［人性/有甜］- 屍•家•馬鞍山（隔日更新）: Chapter 391 - 抗生素

「之後我就自己一個，離開咗馬鞍山站生活。又可以借呢個機會，睇吓搵唔搵倒我女朋友。」Dickson 繼續娓娓道來。

「點知過吓一日、過吓又一日，都係搵唔倒我女友。我曾經諗過入去新港城商場裡面搵，不過我離遠都見倒，有好多喪屍喺附近徘徊，所以最後都冇入到去...」他看來有點失落。

「你女友喺新港城商場入面做嘢？」我好奇問。

「其實我真係唔太識呢度啲地方，原本諗住嚟到先再問人，點知就發生咗件咁嘅事...」他無奈地答道。

正想進一步追問，卻突然被他快一步問道，「你覺得 Vicky 點？」



我被這突如其來的問題，問得有點不知所措。

「咩、咩點呀？」我一時想不到該怎樣回應，只能慌張地反問道。

「冇... 自從兩日前喺巿中心見倒佢，就比佢爽朗嘅性格吸引住...」他甜絲絲的說道，「我見佢都好主動咁黐埋我度，我諗佢對我都有啲好感...」

我對這突然出現的情敵感到有點羞憤，於是便刻意地問道，「你唔係話特登返嚟搵你個女朋友㗎咩，做乜突然見異思遷？」

他默默的看著我，好像沒有預期到，我竟然有這樣強烈的反應。



「唉... 經過呢幾個禮拜，我都開始睇化咗...」Dickson 看來沒有受到我的影響，「搵咗咁耐都搵唔倒，我都打定輸數。」

「喺而家呢個環境，你嘅好拍擋可以轉頭就死咗，而原本志同道合嘅人，又可以為咗利益出賣你。」他好像也有著不少的經歷，「所有嘢都捉摸唔倒，今日又唔知聽日事...」

「既然面前已經有人話鐘意我，而我又覺得可以發展嘅話，我又何必太過執著呢？」聽他所說，好像已經看破了世事似的。

「咁如果你可以搵返你女友，你又會唔會再同 Vicky 一齊？」我好像問了一個比較幼稚的問題。

「哈哈！咁你呢？入面嗰個唔係你女朋友嚟㗎咩？」Dickson 也立刻反駁著。



我站起來直瞪著他，打算教訓他一頓。

我揪起他的衣領，打算狠狠的賞他一個耳光。

「喂～ 如果你要打，唔該一拳打爆我個頭！」豈料他不但毫不愄懼，還挑釁著我起來。

既然他不怕死，我倒不如先把他解決以絕後患？

「阿 Roy～」營房內傳出芷蕾的叫聲，使我立刻放下 Dickson 領上的手。

我跑進醫療營去，看到素恩正陷入發冷抽搐之中。

「我諗係細菌感染，可能係因為啲傷口引起...」芷晴看著我說道，「不過我表姐頭先搵過，啲抗生素已經比人攞走曬...」

「咁我即刻去搵啦！」刻不容緩，我立刻準備離開。



但是腳步卻又立刻被停住。

因為我對藥理可說是一竅不通。

正想進一步追問，身後卻傳來 Dickson 的聲音，「係咪搵 Penicillin 之類？」

他是何時走了進來的？

「你知就最好，咁你可以幫阿 Roy 手去搵...」芷晴說道，「我哋就留喺度照顧佢，順便等 Keith 嚟。」

我看著他，不知該如何説起。

「係咪行得？」想不到他竟也主動地問道。



「嗯...」我只有尷尬地回應。

「喂，呢枝嘢比你旁身！」芷蕾向 Dickson 遞上了一柄手槍，「不過... 你識唔識用？」她打量著 Dickson 問道。

「咔嚓～」豈料 Dickson 二話不說，竟也拉起了手槍的保險制來。

「我攞咗枝槍，咁妳咪...」Dickson 向她問道。

未及 Dickson 問完，芷蕾已經在身旁的抽屜裡拿出另一把手槍。

「佢哋走得好急，我仲有好多...」芷蕾滿足地答道，還向 Dickson 遞上了額外的子彈匣。

不知怎的，我覺得芷蕾對 Dickson 都有些好感。

可能他是女人看到都會喜歡的類型吧！



「Roy，你用呢把就得啦，係咪？」芷蕾把一軍刀遞上。

確實，對我來說，它比手槍還實用。

但我還是覺得芷蕾有點厚此薄彼。

該死的妒忌心作祟。

希望，我不會給這妒忌心害苦...