其實我自己都唔知自己鍾意咩女仔,或者我過去太注重女性既外表,當問我鍾意咩性格,我真係無所謂,而且我朋友都唔多個,對人,我真係無從入手...
「James,Jay同Johnny入我房,有野傾。」
困難來到既時候,搜集資料係其中一個辦法。
「係,你地三個都有拍拖喎,可以講下關於拍拖女朋友啲野嗎?」
「咁你想知道啲咩?」James第一個問,佢大我五年,聽人講佢出年同係埋四年既女友結婚...
「唔...講你地鍾意咩女仔?」
James:「我比較鍾意啲斯文,文靜,就得人既。」
Jay:「我鍾意爽朗,較男人頭既。」佢細我兩年,拍過三次拖,三次都被女飛,最長果次兩年,暫時無拍拖半年...
Johnny:「我無所謂,個樣順眼就得。」佢細我五年,拍過八次拖,最長一年左右,最短一個月,而現任女友係佢初戀,傳聞佢兩個離離合合好幾次...
「唔...唔鍾意女朋友做咩,或者咩性格唔鍾意?」


James:「出街著得太性感,太大洗...」
Jay:「鬧交,嫌三嫌四...」
Johnny:「唔理我,遲到...」
我問左幾條問,答案都幾大路同都有參考價值,而最後一條我就問:
「係你地心目中既完美情人同現實既情人比,你會揀邊個?」
出奇地三個都答唔到我,James話現實中無野完美;Jay就話自己太唔實際,所以佢既完美情人唔會係現實存在;Johnny就話完美情人係不斷發掘(我都唔係好明)。
「好,係問咁多,大家出返去做野喇!」
當佢地出去時,我拍檔Roy帶住個女仔入來...
「Henry,介紹返,新同事,叫April,打聲招呼...」
「早晨,韋生。」


「早晨!」眼前依個April長頭髮,細細粒(我指身高),帶住副黑色粗框眼鏡(副眼鏡佔佢塊面差唔多三分一,睇起上來好似成個傻妹咁...
「出返去做野,唔該!」Roy吩咐個女仔出去,跟手關埋房門,「頭先你地幾個傾咩?」
「無,我打算研發個新程式,想創造出獨一無二既完美情人,咪係佢地身上攞意見囉!」
「完美情人?咁同而家啲服務員有咩分別?」
「分別係舊既服務員係百分百依照指令辦事,但新既就會先思考事情既可行性先執行,而我研發就係先根據心情喜惡而選擇做唔做,例如你想佢倒柸水既,但佢心情唔好既話就唔會倒。」
「嘩!咁咪差唔多成個人咁...」
我睇到佢面有難色咁,我明白自從十年前既事...
「我知我自己做緊咩,放心喎,上次我太急功近利,我今次一定唔會重複上次既錯誤既,你都講過人同電腦比最大既優勢就係會係錯誤中學習,我銘記於心!」
「嗯...你明白就好,依十年來政府都無放鬆過咁盯住公司...好喇,唔阻你做野,我出返去先,有咩難題搵我啦!」
阿Roy係我讀大學果時既教授,而自我思考人工智能概念係佢提出,我負責實行,所以依間公司可以話係我同佢既心血,十年前因為我既錯差啲令公司毀於一旦,更差啲再失去一個好友,所以呢十年來我不斷提醒自己唔好再出錯...


「Henry,我地食飯喇,使唔使買飯俾你?」
「唔使,我仲未肚餓,唔該!」
掛住做野,不經不覺已經點零鐘,行出間房,見到April坐係個位度食飯。
「咦?你唔同佢地出去食?」
「唔喇...我帶左...飯...」佢一路講一路食,成個咀都係茄汁,咀角仲黐左粒飯...
「哦!咁健康呀!」
「慳錢啫。咁你呢?韋生。」
「叫我Henry得喇。我啊?求其食啲野算。講開又講,好少女仔對依行有興趣,你唔悶咩對住啲程式數字?」
「哈哈,我比較特別,人地鍾意靚仔,我就鍾意靚數字。」佢仲未肯抹咀...
「靚數字?」
「係呀!我覺得3呢個數字係最靚既,3會令我聯想到幾何三角,仲有3呢...」佢不斷係咁講個「3」,就好似細路女第一日幼稚園放學,同媽媽講果日識左咩同學咁,搞到我重新認識返「3」呢個數字。而佢咀角粒飯就隨佢個咀既郁動而不停地跳躍...
「咕咕...」呢啲係我個肚發出既聲音...
「哎呀,我掛住講唔記得左你未食飯,sorry呀,韋生...」
「叫我Henry得喇!」
「係,韋...呀,Henry,要你聽我發噏瘋阻住你食飯...」


「唔係,你講得幾好,把聲又好聽,不如下次產品演講搵你都好喎,不過要抹左咀先!」
「Sorry!」
「好喇!我食飯先,陣間見!」
「嗯...」
April,一個幾得意既新同事...