［人性/有甜］- 屍•家•馬鞍山（隔日更新）: Chapter 644 - 外出的條件

「唔...」泫雅的嘴巴被遮蓋，只能發出輕微的悶聲。

「嗱！忍住喇！」巧兒提示過後，便開始往泫雅的下身探去。

「唔～～～」從泫雅口中傳來的聲響，和用力掙扎的行為看到，巧兒的幫助為她帶來了不少的痛苦。

事情仍然繼續，直至泫雅繃緊的神經慢慢放鬆。

回望她的臉，已經是眼淚兩行。



「超！少少事就叫到拆天咁，第日如果生仔，我問妳咁點算？」巧兒不屑地說道。

泫雅已經痛得沒氣力回應。

「個傷口有少少撕裂，但唔算好嚴重...」巧兒開始敍述傷勢，「不過佢咁後生，唞返一兩日應該就冇問題...」

「但係，最好每日都洗一洗傷口...」她補充，「如果唔係，一陣發炎就麻煩...」

那等於代表泫雅暫時未能離開。



如果是這樣，我是否應主動尋找，仍隻身在外的 Vicky？

我已經對這樣的尋尋覓覓，產生了一點厭惡。

但放棄，便等於承認失敗...

這使我重燃，繼續戰鬥下去的決心。

「好喇！攪掂喇！」巧兒一邊脫掉手套，一邊笑著向我說道，「我叫做還返個人情比你喇！」



原來，她這樣幫忙，完全是不想對我有所虧欠。

可是，我還別有所求。

「巧兒，有件事我想同妳商量吓...」於是我伸手把她拉住，「阿賢嗰副甲... 唔知可唔可以...」

「你想出去？」巧兒亦直接了當的問道。

「嗯... 我想去搵我個朋友...」我亦無需隱瞞。

「好！不過我有個條件...」想不到她竟肯答允。

「如果我能力範圍之內做倒，我一定會做...」只要要求不太過份，我想我也可以辦到。

「放心，我唔係叫你殺人放火，你一定唔會有問題嘅～」巧兒答道，「不過，就有少少危險...」



我洗耳恭聽。

「睇阿賢嘅傷勢，仲要用好多包紥同洗傷口嘅嘢...」她繼續說明，「同埋佢個傷口咁深，好大機會會有細菌感染...」

「所以，妳要我幫妳搵啲抗生素返嚟？」我已經知道她的所需。

「哦？睇嚟你有經驗喇喎～」巧兒好像不太驚訝，「嗱！時間關係，我已經寫好咗個 list，你照執就 okay...」

說罷，她遞上了一張寫有藥名和醫療用品的清單。

看來，她一早已經準備好。

「咁我可以喺邊度搵？」據我所知，這裡附近沒有任何藥店。



「唔... 之前阿賢好似話喺烏溪沙站附近搵...」她思考後回答。

烏溪沙站？離這裡有著一段不短的距離...

若然只靠步行，看來有著不少的難度。

「阿賢係咪有部貨車？」我覺得以車代步，比較安全可行。

「嗯... 係就係有，不過...」巧兒欲言又止，「我唔知條車匙喺邊...」

「吓？會唔會喺佢身上面？」我追問。

「點都好啦！我唔想比佢知道，有人攪過佢部車...」巧兒看來有些苦衷。

雖然我覺得有點奇怪，但她既然如此說道，我亦不便勉強。



「咁副甲？」我想提醒她幫忙。

「呢層冇問題，我依家就上去拎俾你...」巧兒爽快答應，「你等我一等...」

「Okay...」我回答過後，便開始思考下一步的行動。

究竟，我是否應當隻身一人出發？

但是，把她們留下的風險實也太大。

我想，還是問一下她們的意見。

「我會出去搵 Vicky，順便去幫佢哋搵啲藥...」我向二人說道，「妳哋會唔會同我出去？」



Carey 和泫雅聽後，並沒有作出回應。

「你諗住就咁揼低我哋兩個？」泫雅終於忍不住問道。

「梗係唔係啦！所以而家咪問妳哋同唔同我出去囉！」我反駁道。

「我而家咁樣，點出去呀？」豈料，泫雅突然憤而問道。