［人性/有甜］- 屍•家•馬鞍山（隔日更新）: Chapter 446 - 太師的安排

「我同阿 Keith 唯有即刻衝咗出去，順便閂埋道門，打算同啲怪物打過。」素恩續說。

「點知佢哋嗰身好似啫喱咁，打極都打唔入。我哋冇辦法之下只有突圍衝出去，諗住順便引開佢哋...」

「不過佢哋竟然冇再追嚟，只係守喺機房外面，但係又冇打算攻入去，好似淨係唔比我哋返入去機房咁...」素恩說道。

我反覆思量，這當中定必有原因。

「不過其實我都唔係好明，點解 Keith 要將隻船停喺海中心...」我想弄個明白。



「其實我都唔係太清楚，不過聽阿 Keith 講，隻船上面啲貨櫃有古怪。佢哋全部比人鎖住，個鎖又接駁咗一個類似引爆嘅裝置，所以阿 Keith 都唔敢夾硬打開佢哋。」素恩解釋道。

「跟住阿 Keith 睇倒船上面嘅羅盤，話隻船應該去緊台灣...」素恩補充。

「台灣？」我無法想像箇中原因，「隻船原本唔係太師控制住，去緊海南島㗎咩？」

「假設隻船載住一啲怪物、甚至係病毒，如果隻船原本係要返番去太師嘅大本營，唔係好奇怪咩？」我問。

「我都覺得係... 不過我覺得仲奇怪嘅係，點解呢隻貨輪會唔同太師嘅船隊一齊？隻船插住枝中國旗，如果喺台灣境內發生意外，有病毒喺嗰度爆發。台灣政府又會唔會當係嚟自中國嘅攻擊？」素恩分析度。



「一旦海峽兩岸打起上嚟，其他國家就有機會乘虛而入...」素恩繼續分析道，「尤其係美國、日本...」

「佢哋之前都想挑撥北韓同中國嘅關係，鋪排到好似北韓係策劃香港喪屍襲擊嘅主謀咁...」素恩續說。

「不過好在佢哋冇中到計...」我和議道，「睇嚟大陸啲情報員都唔係咁簡單...」

「係... 原來就喺喪屍事件喺香港爆發嘅時候，南北韓突然邊界突然發生咗衝突，兩國即刻進入咗作戰狀態。」素恩說。

「雙方亦已經部署好，準備隨時攻擊... 而就喺呢個時候，中國大陸高調宣布北韓係佢哋嘅堅實盟友，如果有任何國家以任何手段入侵北韓，中國一定會傾全國之力支援同反擊。」



「就因為咁，原本已經劍拔弩張嘅南北韓雙方，又再次靜左落嚟...」

原來這在一般人看來單純的喪屍事件，背後竟隱藏着這樣重大的陰謀。

「咁好彩個陰謀及時俾人制止咗，如果唔係真係死得人多...」我感嘆道。

「不過我哋唔可以開心得太早，因為當呢個陰謀失敗咗之後，佢哋就已經部署緊另一個危機。」素恩答道。

「你諗吓，今次如果隻船去到台灣，真係引起咗災難，咁危機就再次出現...」素恩補充道，「台灣政府入面都有唔少人，想借機引發兩岸嘅衝突，如果災難真係發生咗，佢哋一定會借題發揮。」

「到時大戰一觸即發，其他國家又可以乘機出兵加入，咁佢哋就可以乘機聯手攻擊同入侵中國...」素恩續說。

想不到，一切都是原於各國對中國的野心。

「其實我同 Keith 當初都諗唔倒，點解太師會將隻船駛去自己個基地...」素恩繼續說道，「但係當我哋大膽假設，太師已經變咗節，咁一切就會變得合理...」



「妳嘅意思係，太師想隻船上面啲病毒喺海南爆發？」我提出疑問。

「呢樣我哋都唔係好明...」素恩回應道，「不過直覺話比我知，太師佢唔會冇人性到殺死自己人...」

我不以為然，那些為了達到目的而不擇手段的人，見得實在不少。

只是，我也認同太師沒有攻擊自己人的必要。

我唯有重新思考，在追趕太師的那一刻開始想起。

對！自太師離開白石基地後，一直都沒有再出現過。

難道，我們一路都被人牽著鼻子走？



那我們又為什麼被帶到了這裡？

是美鈴！我們一直都是跟著她。

正因如此，當初我們才以為太師在這艘貨輪上，然後又再遇上之後的連串事件。

看來，一切都是被人安排好。

如果美鈴真的是太師的人...

糟了！

若然我的推理是正確...

「轟...」低沉的引擎聲突然再次響起，巨輪重新向前移動。



果然如此！

原來那些滑溜溜的怪物，並不是要追擊美鈴。

反之，它們是要確保她不受騷擾...