［人性/有甜］- 屍•家•馬鞍山（隔日更新）: Chapter 358 - 華叔？！

我們在車上等待了一會，便看見華叔領著一名女子，雙手抱著美鈴走了過來。

一個原本已經在我生命中消失了的人，就這樣突然地出現在我的面前。

待華叔將二女安頓好後，我便不可置信的打量著眼前的他。

「華... 華叔？」我完全不敢相信眼前看到的事，「你唔係已經？」

「嘿嘿！呢個係我同 Keith 安排嘅一場戲嚟，因為我唔想阿女跟住我有危險，所以唯有出此下策...」華叔解釋道。



我一時不能接受，更無法想像 Vicky 重遇華叔時的情況。

回想當天在草叢中發現屍體之時，確實屍首的面容潰爛得能以辨認。

「嗰日同你哋分手冇耐，行到海典灣附近，就突然間有幾隻喪屍跳出嚟包圍襲擊我哋...」華叔繼續解釋道，「其中一隻一下就已經咬住咗個麻煩女人，我哋救都救唔切。」

「之後我同阿 Keith 就夾手夾腳攪掂啲喪屍佢，之後望住女人條屍，阿 Keith 就諗住將計就計，希望我可以退出你哋個團隊，方便我幫佢哋做嘢...」

「吓？咁你就要呃住你個女？」我覺得難以置信，「你知唔知佢真係以為你死咗，好傷心...」



「冇辦法，我咁做都係為佢好，跟住我好危險...」之後華叔打量著我說，「乜佢唔係同你一齊㗎咩？」

一時間，我不知道該如何應對。

「佢... 同我失散咗...」我只有簡單回應。

華叔看著我，沈默不語。

「咁你諗住點？」華叔拋下了一個模棱兩可的問題。



「我會搵返 Vicky 先...」我最先想到的，就只有這個答案。

「我係問，你同我個女，以後打算點...」華叔忽然變得嚴肅。

確實，我沒有長遠的計劃。

但我明白，若我照實回答的話，華叔一定不會輕易放過我。

可是我更不想對他有所隱瞞。

「老實講，我都今日唔知聽日事，根本冇辦法計劃啲乜嘢...」我只是依我心中所想，如實回答，「不過我可以答應你，我一定盡我所能，照顧同保護佢...」

「係就最好，我只係得一粒女，所以除非我死咗，如果唔係，邊個對佢唔住，我都一定唔會放過佢...」華叔再向我警告著。

「嗯...」我只有輕聲答允。



「華叔，不如我哋返去先？」坐在司機椅旁的 Suki，向華叔提議道，「Keith 講過，我哋齊人就走先，佢會諗辦法甩身，唔洗擔心佢...」

「唔...」華叔環顧眾人，然後思考了一會，「咁都好嘅，反正我哋都幫唔倒啲咩。都係返去先啦！」

於是，坐在前頭的芷晴便開始驅車離去。

「話時話，點解你哋會突然出現？」我問華叔。

「唔... 其實我哋原本都喺附近，跟住突然收到消息話你哋有危險，我哋就即刻趕過嚟...」華叔答道。

那即是代表，King 真的有回去找尋救兵。

心內又浮現了多個關於他和 Keith 一行的問題，可是由於車內還有太師的人，我還是不作多問。



我們隨著車子返回基地，駐守在裡面的醫療隊，已經站在大門後準備。

傷得比較重的芷蕾先被帶進了裡面，然後便是之前部隊的女子，和仍在昏迷中的美鈴。

「好喇！Roy 你同佢哋返去先，Suki 會同你哋一齊，睇吓有乜幫手。」華叔向我說道，「我返一返去接應 Keith，最起碼都要幫手車佢返嚟...」

我看著他，心裡有點不安...

「放心啦！我同你係同類，又訓練有素，唔會咁易有事嘅！」華叔好像看穿了我的表情。

隨著我、芷晴和 Suki 都給帶回基地內，華叔亦準備驅車返回。

「喂！阿 Roy！」華叔回頭把我叫住，「我同阿 Keith 之後都會幫手搵阿女，如何可以嘅話，儘快康復滙合我哋啦！」

言談間，我感到他給予我的關懷和認同。



之後，我們被帶領到醫療室休息檢查，但這刻令我牽掛在心的，是 Carey 的情況。

我拜託芷晴幫我跟他們打探一下，希望儘快能跟她見面。

芷晴亦很快便打聽到 Carey 的消息... 就正如太師之前的安排，Carey 已經被帶到這裡接受治療。

可是，芷晴說 Carey 用藥後的情況不是太穏定，還是晚一點、甚至明天去看她才比較好...