［人性/有甜］- 屍•家•馬鞍山（隔日更新）: Chapter 640 - 救助阿賢

我對他的脅迫深感不快，心裡亦忐忑不安，只好衡量著利害。

雖然我大概估計到 Keith 的目的地在哪，但他一直生死未卜，令我想儘早知道他的行蹤。

「好... 你要我點幫你？」我下定決心。

「唔得呀！你諗住放過佢？」豈料，泫雅突然衝了過來，「我要殺咗佢！」

她表現得十分激動，令我不得不趨前把她阻止。



「放開我！唔好阻住我！」泫雅歇斯底里般大叫著。

我立刻把泫雅的雙手捉緊，以防她進一步攻擊他。

而此刻的 Carey，亦已經復原並走了過來。

「Carey 幫幫我，帶返泫雅落樓下先...」我向 Carey 請求道。

Carey 猶豫了一下，便走到了泫雅的身旁。



「泫雅姐，不如...」Carey 正打算要泫雅冷靜一點。

「走開呀！我一定要殺咗個衰人！」可是泫雅卻沒有打算罷休。

「泫雅... 泫雅... 妳聽我講...」我努力去說服她，「呢個人，可以幫我哋安全去到目的地...」

「咁又點呀？我一定要殺死佢！」泫雅聽後仍然非常激動，「我要殺咗佢！剁成肉醬餵狗！」

「啪！」大家正在糾纏之際，巧兒突然從梯間衝出，賞了泫雅一個耳光。



「八婆，妳打我？」泫雅的憤怒，轉眼投射到巧兒的身上。

「喂！妳冷靜啲！」巧兒捉著她的手叫道，「妳咁樣有用咩？妳殺咗佢又真係有用咩？」

「不如妳積極啲，諗吓點樣可以生存落去仲好啦！」巧兒吼叫著。

「唔好唔記得，男人可以保護我哋，所以佢哋條命好緊要！」巧兒續說，「為咗生存，比人屌吓又有乜所謂吖？」

泫雅正想反駁，但又突然停了下來。

「妳都係帶佢走先啦！」巧兒看著 Carey 說道。

只見泫雅突然怒視了我一眼，便乖乖的跟隨 Carey 離去。

「阿賢，你點呀？」巧兒走近他身邊問道。



「嗯... 呼吸順返啲... 應該冇傷倒主要器官...」男子回答道。

「我叫巧兒，呢個係阿賢，你叫咩名？」巧兒主動地問道。

「叫我阿 Roy...」我亦乖乖地回答。

因為我這一刻的視線，只注意到她那性感睡衣裡面，那若隱若現的驕人身材。

看來，剛才她已乘空檔，換上了新的一條睡裙。

「喂！唔好掛住望啦！」豈料我的狼相被她看到，「救咗阿賢先啦！」

有點尷尬的我，只好立刻趨前幫忙。



「我應該點做？」我向巧兒問道。

「個傷口都好深，不過應該冇插倒重要器官...」巧兒打量阿賢的傷勢後說道，「呢度冇手術嘢，唯有冒險搏一搏...」

「妳係醫生？」我好奇問道。

「哈哈！梗係唔係啦！」巧兒笑說道，「我只不過係一個註冊護士...」

「但我以前係需要喺手術室入面做嘢，所以都叫學倒少少嘢啦！」她一邊說著，一邊已經示意我去幫忙。

「阿 Roy，幫我捉住呢度...」我聽從巧兒的話，緊握著剪刀。

「好... 而家同我慢... 慢咁拉返佢出嚟...」巧兒進一步要求道，「記住，我叫停，就要即刻停...」

「嗯...」她的話，令我感到有點緊張。



我小心翼翼的把剪刀拔出，看到鮮血不停地在傷口滲出。

「停！」聽到巧兒的叫喊，我亦隨即把動作停止。

我的額頭，已經沾滿了因緊張而冒起的汗水。

「繼續...」在巧兒的要求下，我再次慢慢的把剪刀拔出。

鮮血又再從傷口滲出，阿賢的抽搐亦變得越來越嚴重。

而隨著剪刀的完全褪出，傷口的滲血情況亦變得一發不可收拾。

「吱～」巧兒拿著一小瓶噴劑，往傷口噴射了一遍，但滲血的情況卻沒有多大改善。



「用佢，㩒實個傷口！」巧兒遞來了一塊止血紗布，著我把阿賢的傷口緊緊的按住。

一塊紗布完全染濕染血，然後又是另一塊...

眼看紗布快要用完，可是滲血的情況卻仍是依舊...