［人性/有甜］- 屍•家•馬鞍山（隔日更新）: Chapter 681 - KK 的背景

「我都覺得，KK 哥同啲怪物，一定有好密切嘅關係...」我表示應同，「不過我怕嘅係，件事唔係好似我哋表面上睇咁簡單。」

「其實... 我都覺得係...」Vicky 回應道，「要造一隻以前從來未見過嘅怪物出嚟，唔係打枝針咁簡單。」

「同埋，你之前喺怪物身上搵倒嘅嘢，咪就證明咗，啲怪物同異生教有關囉～」Vicky 補充道。

「咁自稱特種部隊嘅 KK 哥，本身已經係異生教嘅爪牙...」我答道，「只不過我估唔到，佢仲會同隻怪物有關啫～」

「嗯...」Vicky 輕輕點頭示意。



「我諗，要捉返個衰人，先至可以問倒多啲嘢...」我進一步補充。

「都係...」Vicky 望著沙井的頂部問道，「不過，而家上面都行唔倒，我哋可以點？」

「我覺得個賤人，遲早都會落返嚟...」女子插口說道。

我們有點不解，所以一致地望著她。

「妳都有道理...」我應同道，「如果佢真係有份養呢隻怪物，佢一定會返嚟睇吓個情況...」



「係...」Vicky 也同意我們的看法，「不過個問題係，佢要幾耐先落嚟...」

「咕...」言談間，女子傳來一點聲音。

「唔好意思，我有啲肚餓...」女子尷尬地答道。

想不到，一直被怪物的營養液供養著的人，也會有飢餓的感覺。

「唉... 最衰我哋啲背囊跌咗喺出面吖...」Vicky 答道，「如果唔係，我就可以俾啲乾糧妳食住先...」



「一係咁吖！」Vicky 想了一下後興奮地說道，「我幫妳攞返嚟吖！」

「咪住！我唔要妳出去...」我立刻阻止，「我唔要再同妳分開，要去就一齊去！」

Vicky 聽到後，便定了神的看著我。

「呃... 你哋放心出去啦！唔洗理我㗎～」女子打破了我們的沈默，「我已經唔可以同你哋出去㗎喇，只可以留喺呢度...」

「放心啦！個賤人應該唔會咁快落嚟嘅...」她續說，「就算係，佢都唔可以對我做啲咩㗎啦～」

她說的話不但沒有令我們放心，反而令我們更加擔心她獨自待著的安危。

但等於代表，Vicky 和我其中一個需要外出尋找。

讓 Vicky 出去，她便有可能再遇上那些怪物；但若然出去的是我，則 Vicky 有機會碰上從沙井口回來的 KK 哥。



兩個結果，我都不想見到。

「我哋講咗咁耐，都未知你叫咩名...」我另有打算，「我叫 Roy，佢係我女友 Vicky...」

我已經習慣了，這樣的稱呼她。

「哦？係呀？」女子的表情有點奇怪，「我叫黃曉嵐... 你... 哋可以叫我小嵐...」

不知道這是否我的錯覺，小嵐介紹自己時，好像重點注視著我。

可惜，我對她沒有感到半點興趣...

「Vicky，我哋不如一齊喺度等一等...」我提議道，「我諗... 嗰個人應該好快就會落嚟...」



「唔係呀...」Vicky 突然貼近我的耳邊說，「我全身都黐納納，想換個啲衫...」

「我喺個背囊入面，收埋咗一啲之前攞咗嘅衫...」她續說，「我好想出去攞返...」

「吓？個背囊跌咗落條渠度，好大機會濕曬喇喎～」我仍是不希望她出去冒險。

「應該唔會啩...」Vicky 回應道，「我用膠袋袋住曬啲衫同食物，所以應該 okay 嘅～」

「不過...」我始終放心不下...

「得啦！我出一出去，好快就返嚟...」Vicky 依舊堅持道，「小嵐唔方便出去，你就留低保護佢啦！」

「......」我沒有回答。

Vicky 見我沒有反應，便轉身準備出發。



可是，我終於也忍不住出手把她拉住。

「阿 Roy？」Vicky 有點不明所以。

「小嵐佢講得啱，KK 哥應該冇咁快落返嚟嘅...」我答道，「所以我哋速去速回，應該都安全嘅...」

「但係...」Vicky 還是有點猶豫。

「唔好但係喇～ 我已經決定咗，同你一齊出去㗎喇～」我用肯定的語氣答道，「如果唔係，就所有人都唔好出去喇！」

「......」四周，頓時變得鴉雀無聲...