阿靜講完呢句,我除咗感受到阿靜言語間對chloe嘅妒意之外,仲感受到自己命不久矣。

「喂,我都未介紹,你又知邊個hailey邊個chloe?」

「唓,枉你成日自命好記性,你之前同我講起你女神嗰陣,咪俾過佢fb我囉,咁佢有相架麻!」

我都未應得切,佢哋已經到咗。

Chloe仲要首先開聲話:「呢個就係阿嫂啦?」



我笑笑口咁介紹:「係呀,佢叫阿靜呀。」

係呀,佢叫阿靜呀,係咪好靚呀?係咪估唔到你因為個樣而拒絕不下數百次嘅我會有個咁靚嘅女朋友呀?你唔鍾意我咋,你見唔見到呀,我係有人鍾意架以貌取人嘅死港女!

其實問心,我識chloe識咗5年,鍾意咗5年,亦都做兵做咗5年……如果話冇憎過佢,我諗講出嚟呃到自己都呃唔到阿強。我唔知呢一刻,我拖住阿靜隻手,係因為愛佢吖;定係想做俾chloe睇,係有人願意俾我拖……

係互相介紹完之後,我哋就去咗附近到行街。不過望住呢三個女人,不禁令我泛起一絲心寒嘅感覺。3個人嘅面上都掛住個明顯係扮出嚟嘅笑容,實質就笑裡藏刀,而呢把刀都不約而同咁指向我嘅海綿體思考神經系統……

雖然話一齊行街,但我就掛住同阿靜傾計而冷落咗另外兩位大小姐,所以每隔幾分鐘就會聽到啲有骨嘅空氣。



Chloe:「唉,啲人剩係理阿嫂得啦!」

Hailey:「係囉,唉,我哋相依為命算啦!」

阿靜:「阿恆,咁你就唔啱啦,點可以掛住理女朋友而唔理你啲好朋友呢!」

去到呢一刻,我突然覺得嗰啲乜撚嘢老婆同老母跌咗落水我救邊個先嘅問題係小兒科,見住呢個三雌鼎立嘅局面,真係難以想像何鴻燊點可以有幾個老婆……

「啫係咁,咁你哋兩個可以互相陪大家架麻,但我冷落阿靜嘅話佢好悶架,乖啦好冇……」



Chloe:「唉,阿嫂就好啦,人哋咁錫佢!」

聽到呢到我真係忍得幾辛苦先冇爆句屌你老母出嚟。大家都知我平時幾斯文架啦,就算爆粗都係迫不得已,而且我通常都堅守住鬧還鬧,唔好禍及家人嘅原則,人哋屋企人又冇錯,作為人哋呀媽,點會諗到生條撚樣出嚟做埋啲乞人憎嘅事而累到自己俾人屌先得架。

但係chloe嘅一句說話真係差啲令我想搬哂佢祖宗18代出嚟問候,再詛咒佢18世後代。你咁羡慕阿靜做咩?對佢好嘅係我呀,一個你一直都唔受嘅人呀!你而家羡慕乜撚嘢呀?而最悲哀嘅係……我連想對住chloe講一句:「如果你肯嘅,我都可以對你咁好!」嘅機會都冇……

Chloe講完之後,hailey又搭多句:「係囉,唉,我哋呢啲small potato,係應該要擺後啲架啦……」

俾chloe嘅說話刺激完之後,我連反駁嘅意欲都冇埋,只係繼續同阿靜傾計。

但傾傾下,阿靜再次係我耳邊話:「啊,chloe對波真係好大囉!佢大過我呀!!!」佢一邊講一邊揈我隻手,彷彿話我知佢好妒忌……

「傻瓜,我鍾意洗衫板架!」係講完之後我先意識到呢句說話係幾嚴重……

阿靜隻手已經係我嘅手臂上作好搣我嘅動作,而且今次仲擺出個比過往更和善嘅表情出嚟:「你!試!下!講!多!次!」但我唔講,阿靜都已經搣咗落嚟……而且仲係係啲最唔受痛嘅手臂內側位……



「啊!!唔係呀…啫係呢,我意思係,我鍾意啲普普通通,唔洗咁大,好似你咁嘅就得架啦…啫係當然唔係話你係洗衫板,而應該係話你嘅身材已經好完美啦!」(係我眼中)。不過我基本上係冇得兜…

「係咩,咁你又鍾意咗chloe咁耐!?」

「冤枉呀大人,我都唔係鍾意佢對波……」

「哼,唔理呀,而家佢大過我呀,我嬲呀!」嘩,咁講嘅話,你唔應該見我其他女性fd架啦喎……

「咁……你想點吖……」

「唔知呀!唔理呀!」咁我都唔知唔理得唔得呀……

基於我哋幾個都係唔鍾意行街嘅人,所以搵咗間甜品店坐低。



叫咗啲咩我已經冇乜印象,但我剩係記得chloe同hailey都不忘抽一抽我水。

「你哋都夠甜啦,食咩糖水啫!」

「係囉,仲要你一啖我一啖咁!」

「哎呀,hailey,我又要你餵~」

「哎唷,chloebb,呀~」

終於,食完糖水之後佢哋話要返屋企,唔阻住我哋二人世界,不過chloe臨走之前都要害多我一獲:「返到屋企打嚟呀!」

「你哋走先啦…拜。」永別啦人類世界…

阿靜見我眼神閃縮,就話:「唔洗咁驚喎,我都冇話啲咩,定係…你心虛呀!」



我天不怕地不怕呀,我洗心虛!

但我怕老婆…我認我心虛……

《恨一個自己深愛嘅人只係表示自己愈放唔低,只有佢嘅一切再無法令心中泛起一點漣漪先稱得上為放低……》