一次無心嘅表白，竟然令到佢同咗我一齊: 第三十二章

阿靜：「八婆，你做咩成日纏住阿恆呀？」

Hailey：「死八婆鬧邊個呀？你同佢識咗幾耐呀，憑咩同佢一齊呀？」

Chloe：「咪係囉，阿恆鍾意我在先架，你？水泡咋！」

三個女人係條街到互相推撞。

阿強：「風頭火勢你想幫邊個啫？」



就係佢哋爭論得興起嗰陣，「阿恆」話：「你再唔起身，你又遲到架啦！」

「呀！！！！！」瞓瞓下覺嚇醒，電視劇就睇得多，親身體驗都真係第一次……

我望一望手機，原來5點都未夠……不過嗰夢恐怖到連開住冷氣都出哂汗咁，好明顯我需要減壓……於是我做咗樣10年唔做一次嘅嘢……落街跑步。

對我嚟講跑步唔係為咗減肥，而係我好嚮往嗰種疾風馳行嘅感覺。將所有嘅壓力由起點開始爆發哂出嚟，跑到冇氣先停低不停重複到冇哂力為止，呢個就係我其中一個減壓嘅方法。

唔好問點解會跑步都咁係咁肥……因為我體力有限，爆發咗20分鐘已經乜都冇哂，連脂肪都未開始燒，減乜春吖……



返上屋企沖完個涼之後，就出咗門口。

上到車之後，我打咗俾阿靜。

「hello~」

「嗯…」我唔係想心邪，但咁多年嚟無論叫chloe、hailey、其他女仔fd甚至今日叫阿靜起身，都發現一樣好有趣嘅事…全部啲聲線真係好似「這個國家地理頻道」啲女主角做緊運動嗰陣咁……

「起身啦…」



「嗯…」

我之後無論講乜都係嗯我…我相信佢應該都聽唔到我講乜架啦！

「你係傻嘅！」

「嗯…」

「不如我哋試下攪嘢啦！」

「你講多次！」我屌…

「你睇下我幾成功咁叫醒咗你！」原來都市傳說話扮瞓嘅人最難叫醒係真嘅…

「你啱啱講咩話！！！」



「我話叫你快啲起身刷牙洗面洗頭沖涼換衫出門口啫！」我頭先咪就係講呢啲囉，唔係咩？

「一間先同你算帳，我起身先啦，出門口打俾你！」

係阿靜屋企樓下等嗰陣，見到好多學生妹行過，咁望兩眼好正常啫！點知咁啱有警察行過，加上我個樣毒得滯，眼神有啲閃縮，佢哋真係走埋嚟查身份證…

「喂，仔，係到做咩？」

「等人…」

「等人？等人定人呀？」

我雖然毒矮柒肥樣樣齊啫，雖然個樣某程度上係樣衰啫，都未至於色狼樣呀……



我即刻打俾阿靜……

「嘟…嘟…」媽呀……點解呢個時候都冇人聽架……

連救星都等唔到嘅我，唯有死死地氣咁企咗係到…等佢哋拎副手扣出嚟拉我返差館告我視姦女學生…

「拎返住佢。」之後佢哋頭也不回咁走咗。

基於毒撚第一次俾人查身份證，見啲差人問咁多嘢，真係以為要俾人查返三，四粒鐘，俾佢問到祖宗18代連埋隻狗啲後代係咩品種先走得架…不過而家當然好清楚因為佢哋返工返到悶想搵人傾計啦！

過咗陣，阿靜終於落嚟，我將呢件事話咗俾阿靜知…包括女呢件事。

「頭先我真係以為會俾人拉返去飲咖啡架，啊唔係，可能飲廁所水迫供添架…」

「哼，抵你架，鬼叫你咁咸濕呀！仲有呀，今朝你講咩話！？」



咸唔咸濕呢樣嘢好見人見智架啫，不過都係個句啦，人類唔咸濕你今日仲企到係到話我咩！

「我今朝話，你咪成日想見hailey同chloe嘅，噚晚問咗啦，佢哋問你聽日得唔得喎。」

「好~呀~」

阿靜嘅語氣彷彿話我知…佢好想嚟個了斷咁…

《仍記得，當日你為我而妒忌的臉，當日的我，多麽的幸福……》