［人性/有甜］- 屍•家•馬鞍山（隔日更新）: Chapter 505 - 埋沒了的人性
我被這一幕嚇得無言以對，Clara 亦在查看海面後，示意良哥再次起航。
「喂！良哥，唔係就咁算喇嘛？」我向良哥質問道。
「唉... 兄弟，其實你諗深一層，佢咁做都係為我哋好...」看得出良哥亦有點無奈。
雖然我都可以理解 Clara 這樣做的原因，但若然求存便是要搶奪別人的生存權利，那我們跟那濫殺無辜的異生教，又有可分別？
「睇頭先個人個樣，都應該喺海上面捱咗一段時間...」良哥看我沒有哼聲，便繼續解釋道，「喺水裡面浸咗咁耐，佢嘅身體機能都一定好差，只係勉強用意志力撐住...」
「若然救佢上嚟，先唔好講可以生存落去嘅機會好微，就算 Clara 姐肯救，我哋都要動用好多物資...」
「對一個三唔識七，生存機會又微嘅人嚟講，咁做確實唔太值得。」
「唉... 就算之前有手足受傷，當 Clara 姐見倒佢傷勢好重嗰陣，佢都係頭也不回咁決定放棄。」
「Clara 姐，絕對唔係一個憐憫弱者嘅人...」良哥無奈地總結道。
我沒有再多說一句，因為我知道，大家都身不由己。
本來，生存就是要這樣。
只是，那該死的良心，不知道從何時又再走了出來。
「算啦！見得多就慣㗎喇！」良哥竟也向我安慰道。
也許他並不知道，我一早已經對這些事情習以為常。
「係呢？大概幾耐先到？」我不想一直圍繞在，一個沒有意義的話題上。
「以而家嘅速度，大概兩個鐘鬆啲就到馬鞍山...」良哥以專業的口吻回應道，「我哋油唔算好多，所以唔可以用最高速度去行，慳得幾多得幾多啦...」
「估唔到下面個二世祖咁有米，呢隻遊艇又大又先進，唔係一般有錢人買得起...」良哥輕按著儀表板，看來十分享受駕馭著這艘豪華遊艇的樂趣。
「呢啲咁靚嘅首抽，我哋分分鐘擦幾千幾萬次給未必有啦！」我感嘆道。
「首抽？咩首抽呀？」良哥好像聽不明白。
也難怪，眼中只有任務和行動的人，又怎會留意到這些詞語？
「哦，潮語嚟，即係含住金鎖匙出世咁解...」我只好簡單解釋。
「哦...」他雖然看似了解，但我也不知道他是否真正明白。
「話時話，聽你啲廣東話咁純正，莫非你係香港人？」我有點好奇。
「係... 我喺香港出世，之後全家移民美國。不過老豆老母喺我讀 high school 嗰陣，意外過咗身...」良哥停頓了一會，「之後誤打誤撞，得朋友介紹下加入咗一個地下僱兵組織...」
「嘿嘿！話就話係僱兵，其實咪係做埋啲唔見得光嘅嘢...」
「不過，係一次任務裡面，我哋成隊比人埋伏，全部人就死剩我一個。」
「之後先發現，係我哋原本嘅接頭人，為咗交人而出賣我哋。而我都算好好彩，比 CIA 啲人睇中，覺得我可以幫倒手...」
「於是佢哋就話比我將功贖罪，加入佢哋嘅保安隊，十年後就同我洗底，比個新身分我...」
「所以我而家係冇身分嘅，隊友都只係會叫我阿良或者良哥...」他說得有點無奈，「不過唔好話十年... 淨係呢一舖都唔知捱唔捱倒...」
我只有輕輕地，拍了一下他的肩膀以示鼓勵。
正想要出言安慰，卻見良哥突然神色凝重的看著雷達上顯示的幾個小點。
「會唔會又係啲雜物？」我見他沈默不語，只好主動問道。
「唔會... 睇佢哋郁得咁快，肯定唔會係飄浮物。」良哥認真地答道。
我看著那雷達螢幕，確實跟剛才所見有所不同。
「佢哋過緊嚟呢邊？」我問。
「係... 睇個款，佢哋應該一早發現咗我哋，而家搵船嚟截我哋。」良哥回應道。
「咁仲唔掉頭走？而家走仲趕得切...」雖然我覺得他斷不會沒有想過逃走，但以防萬一，我還是先提出自己的意見。
「冇用... 我哋船速唔會夠佢哋快...」良哥竟也不慌不忙地答道，「如果我哋掉頭走，佢哋好快就會追倒我哋...」
「反而，我有另一個諗法，睇吓可唔可以同佢哋搏一舖...」良哥一邊說著，一邊調較著雷達去觀察四周的環境。
「得...」良哥好像找到了方法，「你幫我叫 Clara 姐上嚟，我有計！」他充滿自信地說道...