出聲。

「hailey呢？失咗蹤呀？」

「冇呀，聽緊你哋講嘢咋麻！咁幾時帶阿嫂出嚟俾我哋見吓呀？」

其實我唔知啲女人真係對認識新朋友有咁強嘅意慾吖，定係咩原因。阿靜同hailey就好似夾埋咁，對我身邊嘅人都咁有興趣，都唔知係咪有潛在同性戀傾向！

Chloe附和hailey咁話：「係囉，帶出嚟俾我哋睇下都好吖麻！明明有條友話愛我一生一世，而家半世都未夠就變心，睇下阿靜係咪真係咁吸引都好呀！」



其實係呢到我奉勸所有女性，男人講嘅嘢從來都係齋講唔做，或者衰啲嘅直頭做完都唔講，總之就同屌你老母句嘢一樣，得把口，信唔過架！

雖然俾chloe窒到毫無反駁嘅餘地，但處於熱戀期嘅人個腦充斥住甜蜜，點會在意點俾人串吖！

「咁你哋幾時ok，我咪約埋佢囉！」

呢一晚，平日都幾多嘢講下嘅hailey今晚一反常態，只係做一個聆聽者，全晚就只係得返我同chloe你一言我一語咁串嚟串去，hailey只係間唔中用阿嫂嚟入一入我。

到咗第二朝，因為阿靜話想早啲上嚟我到，所以9點鐘我就出咗地鐵站接佢。

第二次上嚟嘅阿靜已經冇噚日咁怕羞，開始會係屋企周圍行。本來都冇咩問題，但當佢係我間房嘅衣櫃見到我以前啲衫嗰陣，拎咗出嚟恥笑咗我幾分鐘，仲幾乎要我著上身俾佢觀賞（深入咁恥笑）。

原來佢睇我啲衫嘅同時，係櫃入面發現咗我遺忘已久嘅大富翁。呢副嘢嘅年歲比起我同hailey同chloe嘅友情更長，但因為我住得遠，所以冇人想上嚟我屋企嘅關係，我玩咗幾次就擺埋咗一邊。

阿靜一見到，就拎咗出嚟叫我陪佢玩，既然我嘅小寶貝咁有雅致，我梗係唔會拒絕啦！



其實我細細個開始已經好鍾意玩大富翁，因為係呢副嘢入面，係我唯一唔受黑仔嘅命格所影響嘅地方。而且玩親大富翁我就有種異常興奮嘅感覺，望住啲人踩落我啲地，對手嘅錢同啲屋契一張張咁變少，我就好開心。鬼叫我黑開咩，有得贏梗係贏盡架啦！

所以其實我都可算係大富翁嘅長勝將軍（係未遇到阿靜之前）！開頭玩嘅時候都幾興奮，但玩到中後期，起咗幾間屋嗰陣就開始灰……

基於可能有人冇玩過嘅關係，我簡單咁講解下隻game點玩啦。基本上隻game就係用擲骰仔嘅點數嚟移動你隻棋，鬥快買地起屋，你踩到人哋塊地就要錢俾人，反之亦然。去到最尾冇破產嗰個就贏啦！

其實隻game本來係好刺激架……但當我係最貴嘅山頂起咗幾間屋嘅時候，阿靜踩咗入嚟……佢直行直過……

我苦笑咁問：「做咩呀你……？」

「咩做咩呀！你咩都睇唔到！」阿靜又擺出一副扮無知嘅樣。

我只好繼續苦笑，不過雖然係苦笑，但其實個心依然係好心甜。一條毒撚有個靚女係到耍萌咁同你玩大富翁，真係夫復何求呢！



其實同阿靜玩真係覺得佢好公平架啫！佢行過我啲地一係就睇唔到，一係就唔俾錢（雖然兩者冇分別），而我行過呢就公事公辦，冇錢就要押地，你哋話真係幾公平呢係咪！

所以我呢個長勝將軍係同阿靜玩嘅時候，已經唔再用最後勝利為指標，我可以同佢玩超過半粒鐘一場我已經當贏咗架啦！

玩咗幾場咁實力懸殊嘅大富翁之後，都差唔多夠鐘食晏。於是同阿靜落街買咗啲壽司返上屋企，一邊睇碟一邊食。其實睇咩碟一啲都唔重要，重要嘅係陪係你身邊嘅人。唔覺唔覺睇完套戲，阿靜又話眼瞓，咁我梗係叫佢入我房瞓架啦。

「你抱我入去！」阿靜一世說話就驚醒咗我嘅大腦（當然係男人用嚟思考嘅大腦啦）！

咁有個靚女叫你抱佢，梗係冇理由拒絕架！點知一抱起，仆街，點解咁瘦都咁重架……

Fine…我認我唔夠力，但肥真係唔等於大力架麻！由廳入房條路本身3秒唔洗，但就因為抱住阿靜，再加埋途中唔小心咁令阿靜個頭呀，身呀，腳呀分別撞向唔同地方，所以我行咗30幾秒……

入到房，一埋到張床，我幾乎係用「撻」嘅方式將阿靜掉落床……而我亦因為抱完阿靜，個人企唔定，都失平衡跌咗係阿靜身上，但好彩我及時雙手撐返住張床，如果唔係屋企好可能發生命案……

但正因為我撐住咗個人，同阿靜對眼成水平線咁對望………………



《我愛你，所以我願意縱容你一切的小野蠻……》