［人性/有甜］- 屍•家•馬鞍山（隔日更新）: Chapter 696 - 研究員？

我們小心翼翼地往前，靠在門的兩則準備。

我跟 Vicky 檢查了一下子彈，發現已經所餘無幾。

現在剩下的，就只有 Vicky 戰術背心內的兩個彈匣。

「Vicky，are you ready？」為舒緩一下緊張的氣氛，我逗趣的向她問道。

「Yes，ready！」Vicky 卻認真的回應。



於是我示意 Vicky 把門打開，然後先由我閃身衝入房間之內。

「咔嚓...」我進入這個貌似雜物間的地方，竟發現有一人擎槍指向我。

我們亦立刻以槍口相向...

「你... 咩人？」那人以沉鬱的聲線，攤坐在地上問我。

「先生你冷靜啲，我哋係人... 唔係喪屍嚟...」話雖如此，我的手指卻半秒都沒有離開過板機。



「嘿嘿... 我當然知啦...」那人冷笑著說，「我係問你哋... 係咩人？」

「我... 我哋係受人所託嚟搵人嘅...」我立刻想到 Miki 的請求。

「哈哈！嚟呢度搵人？」那人當然不相信，「你哋真係好笑...」

「你哋好老老實實講係咩人，如果唔係...」那人拿起一個遙控按鈕說道，「我一撳呢個制，出面啲困住喪屍嘅門，就會全部打開...」

雖然以外面喪屍的數量，我們應該足以應付。



但因為我們的目的並不是這樣，所以我決定冷靜跟他商量。

「你冷靜啲先...」我想把氣氛緩和，「你會唔會識一個叫 Miki 嘅女仔？」

「你... 你話咩話？」那人聽到我的話後，突然變得十分激動，「你識得佢、你同佢係乜嘢關係？」

從他緊張的表情說明，我們應該找對了方向。

「我... 係 Miki 拜託我哋，去搵佢一個... 親人嘅...」我決定先不去把真相全盤托出。

「我就係 Miki 嘅爸爸...」那人的態度變得軟化，手上的槍也隨即垂下，「不過... Miki 佢？」

「佢而家同其他人一樣，暫時都叫安全嘅...」我答道，「既然你係佢要搵嘅人，咁不如同我哋一齊返去啦！」

那人只是看著我，沒有回應...



「Hello？Miki 爸爸？」我看他沒有反應，於是再向他追問。

「你哋可以叫我 Marcus...」那人答道，「我好多謝你哋嘅好意，不過...」

「你哋都自身難保...」他補充。

我不明白他的意思...

「我哋，係冇辦法離開呢度...」他黯然地說道，「呢度所有門都由中央控制室控制，你之所以可以開倒呢道門，係同你心口個名牌有關...」

我打量自己胸前掛著的名牌，大概也明白他的意思。

「每個人都有自己嘅職位權限，開倒嘅門都唔一樣...」他再補充，「我哋呢啲低級職員，可以開到嘅門好有限...」



原來，我的名牌低級得只能開啟雜物房的門。

「不過，你哋可以開到嘅門會唔會少咗啲呀？」我打量 Marcus 的名牌，職級跟我身上那人的，一模一樣。

他的表情，好像有點不明所以。

「我入嚟之前，都試過好幾道門，不過冇一道門開得倒...」我把剛才的情況告知。

「哦...」Marcus 聽後立刻明白，「咁係因為啟動左緊急狀態...」

「喺緊急狀態下，絕大部份嘅門都鎖起咗，包括...」他解釋道，「返番上地面嘅唯一途徑...」

難道，那部升降機...

「而啲度... 係事故避難室...」他環顧四周後再說明道，「所有職員，無論任何情況都有權限進入，所以你先入倒嚟...」



我想不到，這個困著數頭喪屍、看似是雜物房的地方， 竟然是他所謂的事故避難室。

「咁你嘅意思即係，我哋就咁困死咗喺呢度？」我不相信這是事實，「必要時，咪喺𨋢槽爬返上去囉！」

「嘿嘿！」他冷笑著說，「呢度嘅𨋢門係特製嘅，一般嘅外力根本無法打開...」

「不過...」他打量我們後說道，「要出返去，都唔係完全冇方法嘅～」