［人性/有甜］- 屍•家•馬鞍山（隔日更新）: Chapter 619 - 泫雅的恨意

「照妳咁講，Dickson 一定會不顧一切咁搵番妳...」我回應道。

「做乜呀？你驚呀？」泫雅明顯語帶挑釁。

「超！我有乜好驚？橫掂佢都唔會對我點㗎啦！」我以輕鬆的語氣回應道，「不過，妳就唔知喇...」

「哼！你唔洗嚇我...」泫雅不屑地答道，「慌唔係你驚 Dickson 嚟捉番你，你就冇曬自由咩！」

「我而家就走出去，大聲同 Dickson 求救，叫佢過嚟...」說罷，她便真的打算走出屋外。



「泫雅，唔好...」豈料志宏竟出手把她拉住。

「先唔好講出便可能仲有好多怪物...」志宏向她解釋道，「其次嘅係，我對妳嘅諗法，好有保留...」

泫雅不明志宏所說，只能報以疑惑的眼神。

「孝信之所以唔親自帶妳去，有好大可能係，佢唔想要出賣妳嘅時候會尷尬...」志宏大膽假設道。

其實我不是十分認同，因為若然孝信只當她是一顆準備犠牲的棋子，他決也不會這樣對她珍而重之。



更何況，孝信就從不會有什麼尷尬可言。

所以，他一定另有盤算...

只是，既然志宏的話能令泫雅安定下來，我也不需急於添加意見。

「我唔覺得孝信會咁對我囉！佢一直對我好好...」泫雅好像不肯相信。

「我勸妳都係聽吓志宏講...」我忍不住插口道，「孝信呢個人，我同佢交過幾次手，佢一定唔係咩好人...」



「哦，係呀？」泫雅打量著我反問道，「咁你覺得自己又係咩人呢？」

我知她的弦外之音，但我亦不想在眾人面前把醜事揭穿...

「我雖然唔係乜嘢好人，但都唔會係咩大奸大惡囉！」我婉轉地答道，「不過我就知道，孝信一定唔簡單...」

「哼！你面皮真係厚...」泫雅也好像有點顧忌，沒有再進一步跟我糾纏。

「志宏，你話呢？」可她仍心生不忿，向志宏尋求支持。

「咩... 咩呀？」不知他是否真的聽不到。

「我問，孝信 oppa 係咪好人呀？」泫雅再次問道。

「哼！佢係好人？」志宏突然變得憤怒，「我話佢直情係賤人嚟啦！」



他激動的回應，頓時令四周鴉雀無聲...

「總知我就唔會信你哋啦！」沉寂了一會，泫雅終於發聲；同時突然發難，拉門準備逃離。

「碰！」我想衝前去把泫雅捉住，卻被志宏搶先一步，將她壓上並緊貼在門後。

在場的人，無不被他的行為嚇呆。

「志宏！你做乜呀？」泫雅完全無法理解他的行動。

「對唔住！我都係為妳好...」志宏仍是緊壓著她道。

「阿 Roy，幫手搵啲繩嚟...」他回頭向我說道。



「你係咪儍咗呀？放開我呀！」泫雅不繼掙扎著。

但我亦完全意想不到，他竟然想到要捆綁著她...

「碰！妳唔好郁呀！」志宏再次用力把泫雅壓往門上，「阿 Roy，快手啲！」他看來有點著急。

「求吓妳，幫幫我...」沒有辦法的泫雅，只能用懇求的眼神，向著 Vicky 求救。

「阿 Roy...」看來，Vicky 亦想我出手幫忙。

可是我十分理解志宏的用意，於是我狠下決心，在屋內四處找尋。

「求吓妳，幫吓我啦～」泫雅並沒有放棄，繼續苦苦哀求著 Vicky。

「阿 Roy，不如放咗佢...」Vicky 終也按捺不住，還站起來好像有所行動。



「唔可以放佢！如果比佢走出去通風報訊，我哋只會係死路一條！」我大聲把 Vicky 喝止。

Vicky 聽到後，立刻停下了腳步。

於是我，繼續埋首找尋可用的物品。

終於，給我找到一條斷裂了的電線。

我隨即走到泫雅的身後，用電線把她的雙手捆綁住。

「放手呀！如果你哋要我同嗰個賤人一齊，咁我寧願你哋殺咗我喇！」泫雅大叫道。

屋內，頓時又變得一片寂靜...