「Vicky?」因他們的突然沉默,我只好指定回答的人。

「呃... 你知唔知你訓咗幾耐呀?」Vicky 反問道。

「唔... 一日?」我覺得差不多有一天。

「三日,你足足訓咗三日呀~」Vicky 豎着三根手指說道,「所以我哋每個人,都入過你間房啦!」

其實,我想問的不只是這樣。



但,我不知道該怎樣開口...

「其實...」Vicky 打量著我後問道,「你係咪想問 Carey 嘅情況呀?」

原來,她們真的有見過 Carey?

「嗯... 佢一路同我一齊走,所以都有啲擔心佢...」我沒有打算隱瞞自己的想法。

「哦~ 原來係咁...」Vicky 帶點妒忌般答道,「原來為咗搵你個情人...」



「Carey 佢... 今朝已經同 Dickson 佢哋出咗去喇...」素恩插口答道。

Dickson?他竟然在這裡出現過?

「佢哋幾時會返?」我想確定一下她們的行程。

「佢哋唔會返嚟㗎喇...」素恩答道,「佢哋會直接去馬鞍山嘅總壇...」

什麼?



究竟我應否告知素恩,Dickson 他們其實心懷不軌?

「做咩呀?」素恩好像觀察到我有點異樣,「係咪有嘢想講?」

她,真的不容小覷。

「冇,我諗緊我哋嘅下一步去邊啫~」在還沒有拿定主意之前,我決定先作隱瞞。

「咁就要睇下你喇~」她看着我說道,「如果唔係你有傷唔行得,我哋三個頭先已經跟咗 Dickson 一齊出發啦!」

「我冇嘢喎,而家就...」我想展示自己沒有問題,但雙腿卻好像不聽使喚,突然乏力令我跌了一跤。

「算啦~ 你都係唔好勉強...」素恩看到我的窘境後說道,「都唔爭在等多一兩日...」

我很想反駁,但也無可奈何...



「不過,睇嚟你都好似冇乜嘢啦~」素恩續說,「咁我就睇吓追唔追倒 Dickson 先...」

雖然現在的她,好像對我有點冷淡,但我仍是想把素恩留低。

「妳而家先走,都唔慌會追得到佢啦~」我刻意挖苦道。

「咁又唔洗咁擔心,聽佢講要先去搵返一個叫泫雅嘅女仔...」素恩補充說,「所以佢哋出發去馬鞍山前,都要啲時間...」

看來,她堅決離開。

「Okay!」我向她叫道,「咁妳走之前,可唔可以話我知,妳之前應承咗孝信嘅,究竟係咩事?」

素恩沒有立即回答。



「我諗... 你知道得越少越好...」素恩想了一會,卻只是冷冷地答道。

「我...」正想說我渴望她留低,但礙於 Vicky 在此,我還是沒有道出,「一場朋友,我都想幫吓妳...」

「嘿嘿,朋友?」素恩好像有點奇怪,「我幾時同你係朋友呀?」

「我接近你哋,都係有目的嘅...」素恩打量著我們説,「而家目標差唔多達成,我都唔洗再同你哋一齊...」

她的話,完全出乎我的意料之外。

她說的是真的嗎?

一直以來,她只是為了達成自己那所謂的目標嗎?

心內突然一陣悲痛...



一時間,我們也沒法説出話來。

「如果冇乜嘢,我哋就咁啦!」素恩説著便打算離開。

「素恩!」我忍不住叫道,「妳可唔可以留低?」

「哈哈!有咩原因要我留低?」她反問道。

「乜保護神使安全,唔係妳嘅責任咩?」我叫道,「更何況,我係教主個仔!」

「阿 Roy... 你... 你講咩呀?」首先感到驚訝的,是身旁的 Vicky。

可素恩卻沒有反應。



「所以,而家係我命令妳留低!」我沒有理會 Vicky 的提問,「我以教主嗰仔命令妳,妳唔係唔聽吖嘛?」

「哦?係咩?」素恩聽後再回身走到我身旁。

可突然間眼前一黑,我便再次失去了知覺...
已有 0 人追稿