［人性/有甜］- 屍•家•馬鞍山（隔日更新）: Chapter 649 - 再往外闖

「喂！咁妳點呀？」我向泫雅追問。

「哼！根本冇人撐我...」泫雅十分不滿，「不過我死都唔會出去㗎喇！」

還好，至少有她充當 Carey 的接應。

但在這之前，必先解決另一問題。

「解藥！」我向巧兒說道，「如果冇解藥嘅話，咪洗旨意出去！」



「吖...」巧兒的表情好像有點尷尬，「其實... 我頭先只係諗住... 嚇吓你...」

「根本就冇乜嘢喪屍病毒...」她低著頭答道。

「喂！妳唔好扮嘢喇喎！」我被她觸怒，「頭先講到似層層咁，妳一定知道啲嘢喎，咪諗住呃我哋！」

「我... 其實真係...」看來，巧兒仍是選擇狡辯。

「我唔得閒同妳慢慢玩呀！」我忍不住怒吼道，「妳再同我玩嘢，我就全部殺曬妳哋！」



「其實我根本冇落過毒...」巧兒解釋道，「我只係想嚇吓你...」

「妳當我儍㗎！頭先講到似層層，而家又話冇？」她的話並沒有令我信納，「我話妳知，車匙我已經到手，就算殺曬妳哋再走，我都冇損失！」

「我講真㗎！我真係冇落毒...」可巧兒仍矢口否認，「如果我真係有落毒嘅話，佢又點可以冇事冇幹喺度？」

她說得有點道理，從巧兒消毒到現在，已經過了一段時間。

但泫雅確實沒有任何異樣。



不過，這又帶出了一個新的問題。

「點解妳會咁清楚㗎？」我迫近巧兒質問道，「妳究竟係咩人？」

「唔好再諗住呃我吓！」再她回答之前，我已經快一步作出警告。

「吖... 你有冇聽過，異生教？」巧兒向我反問道。

異生教...

為何，所有事情都好像跟它有關連？

為何，它好像不斷在我身旁縈繞不去？

「妳講啦！唔好再喺度兜圈！」我有點兒不耐煩。



「啊～」巧兒好像被我嚇到，「你... 你知道異... 異生教... 嘅話...」

「你... 唔通係佢哋嘅人？」她向我反問道。

「呢樣嘢唔關妳事！答咗我個問題先！」我不想回答。

「哦... 阿賢佢... 係異生教嘅人...」巧兒終於肯認真回答，「所以知道病毒嘅事...」

原來如此...

「咁妳哋點知病毒有咩解藥㗎？」我想確認一下，她們掌握到哪層面的消息。

「呢個... 我哋都唔知...」巧兒羞愧地答道，「我哋原本諗住嚇吓你哋啫～」



一時間，我也不知道該怎麼反應...

「妳繼續講...」我只好叫她續說。

「我哋淨係知道，佢哋有本事用病毒令人感染，同有藥解喪屍病毒...」她答道。

「咁阿賢係咩人？係咪神使？」我追問。

「呃... 佢... 佢只不過係一個普通嘅教眾...」巧兒答道。

「嘿嘿！咁妳哋匿埋喺度，係咪有咩任務？」我再追問。

「冇... 冇呀！」巧兒慌張地答道，「我哋只不過，係逃兵嚟...」

「哦？睇嚟成件事唔係咁簡單喎～」我見她的眼神閃縮，看來是有著些不可告人的事。



「吖...」巧兒好像有口難言...

「好啦！我諗我哋都係出發咗先...」我不想再耽誤時間，「到時你再慢慢解釋俾我聽...」

於是，我們一班人便準備出發。

依照剛才的協定，Carey 會跟隨我和巧兒出外，泫雅卻依舊留在這裏。

我在二樓探頭觀看，發現外面那漆黑的夜空中，聚集在村屋附近的喪屍，好像比之前來得少。

可是，由於視線不佳，我亦不排除它們都隱藏在暗處。

但無論如何，行動已是刻不容緩。



跟 Vicky 已經失散一段時間，再等下去恐怕她會有什麼危險。

「巧兒，架貨車喺邊？」我先要確認一下目標的位置。

「就喺嗰度...」她向停泊在不遠處的一輛貨車指去。

確認目標後，我便帶領著二人，走到地下的大門後準備出發...