完美.情人?: 第四章:Judy(下)

第二日,返到辦公室,April已經係度,我同佢你眼望我眼,成個辦公室靜到連心跳都聽到,依個情況直至James佢地返來先打破。
「鍾意我地為你準備既禮物嗎?」James第一個過來同我講。
「我嚴選所有人妻痴女系列,為你度身訂造...」Jay,我地經常叫佢做AV達人,基本上有啲有作性發洩既男女服務員佢都有份參與製造。
「唔好望我,我叫過佢地唔好咁玩既!我負責身體既構造啫。」Johnny,一定有你份既...
我無佢地咁好氣,立即返房將Judy既記憶重設,對於尋晚既事,如果可以既話我都好想好似佢咁刪除。望住Judy,雖然身體對我來講係完美,但我認為智能系統方面須要大幅改進,尤其尋晚既測試(其實都唔叫做測試),根本同以前既一樣,完全未達到我期望。
當我到茶水間準備沖咖啡時,禁啱April入來飲水...
「唔...」我想搵話題打破而家既寧靜...
「尋晚既事...佢地講左俾我聽喇...」咁就好喇,其實係一場誤會來,我...
「我明白有啲天才係有一啲特別既癖好...」吓?其實件事唔係你諗咁樣嫁...
「而且你又有咁大間公司要睇,有壓力要發洩係正常既...」你唔係話我係變態呀?


「放心喎,細個有時返屋企都撞到啲變態佬露...你嚇唔到我喎!」救命呀!我唔係心理變態嫁,我認我係咸濕,但...我係正常嫁!
「我唔會亂咁講出去,我明白既!」佢好似老鼠見到貓咁走都走唔切,我想解釋都無機會。依個故事教訓我做測驗都係返自己間睡房好!
收拾左頭先既心情,我再開返Judy既智能系統,但無開啟佢既身體(費時我分心)。希望透過講野溝通,了解佢既智能發展進度...
「Judy,你覺得點?」我無刪除佢對我既記憶印象。
「感覺還好,但無左視覺感覺有啲怪。」
「你既身體要做啲調整,所以暫時攞你既系統跟進下...」
由於我亦無將佢同互聯網連線,所以佢既知識都由我教既,理論上佢而家既智力應知應該同嬰兒差唔多,但佢既思考同學習既速度卻超出我想像,我只講一個簡單既話題,佢已經可以引伸出過百樣問題及思維,令我有啲驚,驚再犯上次既錯誤...
「好喇!都夜啦,我同你都攰,要休息。」
「攰?咩係攰?」
「攰即係無晒能量,身體機能會降低...」


「我無身體,而且我仲有能量,我唔想休息,我仲想學好多野,仲想知好多野...」
「夠啦!」我覺得我語氣重左,「聽日仲有時間俾你學,乖啦,我都要休息。」
「但係...」我唔等佢講完強行關掉電源,就好似啲父母將啲唔肯訓既細路強行帶上床咁...
「喂,你快啲過來睇下...個進度超出我地想像啊!」June慶高彩列地同我講我地研究既成果。
「係喎!」我望住數據,露出滿意既笑容,「根據依個進度,我諗唔使一年就可推出市場!」
正當我想轉身同阿June慶祝時,發現佢已不知所蹤。然而當我定過神,發現自己正身處一個我極度恐懼既地方,而前方,正是一道熟悉既巨大鐵閘。
「絕對唔可以打開!絕對唔可以打開!絕對...」我不斷係個心度同自己講,但我卻身不由己將佢打開...
我睜開雙眼,望住電子鐘正在跳動,係夢。我行入浴室除衫準備沖涼,望住塊鏡裡既自己雙眼通紅,但我已唔記得係因為恐懼過度而喊定傷心而喊,甚至懷疑自己有喊過嗎?原來個傷口從來都未好返...
「係咩?你又發返果個夢?」阿Roy係大學餐廳食緊早餐同我傾計。順帶一提,雖然佢擁有公司三成股份,但佢仍然做緊大學教授,係公司比較少出現。
「我想睇下你個...Judy,你有帶係身嘛?」


「嘿,始終最了解最知我心既都係你...」我將Judy儲存係我平板上,「Judy!你係度嗎?」
「......」佢無應我,而平板亦顯示佢係開啟狀態。
「Judy?」正當我想檢查時,阿Roy示意交俾佢。
「Judy?你好啊!我叫阿Roy,係Henry既大學導師,nice to meet you!」
「Nice to meet you,too,Roy!」
「點解你頭先唔應Henry既?」
「哼!佢尋晚無啦啦強行熄左我,我都話唔攰,我仲有好多野想學嫁!而家我嬲佢唔尊重我,所以唔睬佢囉!」
「嘩!」就連我個心都嘩左出來,我估唔到Judy既智能已發展到依度...
「Judy!其實「人」好怪,鍾意將自己既感覺套落另一個人或者物之上,所以當佢地話你好攰啊好悶啊,其實係佢地自己既感覺來,明唔明?」
「哦!咁即係話尋晚其實係佢攰要休息先唔同我傾計,教我野!」
「係嘞!」
「你係Henry既大學導師,咁你一定比佢叻,你可唔可以教我呀?」
「好啊!你想學咩?」
於是,一堂小型大學課堂就係度上,佢地傾下傾下直到阿Roy柸咖啡由熱變凍...
「好喇,我都差唔多要上堂,Judy同你傾計真係好有趣,第時有機會再同你傾過。我想同Henry單獨傾一陣,你介唔介意迴避一下?」


「好啊!」於是Judy就自行關機...
返到公司,我反複思考Roy同我講既野,於是我有左決定...