［人性/有甜］- 屍•家•馬鞍山（隔日更新）: Chapter 651 - Carey 的生死

「咔嚓...」我立刻拔出手槍攻擊，卻忘記了子彈一早已經用光。

眼前的景象突然變了慢鏡，不斷在張牙舞爪的人猿怪，正伸出魔爪往 Carey 的頭顱撲去。

「砰、砰、砰、砰...」密集的槍聲突然響起，Carey 所在的位置變得血色一片。

人猿怪就這樣應聲倒下，而 Carey 的身影，亦已經消失在窗戶之中。

「呀～」由憤怒和擔憂而激發的力量，使我發了狂般往貨車那兒衝去。



「砰砰砰...」身邊的槍聲依然不斷，但我已經沒有理會子彈擊往何處。

轉瞬已經跑到貨車旁的我，毫不猶豫地把車門打開。

我走進駕駛室內，發現倒臥在座位上的 Carey。

「Carey～」我立刻將她抱起，細心觀察她的傷勢。

Carey 身上雖然沒有任何傷痕，但好像已陷於昏睡狀態。



「我諗佢冇事嘅，可能係嚇親吓啫～」身旁的巧兒冷靜地答道，「嗰邊嗰個，係你朋友呀？」

這才令我，放眼望去出現在面前的人。

在車頭燈光的照亮下，我看得出那人就是志宏。

志宏亦緊隨著我，攀到我們所在的駕駛室內。

「阿 Roy，泫雅呢？」果然，志宏最着緊的仍是泫雅。



「放心，佢好安全...」我向他答道，「佢受咗少少傷，而家喺嗰間屋休養緊...」

志宏張眼望去，好像打算立刻衝進去。

「志宏，我哋轉頭就會返去...」我快一步說道，「你可唔可以同我哋一齊？我哋需要你嘅力量...」

「嗯...」志宏考慮了一下，「好，我幫你...」

「不過，之後你要帶我去見泫雅。」他要求道。

「冇問題...」我爽快地答道，「我一定帶你見佢...」

「點呀？我哋行得未？」巧兒向我們催促道，「再唔走，我哋可能再冇機會...」

「吼～」原來在我們的談話間，喪屍們已經開始將我們包圍。



「走！即刻走！」我回應道。

「隆隆...」貨車的引擎響起，車子開始往前邁進。

「嘭嘭...」貨車不斷把喪屍們撞倒並輾過，使車架不停地發出聲響。

縱然如此，Carey 仍是沒有半點蘇醒的跡象。

「嗱，俾你...」志宏遞來了兩排手槍子彈，以給我作出補充。

「而家我哋去邊？」志宏主動問道。

「烏溪沙站...」我回應道，「要搵返我個朋友，同埋去搵啲藥...」



「Okay... 不過，可唔可以俾我坐後面？」志宏問道，「呢度... 有啲迫...」

要在這裡坐四個人，確實比較吃力。

反而，後面的三人客座會比較寬敞。

「都好吖～」我毫不猶豫便答應，「一陣冇咁多喪屍，我哋就停低俾你過去。」

「唔得！你哋唔可以過去！」豈料巧兒作出強烈反對，「後面擺滿曬嘢，已經冇位俾其他人...」

我和志宏都被她的反應嚇到，可冷靜後我們不禁互望；因為我們都覺得，後座一定有些不可告人的秘密。

於是我們從後頭的小窗戶查看，竟發現客座裡正躺著一個，雙手被反綁的女人。

「巧兒，後面嗰個係咩人？」我質問道。



「呃...」她好像面有難色。

「算！妳唔講，我哋自己過去問！」我威脅道，「停車！」

「好... 我講...」看來巧兒十分害怕我們跟那女子接觸，「我咪講過，阿賢係異生教嘅人嚟嘅...」

我立刻窺看志宏的反應，看來他沒有對此感到十分驚訝。

「我諗你哋都知，異生教有個共妻嘅教條...」巧兒續說，「當初阿賢就係為咗保護我，唔想我俾其他男人攪，所以先偷偷哋離開...」

「不過，當我哋走咗出嚟之後，就發覺要自己生存一啲都唔易...」她說得有點感觸，「本身阿賢屋企有阿爸同細佬喺度，但係都比啲怪物殺曬...」

「佢淨低嘅細妹，就係我哋嘅最後希望...」她說道。