只見于珊停下了腳步,默默的看著她的手袋!
她會接聽嗎?
只見她靜靜地拿出她的手機,把她的手機放到耳邊!
 
因為離她有一點距離,不知道她在說甚麼!
但,不要緊,我透過電話跟她說話就可以了!
我把電話放到耳旁,竟然傳來……
「你所打嘅電話未有用戶登記,Your……」
 
怎麼可能,那麼她為甚麼接聽了電話?




我疑惑的走近了她,只見她邊說電話邊警戒著我。
「係呀,我過幾日會搭飛機返黎架啦!係呀!好啦,唔講啦,長途電話貴呀,我返酒店再Whatsapp你地啦!」
 
然後,她掛上了電話,目光仍不敢從我身上移開!
「個電話?無可能架,點會咁……」我對著她難以置信地說!
 
「雖然我唔知你係邊個,亦都唔知點解你會知我咁多野!但警告你唔好再跟住我,我報警架!」她這次沒有逃跑,而是大膽的看著我,大慨認為這樣可以嚇走我吧!
 
「我……我唔知點同你解釋!但……尋日你真係搵過我,你話你黎香港係想搵返你細佬!之後你仲去左搵王馬門呢個人,點解一日都未夠,所有野都唔同晒?點解會咁?」我沮喪地說,到底是我瘋了,還是這個世界瘋了?我實在搞不懂了!
 




「你……你無野呀嘛?」大慨我的神情真的很可憐吧,于珊也開始同情起我來。
 
我真的很想回答她一句「我無野!」,但……現在的我真的說不出來!
而且,我知道她這次離開後,我更沒有機會找到她,也不會再有機會找到這種改變的真相!
問題是,此刻的我又可以怎樣做呢?
我對她來說,只是一個比陌生人更可怕的人而已!
 
「黃于珊!我知道呢一刻無論我講咩都好,都只會令你覺得我一係痴線,一係痴漢!我只想講……我真係唔係你諗嘅咁樣!如果,係你返倫敦之前!突然諗返起之前發生嘅事,我希望你可以再黎呢間便利店,我只係想知道,究竟中間發生左咩事,令到你……咩都唔記得!我知道呢個機會率好低,但……希望你真係醒返起!」說完後,我便轉身離去,實在不知道還有甚麼話可以說!
 
「等……等一陣!」于珊的聲音從我背後傳來,該不會……




 
我轉過身來,用期待的眼神看著她。
 
「其實.…..我係倫敦係主修心理學,我......雖然真係唔知你講嘅係咩!但......我覺得你都唔係講緊大話!」她說。
 
「吓?咁......者係點呀?你信我?定唔信我?」我一頭霧水的說。
 
「我......只係信你無講大話,但......有可能係你出現幻覺,或者精神有問題......」她說完後,我頓時感到非常洩氣,看來我是沒有辨法解開這個疑團的了!
 
「仲有一個可能......」她說,我抬起頭看著她,拜託,你能把話一口氣說完嗎?
 
「就係你講嘅野係真,我......真係失左憶!或者......有部分記憶,係唔同左!」她說。
 
天啊!這變化也太大了吧,我真的不敢相信她突然會變成這樣!
 




「點......點解你會咁諗?」我不解的問。
 
「因為......係英國果陣,我都有接觸過呢類型嘅Cases,就係某樣記憶,大部份人都唔記得左!但只有少數人仍殘留那種記憶!而有趣嘅部份,就係當我地調查落去嘅時候,竟然發然到一D證據,係證實到果樣記憶係確實存在過!」她解釋。
 
「吓......你講到咁深,其實我唔係好明!」我說。
 
「其實好簡單,就係英國果邊,曾經有一批人嘅記憶,係被某種力量操控左,只有少數人避免左!」她說。
 
「吓!咁最後佢地點呀?」我問。
 
「無答案!最後都無辨法證實究竟係點!不過,我今次只所以會懷疑自己可能係......記憶唔同左!係因為,我發現自己,唔知點解出現係深水埗,我無論點樣,都諗唔起今日做過D咩!好似一打開眼嘅時候,我已經係便利店度出現!」她說。
 
聽到這裏,我總算稍為放心了一點!
即是說,這兩天發生的事,還是有一點機會是真的存在!
而不是我個人的妄想!




 
「我想問,如果我真係有搵過你,同你傾過野,你可唔可以講返俾我知,我同你傾過D咩?成件事係點,中間有無D咩重要野發生過?一點一滴嘅資訊,都唔可以遺漏!只有咁樣,先有可能令我腦入面嘅記憶,重新出返黎!」她說。
 
「可以係可以,不過便利店果邊......」我突然想起,我從便利店出來已經有一段時間,阿強他會不會已經在咒罵我?
 
「咁......」大慨她也沒有想到這點吧!
 
「算啦,你跟我返便利店先,我同我朋友講聲,應該請一日假無問題嘅!」我實在不想于珊再次消失,然後又忘記了所有事情,所以我決定現在就要把事情弄清楚!
 
我和于珊回到便利店,然後我跟阿強隨便說了些理由,然後伴隨著他一連串的咒罵聲,我總算抽到了一個晚上的時間,跟于珊討論這兩天的事情!
 
然後我們便到了附近的麥當奴,把這兩天的事情跟她說。
可能有人會問,為甚麼不回到我的房間再說呢?
 
理由非常簡單,于珊此刻還不是太信任我,試問你會跟一個瘋子到他的家裏作客嗎?




假設她真的失去了記憶,其實她仍願意再聽一次我的說話,已經可說是奇蹟了!
 
而且,剛剛回便利店的時候,我也冷靜的想了一想!
王馬門今天出現的時間太巧合了,就在我懷疑于珊出了意外,準備上樓查看時,他竟突然出現。
然後,他所說的那些理由,也未免太過完美了!
仿佛,一切也是為了解答我心中的疑問而來的!
 
樓上的那個房客也是這樣,來了這數天,我可從來沒有看見其他房客!
現在回想起來,一切都太巧合了,不禁讓我產生了不可讓王馬門看見于珊的想法!
 
怎樣也好,現在先要嘗試找回于珊的記憶!
如果成功,下一個對象=,應該是阿強了!
我相信,他們肯定是遇到些甚麼,才會變成這樣!
 
「小明,你諗緊咩呀?」我們坐在麥當奴裏,吃著那油炸過度的薯條!




 
「無,無呀!係度諗緊點解你會失憶之嘛,同埋,我諗唔止你有呢個情況,我朋友阿強都係咁!」我說。
 
「如果真係好似你咁講,個情況真係好嚴重!你都係快D講返俾我知,究竟呢兩日發生左咩事!我只記得自己黎左香港玩,但點解會一個人黎,點解會黎深水埗,我完全無印象!如果唔係遇到你,同我講左D野,我諗返自己究竟黎做咩,恐怕我呢一世都唔會對自己嘅記憶有懷疑!」她說。
 
「聽落真係好恐怖!咁好啦,我同你講返晒呢兩日發生嘅事啦,希望你可以記起返真正嘅記憶!」我說。
 
於是,我便花了好一些時間,把所有我知道的事情!以及這兩天以來,她所採取的行動,以及突然失去聯絡的情況告訴她!
 
「大約情況就係咁啦!你有無咩頭緒?或者……有無記返起D咩?」我用期待的眼神看著她!
 
等待她回應的期間,一切都好像靜止了般!
然後,她慢慢的搖了搖頭,仿佛宣判了我的死刑一樣!
但下一瞬間,她又點了點頭,到底是怎樣啊?
 
「于……于珊呀!你又搖頭又點頭咁,者係點呀?」我緊張的問。
 
「我搖頭,係因為我真係記唔起你講嘅野!至於我點頭,你所講嘅所有野,亦都正好填補左,我記憶上嘅空洞!但有一點好重要,你話我係黎搵我細佬,而我記憶所及,我真係無任何兄弟姊妹!呢點我可以好肯定咁答你!」她解釋。
 
「唉……者係都無辨法知道,點解你會無左記憶啦!估唔到,最後都係乜都唔知!」我失望的道。
 
「咁又唔係,其實有幾樣野係可以做嘅!不過,呢幾個步驟,係假定你無呃我嘅情況而定嘅……」她猶疑地說。
 
「即係……你仲係懷疑我?我可以做D咩去證明俾你睇我無呃你?」我緊張的說。
 
「其實,唔講得上係懷疑,因為我相信自己嘅判斷!懷疑只係出於本能!其實我只係擔心緊一樣野!」她說。
 
「擔心緊D咩?」我問。
 
「簡單講,其實係我黎搵你之前,網上又好,你朋友又好,甚至乎我自己都好!其實都係查緊呢件事,而且係未有發生D咩意外!而神奇嘅係,係接觸到你之後,所有野都改變左!」她說。
 
「吓?唔係卦?咁都關我事?」我說。
 
「又唔係話一定關你事!只係其中一個可能性者!而另一個可能性係,你話我最話俾左訊息你,話我見到個男人鬼鬼崇崇咁,而之後我就無晒音訊,好可能,尋日嘅我,見到嘅就係導致呢件事嘅元兇!而見到佢之後,亦都發覺左D秘密,所以我先會叫你救我!」她說。
 
「嗯……咁都好合理!但我地依家可以點做?再去搵王馬門?」我問。
 
「呢個當然係一個方法!但佢夠膽係你面前出現,一定已經諗好晒點應對!就算再搵到佢,都未必有咩幫助!仲可能打草驚蛇,令佢知道我又再次搵佢麻煩!我諗我地眼前要做嘅野有三樣!第一:就係你返去睇下仲有無果D白色灰剩低,今次真係要拎去化驗!第二:就係搞清楚,我搵緊嘅所謂細佬,究竟係咩人?第三:就係你要盡快搬走,如果唔係,連你都消失埋嘅話,到時我又俾人洗腦,咁呢件事就真係一世都唔會再有人知道真相!」她說。
 
「吓?搬?唔係呀,我大嗱嗱俾左六千蚊喎!呀,唔係,應該話,我搬左嘅話,咪無辨法查落去囉?」我一方面心痛那六千大元,另一方面亦考慮到,搬走了對調查會造成不便。
 
「呢個係我提議者,如果你真係唔想搬都無所謂!你每晚搵野頂住度門,訓之前影定張相,upload上網或者send俾我!有晒紀錄嘅話,我諗無人可以令你憑空消失卦!」她說。
 
「應……應該係嘅!」我說。
 
「唔好諗咁多啦!最少依家我都信你講嘅野!你應該開心可以搵到同伴去同你一齊面對!唔會有事嘅,放心!你訓醒之後就拎D白灰俾我去化驗啦!另外,我都會去調查返我所講嘅細佬究竟係咩人!呀!以防萬一,我講定一個秘密俾你知,如果我真係又再失憶,你一講呢件事,我應該就會相信你!呢件事就……」她靠近我的耳邊,跟我說了這個秘密。
 
之後,她便回去旺角酒店了!
而我亦回到那個充滿奇怪事的單位去!
 
老實說,雖然于珊提議了一些方法,讓我保護自己,但發生了一連串的怪事後,是否這樣便能保障得了自己,實在是一個未知數!
不過,若要我搬走的話,恐怕是不太可能的了!
還是自求多福吧!