[愛情無限loop] 就係咁，我做左女神一年既備胎: ３８　女神的怒火

本來我今日係好期待呢一餐飯架，但係估都估唔到，會比呢兩個人打擾。果位呂晨唔知點解一直咁眼甘甘望住我，不停咁放生電。而果位艾倫就不停想搵機會食阿琪豆腐，我當然用盡我一切既方法阻止佢啦。

佢不停咁發動攻勢，我就不停擋，但係我忘記左既係，其實我都係其中一個人既獵物……

呂晨愈坐愈近我，好快就坐到屁股貼屁股。

「阿牛……」阿琪呢個時侯係我耳邊話：「不如我地調位啦。」

我點左點頭，然後我地二個快手咁換左個位，呂晨見唔得呈，扁咀嬲豬，但估唔到個艾倫見到咁，佢竟然話：「佢地換位，我地又換姐。」



係啊！佢同呂晨換位啊！

我見到咁就緊係即刻同阿琪轉返位啦，因為如果真係比艾倫坐落黎，就變左係艾倫個狗屎忽店到阿琪，我一定唔比啦。

但我無諗過，呢個遊戲會變成不停繼續落去……

我地雙方爭持不下，野都未食已經累到仆晒街，「……你地點架？」艾倫問我。

「咁你地呢……」我反問返佢地。



「你坐得我就坐得囉。」佢話。

我睇一睇而家佢企緊個位，因為佢而定企左係我隔離，所以對阿琪黎講係安全既，「你話架，我坐你坐。」

「好啊！」佢講左後我就坐低，但估唔到呢隻狗公仆街到用腳踢走張椅，我一個坐空，成個人跌左係地下上面。

「阿牛哥，坐你都唔識坐啊……」「夠拿！你好過份啊！」在場幾個人都嚇左一跳，我望一望頭先大喝既阿琪，佢面都紅晒咁怒睥住艾倫。

「……玩……玩下姐。」艾倫話。



「好好玩啊而家！你幾歲人啊！剩係識得係度食度腐抽水！阿牛好心幫我擋你條友就整跌佢，做人做到咁賤駁咩啊你！」艾倫比阿琪大鬧完一輪後，成個人呆左咁企左係度，而係旁邊既呂晨都呆晒咁望住佢。

而我就起左身，阿琪見我起身就過黎扶我問：「無事嘛你？」

我搖一搖頭然後問返佢：「我問妳有無事先真啊？有無比人激親？」

阿琪扁一扁咀，呢個動作如果係呂晨做的話我會覺得好反感，但係阿琪做就真係好惹人憐愛，「咁我地走，去另一度食好唔好？」

「……下？但……」阿琪都未講完，我就捉住阿琪行左出呢間店，而係出呢間店既時候，我聽到呂晨講左句，「我係唔會輸比妳架，阿琪。」

輸Ｄ咩呢？佢到底唔想輸Ｄ咩比阿琪？